ESEKIELE 16

Jerusaleme ki pe toto suria God

1Na Araha ki tamasi tangê nikâ, ki vi: 2“Igo, karena enoni ma, gu ranganigi tanga Jerusaleme na bagatarihana so marena. 3Gu hagarongoa renigi na tamasinga iaku. Inê, na Araha God, kê vi vikê: Jerusaleme i pasimu kani Kanana. Igo ko vora i ngekana. O vaemamu ka na Amorita. Kenamu ka na Hitita. 4Matena go vora, ki mareha ta na enoni, vige retea râ na pomu, se vige manuhigo, se vige kutego renia na asi, se vige aruhago renigi na gahu. 5Mareha tani vige marupego. Matena go vora, ngaira hato ka makimaki tenigo, ma ka kasigo hura igê na sinopane i hinua.

6“Ma inê kê ri i ngekana, ma kê bâsigo, go hekêsi igê na gapumu. Igo ko gagapugaga, ma inê kê vi ma vi: I era ma ko me. 7Inê kê katogo, ko mêri koro manga na mahe, i akê bâkoro. Igo ko raha ma ko ramo ma ko vora re na kare viru. Na susumu ka rarapuhaga, ma ki bâkoro na varehumu. Ma igo ko rupaturi.

8“Matena gê ri me nikâ, inê kê bâsigo, go arari ni êragiha. Tahema inê kê torego ma kê hagesurugo renia na tuguni iaku, suria go rupaturi mênga. Inê kê tohe, vigê tototo surigo ma kê naka na suruheri henigo, hanana vigê auragigo. Tahema igo ko vora na aniku. Ngaia kani gê kato vikana, inê na Araha God.

9“Ma hemuri inê kê tananigi râ na gapumu renia na ve, ma kê kutego renia na oile ni olive. 10Inê kê hagesurugo renigi na tuguni, ga turagi igê na marâ, i bâkoro. Inê kê vatego na buti mora, na gahu tanga na bêmu ma na gahu ni aruha harigapi re, i raha na mena. 11Inê kê hagarênigo. Inê kê hagahatogo. Inê kê hagamahego. 12Inê kê vatego na eburungi tanga na barisumu ma na topaga ni karinga, ma na tarepuri bâkoro tanga na raemu. 13Igo ko vagevagesigi na rêni na golo ma na siliva, ma na tuguni, ga turagi igê na marâ, i bâkoro ma ki raha na meni. Igo ko ngaugi tare na ngêra mora ma na pirui ma na oile ni olive. Na bâkorohamu ki rongo raha ngavê, ma ko vora re na gete, i araha. 14I rongo raha na atamu surigi na agua hato i maveta, suria igo ko bâkoro ngavê. Ma inê nga na Araha God kani gê katogo vikana.

15“Ma ku bâ. Igo ki hagamu renigi na bâkorohamu ma na atamu, i rongo raha. Igo ko rongo era henira na ani mavê. 16Igê na agua ni vogasiha ni ataro igo ko vatarangenigi tani na gahu totoperega iamu, hanana go rongo era igê henira na ani mavê, manga na êrâ. Na tauhamu ngekana ki era ngavê. Ga pe bani rongo kuruhana rârâ i nago, ma i hemuri me nikâ. 17Igo ko hagaronogi na rêni na siliva ma na golo, gê bani vatego, ma ko tagarahigi na nunuta na ataro mane renigi, ma ko vogasira. Igo ko maratorana na êrâ. 18Igo ko hagatugunigi na nunuta na ataro ngegana renigi na tuguni bâkoro, gê bani vatego, na tuguni ga turagi igê na marâ, i bâkoro ngavê. Igo ko vogasira renia na oile ni olive, gê bani vatego renia. Igo ko susu tangara renigi na marâ, i sigini koro, gê bani vatego re. 19Inê kê bani vatego na ngauha, na ngêra mora, na oile ni olive ma na pirui, ma igo ko vogasira na ataro renigi, hanana viga korokoro tangago. Nga na parongamu ngekana. Ngaia kani gê visia, inê na Araha God.

20“Me hemuri igo ko vogasira na ataro renira na karemu, mane ma na gete, go bani aparara tangê. Igo ko pe toto suriê. I hega, i pe era ngavê vari? 21Tanu hega kani go vogasira kê nikâ na ataro renira na kareku? 22Igê na mateni go bagaparongamu manga na êrâ, igo ko pe takusia aporo rârâ na matena, go kere kare mêngago, matena go rupaturi ma ko hekêsi igê na gapumu.

