TAHINGA 30

Na bea ni sungiana na marâ i sigini koro

(Tahinga 37.25-28)

1“Go tagarahia na bea renigi na apinige na akasia tanga ga sungigi igê na marâ i sigini koro. 2Ngaia ki heavore nga na akerena. Na borahusigana ki 50 sentimita, na aberaberagana ki 50 sentimita ma ki bê tagere ki na mita gi tage. Na bugusuni igê na sukuni ge he ka purupuru hakuhaku henia na bea. 3Go buhigi na gerina, na apaneni ge he ma na bugusuni renigi na golo taranina ma ko naka na tarina na golo i rihuia na akerena. 4Go tagarahigi na ringi na golo ge he ni tugiha: gi rua tanga ta apanena ma tanga ta apanena. Go nakagi i ruguhana na tarina na golo tangarerua na apinige ni tugiha. 5Go tagarahirerua na apinige ni tugiha ngegana renia na apinige na akasia ma ko taruhirerua renia na golo. 6Go naka na bea ngekana i na apanena hura na gahu i kuku i maana na bokesi na suruheri. Inê be megohetarahu nga i ngekana. 7I na ara ni mavoraro, matena o Aroni ki râ me ki vatugigi na laiti, ngaia ki sungigi nga igê na marâ i sigini koro. 8I tagenana ma, matena i tangagi na laiti i manurahi. Na sungiana na marâ i sigini koro ki bê ki arâ nga, mareha vige tihia ta na matena. 9Igê na bea ni sungiha ngekana siana ki sungigi igê na marâ sigini koro i apu vige sungigi igê, se vige susu igê na ganiani se na koni se vige karangia igê na vaini ni vogasiha. 10Hagetage togo ma igê na harisi o Aroni ki tuguhia, vi hagamatarotaroa na bea ni sungiha, suria i taruhigi na bugusuni ge he renia na gapu ni vogasiha ni bonoteniha ni tasi. Ngaia ki katokato nga vikana i na ara ni harisi ki bê ki arâ. Na bea ni sungiha ngekana ki apuna teha ngavê, suria ki na aniku inê na Araha.”

Na takesi tanga na ruma na gahu apuna iana na Araha

11Na Araha ki vi tanga o Moise, ki vi: 12“Matena go tomanira na Isiraelita, na ara ni mane ki tuguhia, vi vurivuri pusia tangê na mêrihana, i era ma ki tarahua na bagabevoana igê na matena ni tomaha ni nuni. 13Na ara ni mane i tâ na atana igê na tomaha ni nuni hanana vi vurivuri, ngaia ki vurivuri nga renia na haga, ga bani naka tanga. Na ara ni mane ki tuguhia vi tagarenia nga na takesi ngekana manga na vogasiha tangê inê. 14Na ara ni mane i tâ na atana igê na tomaha ni nuni ma ki tonga na tangahuru gi rua na harisi iana se i asiba, ngaia ki tuguhia nga vi vuria nga na takesi ngekana. 15Na mane i ruruguha ma na mane i matareha karu vurivuri renia na haga i tagenana ma, suria ngaia ki na vuriha pusigi na mêrihata. 16Go tavogi na haga ngegana tenira na Isiraelita ma ko kasikasi renigi na ruma na gahu apuna iaku ma na hagarahenga igê. Na takesi ngekana ki na vuripusiani na mêrihata ma ki hagatakusiê, hanana vigê anumasira”

Na maraguhu ni tananiha

17Na Araha ki vi tanga o Moise, ki vi: 18“Go tagarahia na maraguhu na kapa higa henia na hunana na kapa higa. Go hagâgasia i berarogaterua na ruma na gahu apuna ma na bea ni vogasiha ma ko hagavunusia renia na ve. 19-20O Aroni mo karena ka tanani rima ma uga nga igê ma hemuri ka kahu bêbanu igê na ruma na gahu apuna se ga arâ tanga na bea ni vogasiha tanga ga susu tangê renigi na ngêra, i era ma ka meme. 21Ngaira ka tanani rima ma uga nga, hanana vi siana ka meme. Na ramata ngekana ki tâtâ hagahu nga tangara ngaira ma na raraha iata, ma ki tuguhira viga arâ suria nga.”

Na oile ni moneha

22Na Araha ki vi tanga o Moise, ki vi: 23“Go tavogi na marâ taranina ga sigini koro na vanuhani: na 6 kilo na tavoni na mira, na 3 kilo na sinamone i sigini mamaki, na 3 kilo na kalamusi i sigini mamaki, 24ma na 6 kilo na kasia, manga i visigi na ramata na rotu. Go toregi na marâ ngegana henigi na 5 lita na oile ni olive. 25Vikana igo ko tagarahia na oile ni moneha apuna, manga na enoni i tagarahia na marâ ni moneha ni ape tanga i sigini koro renia. 26Renia na oile ni moneha ngekana go monegi nga na ruma na gahu apuna iaku, na bokesi na suruheri, 27na bea tangagi na bereti henigi na marâ hato tanga, na atohana na iaiti henigi na marâ hato tanga, na bea ni sungiha igê na marâ i sigini koro, 28na bea ni vogasiha tanga ga susu igê henigi na marâ hato tanga, ma na maraguhu ni tananiha henia na hunana. 29Go hagapunarigi nga vikana na marâ ngegana, hanana ga apuna teha ngavê. Na anima na enoni se na marâ i hatarigi, ngaia ki page akeki renia na raramohana na apuhana. 30Hemuri ko monera o Aroni mo karena ma ko hagapunarira ka tagara tangê mangara na mane ni vogasiha. 31Go vi tangara na Isiraelita, ko vivi: ‘Na oile ni moneha apuna ngekê ki tanga nga na hagarahenga tangê ki bê ki arâ. 32Ngaia ki apu vigu karangia i apena na ani mavê na enoni, nga noga ma o Aroni mo karena ma na raraha iata. I apu nikâ, vigu tagarahia vikana na oile ni moneha ngekana tanga vi na ani mavê na marâ. Na oile ni moneha ngekana ki apuna nga ma ko hanetasia nga, suria i apuna. 33Na anima na enoni i tagarahia na oile i manga na ani ngekana se i monea ta na enoni i mareha vige mane ni vogasiha renia, ngaia ki hatohato tenia na hakuta na kariaku.’”

Na marâ i sigini koro tanga ga sungia

34Na Araha ki vi tanga o Moise, ki vi: “Go tavogi ka hearari na aeni na apinige hehegitigi ga sigini koro na vanuhani. Ngaia ka na sitakete, na onika, na kalabanu ma tani nikâ vigana. 35Go torarigi ka voravora re na marâ i sigini koro, manga na enoni i tagarahia na oile ni moneha ni ape i sigini koro. Go taria na asi, hanana i taranina ma ki apuna. 36Go nuinuia ta agua ma ko torea banu i ruma na gahu apuna iaku ma ko kamusigenia i maana na bokesi na suruheri. Go hanetasia nga na marâ ngekana, suria i apuna teha ngavê. 37Siana ko tagarahia vikana na marâ ngekana tangago so maremu ma. Go hanetasia hete, suria i apuna ma ki na aniku. 38Manga ta na enoni ma ki tagarahia tanga vi sigini koro renia na apena marena, ngaia ki hatohato tenia na hakuta na kariaku.”

Currently Selected:

TAHINGA 30: KCB

Highlight

Copy

Compare