ESEKIELE 20
20
God ki bêngenira na kariana, henaka ga haritohea
1Na tangahuruta na tangiana igê na rimata na hageha igê na pita na harisi ga henahuraugami, kami oga surigi i Babilonia. Tani na enoni raha iata na Isiraelita ka râ me i pasiku, ma ka hagateê renia na obaniha iana na Araha. Ngaira ka oga so i maaku. 2Ma na Araha ki tamasi tangê, ki vi: 3“Igo, karena enoni ma, gu tamasi tangara na mane ngegana, ku hagarongora renigi na tamasinga iaku. Inê na Araha God, kê vi vikê: Inê kê bani girara, vi igamu kamu râ me, hanana mu hagateê renia vi na obaniha iaku. Hoi, inê nga ki na God mamauri. Inê kê pe obanigamu, vigamu hagateê renia ta na marâ. Ngaia kani gê visia, inê na Araha God.
4“Igo, karena enoni ma, i hega, igo ko nanê, vigo surira? I hega, igo ko nanê, vigo ranganira? Hoita, gu hagatakusira aporo renigi na bagatauhata na êvarita. 5Gu hagarongora renigi na tamasinga iaku, inê na Araha God. Matena gê atera na Isiraelita, inê kê suru tangara. Inê kê hagagirarara reniê mareku i Esipito, ma kê katora, ka tahetara reniê, vi inê ka na Araha God iata. 6I ngekana inê kê suru tangara, vigê torera hura tenia i Esipito, ma kê bêngenira tanga na agua, gê bani atea tangara, na agua bâkoro ngavê na mako koro, i ango. 7Inê kê bonasira, hanana viga kasigi râ na nunuta na ataro, ga hagarapera, na ataro inê kê kitenira ngavê. Inê kê manimanira, siana ka vogasira na ataro ni Esipito, suria inê nga ka na Araha God iata. 8Ma ngaira ka haritoheê, ma ka usi vige tê viteaku. Ngaira ka ama ni hagarapera nga na ataro, gê kitenira ngavê, ma ka pe kasigi râ na nunuta na ataro ni Esipito. Tahema inê kê mangariaga ngavê tangara, ma kê sugi hagaitangira i ngekana nga i Esipito. 9Ma ki mareha, suria inê kê pe obania, vi ve erasia na ataku, suria i maata na ai ni Esipito inê kê bani suru igê tangara na Isiraelita, ga oga i berarogata, hanana vigê torera hura tenia i Esipito.
10“Tahema inê kê bêngenira hura tenia i Esipito tanga na bagamanihê raha. 11Inê kê vatera igê na ramata ma na hagesuringa iaku, i tuguhira, viga arâ surigi, hanana ga nahunia na morana na mauriha. 12Inê kê hagapunaria na Tangiana ni Mamaroha. Ngaia ka na girarana na suruheri i berarogamami, inê ma ngaira, hanana i hagatakusira, vi inê na Araha kani gê hagakorora, ka apuna.
13Ma i ngekana igê na bagamanihê raha ngaira ka haritoheê nikâ. Ngaira ka aharêngigi na ramata iaku, ma ka kasigi râ na hagesuringa iaku, henaka ngaira ka girara, vi na enoni, i arâ surigi, ngaia ki page nahunia na morana na mauriha. Ngaira ka pe hagahigasia na Tangiana ni Mamaroha. Tahema inê kê mangariaga ngavê tangara ma kê sugi mutera igê na bagamanihê raha ngekana. 14Ma ki mareha, suria inê kê pe obania, vi ve erasia na ataku i maata na enoni, ga bâsiê, gê bêngenira hura na Isiraelita tenia i Esipito. 15Tahema igê na bagamanihê raha ngekana inê kê tohe, vi inê ki asa, be merarâ tanga na agua, gê bani surua tangara, na agua bâkoro ngavê na mako koro, i ango. 16Inê kê tohe vikana, suria ngaira ka kasigi râ na ramata ma na hagesuringa iaku, ma ka pe hagahigasia na Tangiana ni Mamaroha. Ngaira ka obania ma hete, viga vogasira na harasita.