23“Jerusaleme, inê na Araha God kê vi tangago, kê vi: E, i era ngavê tangago. I era ngavê! Igo ko bani bagatarihamu vikana, ma i hemuri igo ko ama ni katogi kê nga nikâ tani. 24Igê na ara ni mahera ma igê na ara ni maani na tara hetanga igo ko tagarahigi igê na bea ni vogasiha, vigo vogasira igê na ataro, ma ko maratorana na êrâ. 25Igo ko hagaerasia na bâkorohamu. Igo ko hagamura na ani mavê na enoni, ga riri i pasimu. I asa vigu maki. Igo ko ama ni rongo era nga. 26Igo ko rongo era henira na ai ni Esipito, ga teniha era tare. Suria igo ko matatorana na êrâ, igo ko hagamangariê ngavê.

27“Tahema inê kê merongasigo, kê hagaitangigo, ma kê katora na merongamu, ka ogasia na apanena iamu. Inê kê tagarenigo tangara na ai ni Pilisitia, ga kitenigo ma ka maki renigi na bagatarihamu.

28“Suria igo ko hagatage tangara, tahema igo ko rongo era nikâ henira na ai ni Asiria. Igo ko êrâ iata, ma igo ko hagatage tangara nikâ. 29Tahema igo ko rongo era nikâ henira na ai ni Babilonia, na enoni ga hagavaraha haga. Ma igo ko ama ni hagatage nga.

30“Inê na Araha God kê tamasi vikê: Igo ko maratorana na êrâ, i asa hagetage vige maki. 31Igê na ara ni mahera ma igê na ara ni tara hetanga igo ko tagarahigi igê na bea ni vogasiha, hanana vigo vogasira igê na ataro, ma ko maratorana na êrâ. Ma igo ko pe mangara na ani getera na êrâ, suria igo ko pe vanasigi na haga. 32Igo ko maratorana na gete êragi, i pe toto suria hete na mane iana, ma ki gamogamo ma henira na mane getera. 33Na êrâ ka vuria ngaia hete, ma igo ko vurira bêrâ ma na ani, ga rongo era henigo. 34Igo ko na êrâ go tora getego. I mareha ta na enoni, vige hagamugo, ku rongo era henia. Ngaira ka pe vurigo bême, ma hete ngaira ko vurira bêrâ ma igo. I monari, igo na êrâ go tora getego.”

God ki hagaitangia i Jerusaleme

35Na Araha God ki tamasi, ki vi: 36“Jerusaleme, êrâ, gu karingê! Inê na Araha God kê vi tangago vikê: Igo ko hagaerasigo maremu, suria igo ko pe maki, matena go tasigi râ na gahu iamu, ko rupaturi i maata na ani, go tenira ma ko rongo era henira. Igo ko maratorana na êrâ. Igo ko pe maki, matena go vogasira na ataro, gê kitenira ngavê. Igo ko vogasira renira na karemu so maremu. 37Tahema inê be hakura ngaira hato, go rongo era henira, na ani go obanira ma na ani go pe obanira. Ngaira ka page rêrâ rihigo. Me hemuri be tasigi râ na gahu iamu i maata, ke bâsigo go rupaturi. 38Inê be hagaitangigo, manga hanana ga hagaitangira na gete ga gamogamo, se ga nahunahu enoni. Igê na mangariaganiha ma na hengariana iaku inê be surigo ku me. 39Inê be tagarenigo tangara na raramohata. Ngaira ka page hogegi na agua, go vogasi ataro igê ma ko rongo era igê. Ngaira ka page tasitasigo ma ka page hanagogi nikâ na rêni iamu, ma ka page panigo so, go rupaturi ngavê.

40“Ngaira ka page tugurira rako na enoni, hanana ga page ariha hunigo, ma ka page ninigo renigi na tatapa borahu iata. 41Ngaira ka page sungigi ki makaka na ruma iamu, ma na gete rako ka page bâsigo, matena ga hagaitangigo. Igê na tarana ngekana inê be hatungigo igê tenia vigu êrâ, ma tenia vigu vurira na ani, ga rongo era henigo. 42Vikana ki page hato na mangariaganiha iaku ma na hengariana iaku, ma kê kahu apeape hatara so. I hato ve page mangariaga, se vi ve page hengari nikâ. 43Igo ko bonotenigi na ara ni tarani, gê katogi tangago, inê na Araha God, matena go karekare mêngago. Igo ko hagamangariê ngavê renigi na bagatauhamu. Tahema inê kê hagaitangigo meni. I hega, igo ko pe vogasi ataro vari ma ko pe rongo era nikâ vari? Na tarani ngegana inê kê usitenigi ngavê. Ngaia kani gê visia, inê na Araha God.”

