ESEKIELE 23

Samaria me Jerusaleme ka na êrâ

1Na Araha ki tamasi tangê, ki vi: 2“Igo, karena enoni ma, i ta na tangiana ka heogana, garu vora haku. 3Matena garu sisite mênga, ngairerua karu goga i Esipito. Ma i ngekana ngairerua karu bani rongo era igê, ma karu vora re na êrâ. Ngairerua karu hagamarumu, ka têgi na maani na susuterua. 4Na ani, i vora hagenago, ka hêtana vi ka Ohola. Ngaia kani Samaria. Na ani, i vora hagemuri, ka hêtana vi ka Oholiba. Ngaia kani Jerusaleme. Inê kê êragirerua, ma karu apara kare tangê, na kare mane ma na hehene.

5“Henaka ma gê êragia ka Ohola, ma ngaia ki ama ni paronga nga manga na êrâ. Ngaia ki tenira ngavê na mane getera. Ngaira ka na me ni Asiria. 6Ngaira ka na mane ni me, ga tuguni rotorotoaga memera, ma na kariana na maneraha i teha, ma na maneraha ni hinua. Ngaira hato ka bâkoro ngavê, ma ka hâhâruga ma ka manisingenigi na râha igê na hosi. 7Ngaia ki na êrâ iata na ara ni araha ni me ni Asiria. Ngaia ki hagaerasia marena renia na teniha era, suria i rahesira na harasita na ai ni Asiria. 8Ngaia ki ama ni êrâ nga manga i Esipito i nago. I ngekana ngaia ki bani rongo era me igê, matena i kare viru. Matena i kere gete mênga, na mane ka mauru henia, ma ka têgi na susuna, ma ka katoa manga na êrâ. 9Tahema inê kê tagarenia tangara na me ni Asiria, ga gogo suria. Ngaia ki tenira bâraha. 10Ngaira ka tasia ki rupaturi, ka henahuraura na karena, mane ma na gete, ma ka ahurara renia na tatapa borahu. Na gete hato ka haku renia, suria i tarahua na hagaitangiha ngekana.

11“Henaka ka Oholiba ki bâsia keogana vikana, ngaia ki tê era ngavê teharia. Ngaia ki tenira bâraha na mane, ma ki rongo raha na atana vi êrâ. 12Ngaia nikâ ki tenira bâraha na me ni Asiria. Ngaira ka na mane ni me, ga tuguni bâkoro, ma na kariana na maneraha i teha, ma na araha na mane ni me. Ngaira hato ka bâkoro ngavê ma ka hâhâruga. 13Na eraha ki aharêsia ngavê. Ngaia ki maratorana na keogana.

14-15“Naka ma i manga ngekana, ma ngaia ki ama ni erataga ngavê nga. I ta na matena ngaia ki bâsia na apê, ga segegi rako igê na nunuta na enoni i Babilonia. Ngaigi ki memera ma ka hogotenigi na hogosita i kâta, ma ka buhigi na bêta renigi na gahu bâkoro. 16Matena i bâsira, ngaia ki tenira ngavê, ma ki kasi tamasinga râ tangara i Babilonia. 17Ma na me ni Babilonia ka râ me, ma ka merongo era. Ngaira ka katoa bera, ma ka hagaerasia ngavê rârâ, ma ngaia ki makimaki tenira. 18Ngaia ki rupaturi i maata na enoni hato, hanana ga girara, vi ngaia ka na êrâ. Tahema inê kê makimaki tenia nogana manga keogana. 19Ma ngaia ki kahu ama ni aharêsia nga na êrâ. Ngaia ki paronga manga i nago, matena i kare viru ma ki êrâ i Esipito. 20Ngaia ki tenira ngavê na mane, ga gogogo surira tare na gete, ma ka mangara na tonki se na hosi, ga hanigira na ani hehene, ga borogogo. 21Ka Oholiba, igo ko tenia, vigo ama ni paronga era nga manga i nago i Esipito, matena go kare viru, ma na mane ka têgi na susumu ma ka rongo era henigo.”

Na hagaitangiha tanga i Jerusaleme

22Na Araha God ki vi: “Hoi, ka Oholiba, inê kê vi vikê tangago: Igo ko usitenira na mane, ga tenigo, ma inê be katora, ke mangariaga tangago, ma ke rihigo, hanana ka taharigo. 23Inê be torera me na me hato ni Babilonia me Kaletea, me Pekote, me Soa, me Koa, me Asiria. Inê be torera me hato na mane, ga bâkoro ma ka hâhâruga, na kariana na maneraha i teha, na maneraha ni hinua, ma na araha iata na mane ni me, ma na enoni raha getera igê na gavumane. Ngaira hato ka manisingenigi na râha igê na hosi. 24Ngaira hato ka page merarâ me na mane ni me gahu iata henigi na kati ni me ma na ani ni toraha. Ngaira ka page taharigo. Ngaira ka page taugi na bêata ma ka page bubuhi bê, matena ga rihigo ka taharigo. Inê be tagarenigo tangara, hanana ga surigo surigi na tauhata mareta.

