ESEKIELE 22
22
Na bagatauhata na ai ni Jerusaleme
1Na Araha ki tamasi tangê, ki vi: 2“Igo, karena enoni ma, i hega, go nanê vari, hanana vigo suria na hinua, ga baga nanahu enoni igê? Gu ranganira tangara na bagatauhata, gê kitenigi ngavê. 3Gu tamasi urusiê inê na Araha God, ku vi: I sugi hato iami, suria mu mutera rako na kariami maremi, ma kamu hagaerasigamu maremi renigi na vogasiha ni ataro. 4I sugia ma vige hato iami. Igamu kamu nahu enoni. Igamu kamu hagaerasigamu maremi renigi na ataro, mu tagarahigi. I hato iami! Tahema inê kê hagamarumungenira na enoni i na agua getigi ka manavatenigamu, ma na mahuara hato ka megamu marabe. 5Na agua, na ani hagarangi ma na ani hagatê, ka page megamu marabe, suria mu bagatarihami ma na eraha iami ki rongo raha ngavê. 6Bâ, na maneraha hato iami ka tongesurira so mareta ma ki rahasira na nahunga ni nuni. 7I mareha ta na hitangimi, vige hagahigasirerua na enana. Igamu kamu hagaparura na ai mahuara i pasimi. Igamu kamu hagamamasiaga apeta na gete na nâ ma na kare banogo. 8Igamu kamu pe hagahigasigi na Ruma ni Rotu ma na Tangiana ni Mamaroha. 9Tani na hitangimi ka hagatoraira na enoni getera, hanana viga hagarateta ka meme. Tani na hitangimi ka ngaugi na ngêra ni vogasiha igê na hungani ma ka rongo era bâraha igê. 10Tani ka rongo era henia na gete iana na vaemata. Tani ka tugurira na gete, hanana viga rongo era henira, matena i tahataha na obata. 11Tani ka gamogamo. Tani ka hagamura ka hungâta, hanana viga rongo era henira. Tani ka tugurira ka goata, ga meravora, hanana viga rongo era henira. 12Tani na hitangimi ka vatevatera tani ka henahu. Tani ka turigi kê nikâ na haga raha henigi na baruni na kaone iata na goata na Isiraelita. Igê na tarana ngekana ngaira ka katora mareta ka ruruguha igê, ma ka hagamamasiagara na tamata, ga kaone tenira. Ma igamu, igamu kamu pe botage reniê, inê na Araha God.
13“Inê be hagaramo tangagamu! Inê be hatungigi na hanagoha ma na nahunga ni nuni iami. 14Mu takusia vari, vi igamu kamu page gatagata, hanana vigamu rêra pusiê, matena gê hagaitangigamu igê? I bara vê! Ngaia kani gê visia, inê na Araha. Na tamasinga iaku ki page mora. 15Inê be sikirenigamu tangagi na agua hato hagatê, kamu mamahuara igê. Inê be hatungigi na bagatauhami. 16Vikana na enoni i na agua getigi ka page hagamakigamu, ma igamu kamu page tahetara reniê, vi inê ka na Araha.”
17Na Araha ki tamasi tangê, ki vi: 18“Igo, karena enoni ma, tangê inê, na Isiraelita ka manga na marâ purua ma. Ngaira ka mangagi na momogani na kapa, se na aiani ma na marâ vigana, ga hitahita râ, matena ga hagamatarotarogi na siliva igê na gi. 19Hoi, inê na Araha God kê visira, vi ngaira ka mangagi na momogani vigana. Inê be hagahakura me i Jerusaleme, 20tagenana manga ga nakagi na mako na siliva, na kapa, na aiani ma na marâ vigana i rarona na gi, hanana ga hagamatarotarogi igê. Na mangariaganiha raha iaku ki page hagaronora, manga na gi, i hagaronogi na marâ vigana. 21Ua, inê be hagahakura me i Jerusaleme, ma be tanga na gi i ruguhata, ma be hagaronora renia na mangariaganiha iaku. 22Vikana ngaira ka page tahetara renia na mangariaganiha raha iaku, ga hatamia.”
Na bagatauhata na enoni raha i Isiraele
23Na Araha ki tamasi tangê nikâ, ki vi: 24“Igo, karena enoni ma, gu hagarongora na Isiraelita, vi na arito ru ki page rêra igê na apanena iata, matena gê hagaitangia igê na mangariaganiha raha iaku. Na mako ki page avagavaga. 25Na enoni raha igê ka mangara na laione ka ngurunguruhira na ganiani, ga ngasira. Ngaira ka nahu enoni, ma ka hanagogi na haga ma na nahuninga hato iata tenira. Renia na tarana ngekana tahema ka rako era na gete ga nâ. 26Na mane ni vogasiha ka aharêngigi na ramata iaku ma ka pe hagahigasia na Ruma ni Rotu. I maata na marâ purua ma na marâ apuna ka tagenani ma. Ngaira ka pe hagesurira na enoni renigi na tarani, ga matarotaro, ma ka pe matarotaro surigi na ramata na rotu. Ngaira ka pe botage renia na Tangiana ni Mamaroha. Tahema na ai ni Isiraele ka pe hagahigasiê. 27Na maneraha igê na gavumane ka mangara na o vasiga, ga ngasira na ganiani. Ngaira ka nahu enoni, hanana viga ruruguha. 28Na poropete ka pinihigi na tasi ngegana. Ngaira ka maratorata na mane, ga kutea na apê renia na ahu. Na maruteha iata ka pe monari. Igê na hinarunga iata ngaira ka na hagaparunga ma. Ngaira ka vi, vi inê na Araha God kani gê tamasi i harata, ma inê na Araha kê pe hagatorara rârâ vikana. 29Na enoni ruruguha ka hagahagaparu ma ka hanago. Ngaira ka hagamamasiaga apeta na enoni matareha, i bara tangara. Ngaira ka hagabekasira na mahuara i pasita ma ka pe botage renia na otoha.
30“Inê kê garia ta na enoni, hanana vige tagarahigi na para ni hinua, ma ke ura pusigi na agua, i makumakuruga, ma ke rohe pusia na marê, hanana siana kê ruhuruhua igê na mangariaganiha iaku. Ma inê kê pe tarahua. 31Tahema inê be katoa na mangariganiha iaku ke tarahura, ke ngêra manga na baga gi raha. Inê be mutera meni na bagatauhata. Ngaia kani gê visia, inê na Araha.”
Currently Selected:
ESEKIELE 22: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