Ka henana garu heusuri

44Na Araha ki vi: “Jerusaleme, na enoni ka page visigo vikê: ‘Ka henana garu heusuri.’ 45Igo ko usuria ngavê kenamu. Ngaia ki usitenia o vaniana ma na karena. Igo ko usurira ka goamu, ga usitenira nogata o vaniata ma na kareta. Kenamu ka na Hitita. O vaemamu ka na Amorita.

46“Keogamu kani Samaria henigi na hinua igê. Kesimu kani Sotome henigi na hinua igê. Igo ko oga i guputerua. 47Igo ko râ surigi na bagatauhaterua, gê kitenigi ngavê. Ma ko hagatage tangagi. I page arihu ma na bagatarihamu ka erataga ngavê teharirerua.

48“Inê nga ka na Araha God mamauri. Inê kê vi: Kesimu Sotome henigi na hinua igê ka mareha ngavê, vige erataga manga igamu, igo ma na hinua iamu. 49Na ta ki era i pasita? Ngaia ma na karena ka paroparo, suria ga aharêsira na ngauha ma ka oga igê na marapeha ma na ramana, ma ngaira ka pe botage renira na enoni matareha ma na ani i bara tangara. 50Ngaira ka paroparo ma ka guguruga, ma ka katogi na tarani, gê kitenigi. Tahema inê kê mutera. Igo ko bani girara.

51“I Samaria ki pe tasi ngavê manga igo. Na bagatauhamu ka erataga ngavê teharigi na anina. I berarogami, ka goamu ma igo, ngaira ka bâ manga ga kere matarotaro, ma igo gitagemu ko erataga ngavê. 52I arari, vige nahuigo hete na makiha. Gu maki nga hete. Na tasi iamu ka erataga ngavê teharigi na anita na goamu, suria i berarogami ngaira ka bâ manga ga kere matarotaro. Gu maki hete.

53“I Sotome me na hinua igê, ma i Samaria ma na hinua igê inê be haganahunira aporo renia na ramana. Ma hemuri Jerusaleme, inê be katogo vikana nogamu. 54Na tarana ngekana ki page hagamakigo igo, ma ki page hagaramonirerua ka goamu Sotome me Samaria henigi na hinua igê. 55Ngaira ka page oga aporo igê na ramana, ma igo nogamu henigi na hinua iamu. 56-57I nago, matena na bagatauhamu ki pinihi mênga, igo ko paro ma ko mamanatenia i Sotome. Hoi, i ngekê ki tarahugo nogamu. Na ai ni Etome me Pilisitia ma na marê getigi rihigo ka mamanatenigo ma ka kitenigo. 58I tuguhigo, vigo kasikasi meni hete na bagatarihamu, ga erataga ngavê. Ngaia kani gê visia, inê na Araha.”

Na suruheri i asa vige page hato

59Na Araha God ki tamasi, ki vi: “Jerusaleme, inê be hagaitangigo meni na bagaparongamu, suria go pe hagamonarigi na suruha iamu, ma ko aharêngia ma na suruheri iaku henigo. 60Ma inê kê pe bonotenia na suruheri iaku henigo, matena go karekare mêngago. Inê be naka na suruheri haoru henigo, na ani i asa vige page hato. 61Igo ko page nahunirerua aporo keogamu ma kesimu. Inê be katorerua, karu manga ka karemu, henaka i pe tuguhiê vikana. Igê na matena ngekana igo ko page takusigi aporo igê na bagaparongamu, ga hagamakigo. 62Matena gê naka na suruheri haoru ngekana henigo, igo ko page tahetara reniê, vi inê ka na Araha. 63Inê be bonotenigi na tasi hato iamu. Ma na matena go takusigi igê, igo ko page maki, vigu tamasigi. Ngaia kani gê visia, inê na Araha.”

Currently Selected:

ESEKIELE 16: KCB

Highlight

Copy

Compare