25“Inê kê mangariaga tangago, suria go pe toto suriê. Inê be hagamarumungenira ke hagamamasiagago igê na mangariaganiha raha iata. Ngaira ka page retea râ na barisumu, ma ka page tapurugi na karingamu, ma ka page ahurara hunira na karemu. Ngaira ka page henahuraura tenigo na karemu, mane ma na gete. Ngaira ka page sungira mamêrigata na ani ga hitahita so. 26Ngaira ka page tarisigi na tuguni iamu ma ka page hanagogi na rêni iamu. 27Vikana inê be hatungigi râ na teniha era iamu ma na parongamu era, go bani haganegagi me i Esipito. Inê be hatungigo, vigu êrâ. Igo ki hato, vigu angisira nikâ na harasita na ai ni Esipito. Igo ko page hitenira ngavê.

28“Inê na Araha God kê vi vikê: Inê be tagarenigo tangara na enoni, go kitenira ma ko makimaki tenira. 29Ma suria ngaira nogata ka kitenigo, ngaira ka page toregi vê na nahuninga hato iamu tenigo, ma ka page panigo so rupaturi, ma na ara ni enoni ka page girarago, vi igo ka na êrâ. 30Tahema ki page tarahugo na tarana ngekana. Igo ko rongo era henira na marê getigi, ma ko hagaerasigo maremu, suria go hagarapera na harasita. 31Igo ko erataga manga keogamu. Tahema inê be hagatunumigo igê na kâkâ ni hagaitangiha, i bani tono igê keogamu. 32Inê na Araha God kê vi:

“Igo ko page tono igê na kakâ,

i bani tono igê keogamu.

Ngaia ki na kâkâ i koko

ki mave na maana.

Ngaia ki vunu taro musu.

Na enoni hato ka pge mamanatenigo

ma ka page megomarabe.

33Ngaia ki page katogo, ko ape era

ma ki page aripo na maamu.

Na kâkâ iana keogamu Samaria

ngaia ki na kâkâ ni aruhuruhunga

ma ni bubununuganiha.

34Igo ko page totono hagamataria

ma ko page garagara botagia,

ma ko page harasigi na susumu

renigi na abotagani.

Ngaia kani gê visia,

inê na Araha God.

35“Tahema inê na Araha God kê vi: Suria igo ko pe botage reniê, ma ko murisigeê, tahema igo ko page mamasiaga meni na teniha era iamu go êrâ.”

God ki surirerua Samaria me Jerusaleme

36Na Araha ki tamasi tangê, ki vi: “Igo, karena enoni ma, igo ko nanê vari, hanana vigo surirerua ka Ohola ma ka Oholiba? Gu ranganigi na bagatauhaterua, gê kitenigi ngavê. 37Ngairerua karu gamogamo ma karu nahu enoni. Ngairerua karu hagarapera na ataro, ma karu nahuira ka me na kareterua mane, garu aparara tangê, suria garu vogasira re na ataro. 38Ma ki mareha vi nga noga ma ngekana. Ngairerua karu hagaerasia nikâ na Ruma ni Rotu iaku, ma karu pe hagahigasia na Tangiana ni Mamaroha, gê bani hagapunaria. 39Igê nga na tangiana garu nahuira igê na kareku ma karu vogasira re na ataro, ngairerua karu râ me i Ruma ni Rotu iaku, ma karu hagaerasia ngavê.

40“Hagarako ngairerua karu kasikasi tamasinga tangara na mane i na marê hagatê, hanana viga arâ me. Ma na mane ka râ me tangarerua. Ngairerua kahegoana karu mamanu ma karu kutegi na gahugahusi materua, ma karu rêni. 41Ngairerua karu tâ igê na bea, i bâkoro. Hagarangia na bea ki oga igê na tebeli, i rako igê na marâ koro henigi na marâ, i sigini koro, matena ga sungigi, ma na oile ni olive, gê vatererua re. 42Na enoni rako ka hetavatava. Na mane, ga râ me hagatê tenia na bagamasusu raha, ka hatara me. Ngaira ka tarasigi banu na rago i rimaterua na gete, ma ka rakugi na tarepuri, i bâkoro, i raeterua. 43Inê kê tako makira renira, kê vi: I tanu hega kani ga rongo era henirerua na gete na gemêa? Vari na gemêa ka na êrâ iata ngegana? 44Ngaira ka marigirerua tare na êrâ ka Ohola ma ka Oholiba, garu erataga ngavê. 45Na mane, ga koro ma ki oto na parongata, ngaira ka ranganirerua, vi ngairerua karu gamogamo ma karu nahu enoni, suria ngairerua ki monari garu kato vigana.

46“Inê na Araha God kê vi: Unira me na enoni ke nahuirerua ma ke hanago tenirerua. 47Naka ke ariha hunirerua ma ke ninirerua renigi na tatapa borahu. Naka ke mutera ngavê na kareterua, mane ma na gete, ma ka sungigi na ruma iaterua, ke makaka. 48Inê be hatungigi na gamogamoha ma na vogasiha ni ataro igê na marê hagenani, hanana siana na gete hato ka gamogamo mangarerua. 49Ma igamurua ka Ohola ma ka Oholiba, inê be hagaitangigamurua meni na bagatauhamurua, ma suria muru vogasira na ataro. Vikana igamurua kamuru page tahetara reniê, vi inê nga ka na Araha God.”

Currently Selected:

ESEKIELE 23: KCB

Highlight

Copy

Compare