ESEKIELE 37

God ki hagamêrira aporo na Isiraelita

1Na raramohana raha na Araha ki angariê, ma igê na maruteha ngaia ki rageê akê ma ki hagâgasiê vato igê ta na maruguna, i gahuia na surisuri. 2Ngaia ki meêrihu suria na maruguna, ma inê kê bâsigi rako era na surisuri. Ngaigi ki makahukahu ngavê. 3Ngaia ki vi tangê, ki vi: “Igo, karena enoni ma, i hega, na surisuri ngegana ka girara vari, viga mauri aporo?” Inê kê arami, kê vi: “Araha God, igo ma ko girara!”

4Ngaia ki vi: “Gu tamasi poropete tangagi na surisuri. Gu vi tangagi, ke karingagi na tamasinga iaku, inê na Araha. 5Gu hagarongogi renigi na tamasinga iaku tangagi. Inê na Araha God kê vi vikê tangara: Inê be hagamêrigamu aporo. Inê be raravaigamu, kamu mêri. 6Inê be puruigamu aporo renigi na hasigomi ma na varugimi, ma be hagatugunigamu aporo renigi na gavumi. Inê be raravaigamu, kamu mêri. Vikana igamu kamu page tahetara reniê, vi inê ka na Araha.”

7Hoi, inê kê tamasi poropete, manga i vi tangê na Araha. Matena gê tamasi, inê kê rongogi na surisuri i hekorekore ma ki heratorato aporo. 8Inê kê bâ vê, ma na hasigota ma na varugita ma na gavota ki toto gahuigi na surisuri. Ma ngaigi ki mamêngagi, vige mauri.

9Na Araha God tamasi tangê, ki vi: “Igo, karena enoni ma, gu tamasi poropete tanga na rogaroga. Gu vi tanga na rogaroga, vi inê na Araha God kê bonasia, ki arâ me tenigi na ara ni maani na tangi, hanana i raravaigi na gahua ngegana ma ki hagamêrigi aporo.”

10Hoi, inê kê tamasi poropete, manga i vi tangê na Araha. Na rogaroga ki banuhigi na gahuani, ma ngaigi ki mêri aporo, ma ka ura hagaraga. Ngaira ka rako ngavê.

11Na Araha ki tamasi tangê, ki vi: “Igo, karena enoni ma, na ai ni Isiraele ka maratorani na surisuri ngegana. Ngaira ka hetamatamasi, ka vi, ‘Igia ka maratorani na surisuri i êvariga. Igia ka bagahagêguri. Igia ki hato iaka.’ 12Vikê gu tamasi poropete tangara na kariaku na Isiraelita, ku hagarongora, vi inê na Araha God, be tangahigi na anoanota. Inê be tavora hura ma be torera aporo tanga i Isiraele na apanena iata. 13Inê be tangahigi na anoanota na kariaku, ma be hagahurasira. Vikana ngaira ka page tahetara reniê, vi inê ka na Araha. 14Inê be raravaira, ke mêri aporo. Inê be hagamarumungenira, ke oga i na apanena iata mareta. Vikana ngaira ka page tahetara reniê, vi inê ka na Araha. Na suruha iaku ngekana, i page vagavaga me mave nga. Ngaia kani gê visia, inê na Araha.”

I Juta me Isiraele karu page haku aporo

15Na Araha ki tamasi tangê, ki vi: 16“Igo, karena enoni ma, gu tavoa na bahitana na apinige, ma ku segegi so igê na tamasinga igê: ‘O Juta, ma na raraha iana, ma na enoni ga tari suria igê.’ Ma hemuri ko tavoa ta na bahitana nikâ, ma ku segegi so igê na tamasinga igê: ‘O Josepo, ma na raraha iana i Eperaimi, ma na enoni ga tari suria igê.’ 17Go herehere ratorerua na bahitana gi rua na apinige ngegana, karu bâbâ manga na bahitana gi tage togo ma. 18Ma ki manga na kariamu na Isiraelita ma ka hagatego, ka vivi, ‘Na ta ka na girarana?’ 19igo ko vivi, vi inê na Araha God kani gê page katoa vikana. Inê be tavorerua na bahitana gi rua ngegana, tani kani Isiraele ma tani kani Juta, ma be here ratorerua. Na bahitana gi rua ngegana karu vora gi tage togo ma be hererumia i rimaku.

20“Gu hererumirerua na bahatana gi rua ngegana i rimamu, ma ku hagabâsira na enoni renirerua. 21Hemuri ko hagarongora, vi inê na Araha God kê tamasi, kê vi vikê: Inê be torera hura na kariaku hato tenigi na agua hato, ga totoko surigi. Inê be hagahakura ma be kasira aporo i pasita igê na apanena iata mareta. 22Ma i ngekana igê na hungani i Isiraele inê be nakarerua haku na apanini me girua, karu vora gi tage togo ma. Na maneraha gi tage togo ma ki page marungira ngaira hato. Ngaira ki hato, vige page voasira so mareta nikâ, hanana vige vora na apanini me gi rua henirerua na maneraha iaterua hegitigi. 23Ngaira ki hato, vige page hagaerasira mareta nikâ renigi na vogasiha ni ataro, se vi renigi na bagaparongata ma na bagatauhata. Inê be hagatahira tenigi na tarani era ngegana. Ngaira ki hato, vige page haritoheê nikâ, se vige page ruhiê. Inê be hagamatarotarora. Ngaira ka page vora re na kariaku, ma inê be God iata. 24Ta na maneraha, i maratorana na kariaku o Tavite, ki page marungira. Ngaira ka page obahaku i ruguhana na maneraha gi tage togo ma. Ngaira ka page arâ surigi na ramata ma na hagesuringa iaku, ma ka page tototo surigi. 25Ngaira ka page oga igê na agua, gê bani haganahunia na kariaku o Jakobo renia, na agua ga bani oga igê na êvarita. Ngaira ka page oga hagahu i ngekana, ma ngaira na kareta ma na raraha iata nikâ. Ta na maneraha, i maratorana na kariaku o Tavite, ki page marungira tare, ki bê ki arâ. 26Inê be naka na suruheri iaku henira, hanana ga gâga igê na ramana tare, ki bê ki arâ. Inê be kasira i ngekana, ma be hagarakonira. Inê be naka na Ruma ni Rotu iaku, ke oga tare i pasita. 27Inê be oga i berarogata. Inê be God iata, ma ngaira ke vora re na kariaku. 28Na enoni i na marê getigi ka page tahetara reniê, vi inê na Araha kani gê atera na Isiraelita, ka vora re na kariaku, suria gê naka na Ruma ni Rotu iaku, ki oga tare i pasita.”

Currently Selected:

ESEKIELE 37: KCB

Highlight

Copy

Compare