17“Ma inê kê mesira. Inê kê tako rugu, vi mareha be mutera i ngekana igê na bagamanihê raha. 18Ma inê kê kanukanura na enoni haoru i berarogata, kê vi: Siana kamu arâ surigi na tauhata na êvarimi. Siana kamu arâ surigi na hagesuringa iata, se vigamu hagarapera na harasita. 19Inê nga ka na Araha God iami. Mu taugi nga na ramata ma na hagesuringa iaku. 20Mu hagahigasia na Tangiana ni Mamaroha, suria na Tangiana ni Mamaroha ki na girarana na suruheri iaka, ma ki hagatakusigamu tare reniê, vi inê ka na Araha God iami.
21“Ma na apaparaha haoru ngekana ka haritoheê nogata. Ngaira ka aharêngigi na ramata iaku ma ka pe marupegi na hagesuringa iaku, i tuguhira na enoni, viga arâ surigi, hanana viga nahunia na morana na mêriha. Ngaira ka pe hagahigasia na Tangiana ni Mamaroha. Inê kê mangariaga ngavê tangara, ma kê sugi mutera i ngekana igê na bagamanihê raha. 22Ma ki mareha, suria inê kê pe obania, vi ve erasia na ataku i maata na enoni, ga bâsiê, gê merahura na Isiraelita tenia i Esipito. 23Tahema inê kê tohe nikâ igê na bagamanihê raha ngekana. Inê kê tohe, vigê page tokorenira surigi na agua hato i maveta, hanana ga gâga mamahuara i ngeagna. 24Inê kê kato vikana, suria ngaira ka kasigi râ na ramata ma na hagesuringa iaku, ma ka pe hagahigasia na Tangiana ni Mamaroha, ma ka vogasira na harasita na êvarita.
25“Ma i hemuri inê kê vatera na ramata, na ani ga pe koro, ma na hagesuringa, ga pe vatera re na ramana. 26Inê kê nakara ma vê, ka hagaerasira mareta renigi na vogasiha iata ma ka susu renira na bêbê ni kare mane iata. Igê na tarana ngekana inê kê hagaitangira igê, hanana ngaira ka tahetara reniê, vi inê ka na Araha.
27“Hoi, igo karena enoni ma, gu hagarongora na Isiraelita renigi na tamasinga iaku. Inê na Araha God kê vi tangara, kê vi: Ikê nga ta na tarana nikâ, na êvarita ka ruhiê igê, suria ga pe toto suriê. 28Inê kê kasira igê na agua, gê bani surua tangara. Matena ga bâsigi na hungani ma na apinige, ga arubebe, ngaira ka vogasi igê na ara ni hungani ngegana ma i ruguhani na ara ni apinige ngegana. Ngaira ka hagamangariê ngavê, suria ngaira ka susu tangara igê na ataro ma ka vogasira igê renia na vaini. 29Inê kê hagatera, kê vi: Na ta kamu tabea râ igê na bea ni panga? Haganega me tenia i ngekana, ka hêtani na agua ngegana vi ‘Bea ni Panga’.
30“Hoi, gu hagarongora na Isiraelita renia na hagatenga iaku tangara. Inê na Araha God kê hagatera vikê: Tanu hega kamu amaka surigi na bagatauhata na êvarimi? Renia ta igamu nogami kani mu hagarapera na harasita? 31Tariha me i ngekê igamu kamu ama ni vogasira nga na ataro, ma kamu ama ni hagaerasigamu nga maremi, suria mu susu renira na karemi tangara. Henaka, ma ki tanu hega, igamu na Isiraelita, kamu hagateê renia vi na obaniha iaku? Inê na Araha God mamauri kê tohe, vi inê kê usitenigamu, vigamu hagateê renia ta na marâ. 32Igamu kamu bani kato ki uhu. Igamu kamu obania, vigamu mangara na enoni igê na agua getigi. Igamu kamu obania, vigamu vogasigi na apinige ma na hê mangara na enoni ngegana. I bara vige manga vikana!”
