ESEKIELE 18
18
Na enoni tanga so ngaia marena
1Na Araha ki tamasi tangê, ki vi: 2“Tanu hega igamu na ai ni Isiraele kani mu vivi tare, kamu vi:
‘Na enani kare ka ngêgi na guani
i mahe na vaini
ma ki mangurira na kareta’?
3“Inê na Araha God mamauri, inê kê tohe, vi na tamasinga, i rongo vikana, ka pe rongoa rârâ nikâ i Isiraele. 4Inê nga kê nahunia na mêrihana na ara ni enoni, na enani kare ma na kareta nikâ. Na enoni, i tasitasi, ngaia so marena ki page meme.
5“Takusia ta na enoni, i koro maninga. I koro ma ki oto na parongana. 6Ngaia ki asa, vige vogasira na harasita na Isiraelita, se vige ngaugi na ngêra ni vogasiha igê na ngêsu. Ngaia ki pe rongo era henia na gete iana na mane getea, se vige mauru henia na gete, i tahataha na obana. 7Ngaia ki pe hagaparu ma ki pe hanago. Ngaia ki pe hagamamasiaga ta na enoni. Ngaia ki tagarenia aporo na hetagetageha tangara na enoni, matena ga barubaru aporo na kaone, ga tora tenia. Ngaia ki hagangêra na enoni, ga magê. Ngaia ki vatera na gahu na enoni, ga rupaturi. 8Ngaia ki pe nungigi kê nikâ tani na haga tenira na enoni, ga kaone tenia. Ngaia ki kitenigi na tarani, i pe oto. Ngaia ki hagaotogi maninga na hetamasiana. Ngaia ki marupegi na ramata iaku, ma ki râ surigi na tamasinga iaku. 9Na enoni ngekana ngaia ki koro ma ki oto i maaku, ma ki page tahi. Ngaia kani gê visia, inê na Araha God.
10“Takusia manga vi na enoni ngekana, ma ke apara na kare mane. Ma o karena ngekana ke hanago, ke nahunahu piri, ma ke katogi na tarani, 11na vaemana ki pe katogi rârâ. Ngaia ke ngêgi na ngêra ni vogasiha igê na ngêsu, ma ke rongo era henira na gete iata na mane getera. 12Ngaia ke hagamamasiagara na enoni, ga matareha, ma ke hagabekasira ma ke hanago tenira, ma ke pe tagarenigi aporo na hetagetageha tangara na enoni, matena ga barubaru aporo na kaone, ga tora tenia. Ngaia ke vogasira na ataro. Na vogasiha ni ataro inê kê kitenia ngavê. 13Ngaia ke nungigi kê nikâ tani na haga tenira na enoni, ga kaone tenia. Manga ngekana, ki hega, ngaia ki page mauri vari? I mareha! Na enoni, i erataga vikana, ngaia ki page meme. Na mera ki tanga so ngaia marena.
14“Takusia manga vi o karena ngekana, ma ke apara nogana o karena. Ma ngaia o karena ke bâsigi na bagaparongana hato o vaemana, ma ke pe amake surigi na tauhana. 15Ngaia ke pe vogasira na harasita na Isiraelita, se vige ngaugi na ngêra ni vogasiha igê na ngêsu. Ngaia ki pe rongo era henia na gete iana na mane getea. 16Ngaia ki pe hagamamasiaga ta na enoni, se vige hanago tenia. Ngaia ke tagarenigi aporo na hetagetageha tangara na enoni, matena ga barubaru aporo na kaone, ga tora tenia. Ngaia ke hagangêra hete na enoni, ga magê, ma ke vatera na gahu na ani, ga rupaturi. 17Ngaia ke kitenigi na tarani, ga pe oto, ma ke pe nungigi kê nikâ tani na haga tenira na enoni, ga kaone tenia. Ngaia ke marupegi maninga na ramata iaku ma ke râ surigi na tamasinga iaku. Ngaia ki asa iana, vige page me meni na bagaparongana o vaemana. Vikana ngaia ki page tahitahi hete. 18Ma vaemana ki asa iana, vige tahi, suria i hanago tenira na enoni, ki hagabekasira ma ki hagamamasiagara. Tahema ngaia ki page me meni na bagatauhana ngaia so marena.
19“Ma igamu kamu hagateê, kamu vi: ‘Tanu hega ki pe araria o karena, vige mamasiaga meni na bagatarihana o vaemana?’ Hoi, i manga ikê: O karena ki koro ma ki oto na parongana. Ngaia ki marupegi maninga na ramata iaku, ma ki râ surigi na tamasinga iaku. Tahema ngaia ki page tahi. 20Na ani hete i bagatarihana, kani page meme. O karena ki pe araria, vige mamasiaga meni na bagatarihana o vaemana, ma o vaemana ki pe araria, vige mamasiaga meni na bagatarihana o karena. Na enoni koro ka page vuria renia na mena koro, ma na enoni era ka page vuria renia mena, i era.
21“Manga vi na enoni era, ma ki hato vige tasi, ma ke marupegi na ramata iaku, ma ke katogi na tarani, ga koro ma ka oto, ngaia ki asa iana, vige page me. Ngaia ki page mauri nga hete. 22Inê kê bonotenigi na tasi hato iana, ma ngaia ki page mauri, suria i katogi na tarani, ga oto. 23Inê na Araha be hagategamu: Mu takusia vari, vi inê ki koro na obaku renia na enoni, i meme? Mareha vê! Inê kê obania hete, vi ngaia ki urisi parongana ma ki mauri.
24“Manga vi na enoni koro, ma ke hato, vige katogi na tarani, ga koro, ma ke haganega ke râ surigi na bagatauhata na enoni era. Ki hega, ngaia ki ama ni mauri nga vari? Mareha vê! I asa be takusigi na parongana koro i nago. Ngaia ki page me, suria ngaia ki pe toto suriê, ma ki tasi.
25“Igamu kami vi vari: ‘E, na tarana na Araha God ki katoa, ki pe koro nge!’ Isiraelita, mu karingê. Mu takusia vari, vi na tarani, gê katogi, ka pe oto? Igamu hete kani mu katogi na tarani, ga pe oto! 26Manga na enoni koro, ma ki haganega ki bagatarihana, ma ki katogi na tarani, ga erataga, ma ki me, hoi, ngaia ki meme meni na bagatauhana. 27Manga na enoni era, ma ki kasigi râ na bagaparongana, ma ki katogi na tarani, ga koro ma ka oto, ngaia ki hagatahia na mêrihana. 28Ngaia ki tahetara renigi na bagatauhana ma ki kasigi râ. Vikana ngaia ki asa, vige me, ma ki ama ni mauri nga hete. 29Ma igamu na Isiraelita, kamu vi, vi na tarani, i katogi na Araha God, ka pe oto. Mu takusia vari, vi na tauhaku ka pe oto, iê? Na tauhami igamu hete kani ga pe oto!
30“Tahema inê na Araha God kê vi tangagamu na Isiraelita, vi inê be suria na ara ni hitangimi surigi na parongana ngaia so marena. Mu kasigi râ na bagatauhami hato, hanana siana ki hagaerasigamu na tasi iami. 31Mu urisi parongami ma kamu haganega na mêriha haoru. Isiraelita, tanu hega, igamu kamu obania, vigamu meme? 32Inê kê pe obania, vi ta na enoni ke meme. Ngaia kani gê visia, inê na Araha God. Mu kasigi râ na bagaparongami, hanana mu mauri.”
Currently Selected:
ESEKIELE 18: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