Na hagaitangiha iana God ma na bonoteniha ni tasi
33Na Araha God ki vi: “Inê na Araha God mamauri kê tohe vikê: Inê kê ramunigamu. Igamu kamu page giraragi na mangariaganiha iaku ma na raramohaku. Vikana inê be hagaotogamu. 34Inê be hagabângenigi tangagamu na mangariaganiha iaku ma na raramohaku. Inê be hakugamu ma be toregamu aporo tenigi na agua hato, ga bani tokorenigamu surigi. 35Inê be bêngenigamu igê na ‘bagamanihe raha iata na ahuroto’. Inê be ranganigamu i ngekana i maami so maremi, ma be surigamu igê. 36Inê be surigamu, manga i nago gê bani surira na êvarimi igê na bagamanihê raha i Sinai. Ngaia kani gê visia, inê na Araha God. 37Inê be tomanigamu, tagenana manga na avanu ni sipi i tomanira na sipi iana renia na vato. 38Igamu kamu arâ i ruguhana na vato iaku, ma be panegenira râ na ani, ga guguruga i berarogami ma ka pe botage reniê. Inê be torera hura tenigi na agua, ga oga igê i ngekê, hanana ge bara tangara, vige page aporo i pasita i Isiraele. Vikana igamu kamu page tahetara reniê, vi inê ka na Araha.
39“Inê na Araha God kê vi tangagamu, kê vi: Isiraelita, hoi, mu râ mu kahu giraragamu ma maremi. Mu râ, kamu vogasira na ataro! Ma be vi tangagamu: I hemuri igamu kamu page têtê viteaku aporo nikâ, ma ki hato iami, vigamu page vogasira nikâ na ataro, se vigamu page erasia nikâ na ataku apuna. 40I ngekana igê na hungana apuna iaku, igê na hungani i Isiraele, igamu hato na Isiraelita, kamu page vogasiê igê. I ngekana inê be aganarigamu igê, ma be naasigamu, vigamu vogasiê igê renigi na votovoto mora iami ma na mahatanga iami, mu tagarenigi tangê. 41I murina gê toregamu hura hato tenigi na agua, ga bani tokorenigamu surigi, ma kê hagahakugamu aporo, inê be aganarigi na vogasiha, mu sungigi tangê, hanana na enoni i na agua getigi ka page tahetara reniê, vi inê ka na God Apuna. 42Matena gê toregamu aporo me tanga i Isiraele, na agua gê bani surua, vigê haganahunira na êvarimi renia, igamu kamu page tahetara reniê, vi inê ka na Araha. 43I ngekana igamu kamu page takusigi aporo igê na bagatarihami hato ma na tasi hato iami, viga hagaerasigamu. Igamu kamu page tangahurigamu ngavê renigi na bagatauhami hato ngegana. 44Na tauhaku ki page hagarahasia na ataku, ma igamu na Isiraelita, kamu page tahetara reniê, vi inê ka na Araha, suria inê kê pe hagaitangigamu meni na bagatarihami, naka ma i araria, vi ve hagaitangigamu renigi na bagaparongami. Ngaia kani gê visia, inê na Araha God.”
Na gi i Juta
45Na Araha ki tamasi tangê, ki vi: 46“Igo, karena enoni ma, gu sira râ i Juta, ga rako igê na vapuni. Gu ranganira ma ku ramonira na enoni i ngekana. 47Gu vi tangara, ke karingagi na tamasinga iaku. Inê na Araha God kê vi vikê: Bâ, inê be tanga na gi, i page ngaugi na apinige hato iami, na ani ga mamêriga ma na ani ga maria. I asa ta na marâ, ge girara, vige hunuia na gi ngekana. Ngaia ki page haganega i Juta, ki tariha i Isiraele. Na enoni hato ka page hatamia na singihana. 48Ngaira hato ka page girarê, vi inê na Araha kani gê tanga na gi ngekana, ma ki asa ta na enoni, vige page hunuia.”
49Ma inê kê vi: “E, Araha God, siana! Na enoni hato ka bani visiê, vi inê kê hagahi tare.”
Currently Selected:
ESEKIELE 20: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
