TAHINGA 25
25
Na votovoto tanga na ruma na gahu apuna
(Tahinga 35.4-9)
1Na Araha ki vi tanga o Moise, ki vi: 2“Gu vi tangara na Isiraelita, ka mahata tangê. Gu aganarigi na anima na marâ, na enoni ga obanigi, viga vatego renigi. 3Na mahatanga nga ngegana ka na golo, na siliva, na kapa; 4na gahu siki ni Esipito, na gahu maravarava ma rotorotoaga memera ma memera, ga tagarahigi renigi na varehuta na sipi; na gahu ga tagarahigi renigi na varehuta na goti; 5na gavota na sipi mane, ga pupunigi ka memera; na gavota mamao ma manihinihi; na gato na apinige na akasia; 6na oile tangagi na laiti; na marâ i sigini koro tanga ga torarigi henia na oile ni moneha ma na marâ i sigini koro tanga ga sungigi; 7na hê ga raha na meni, na ani memera ma na ani getigi tanga na gahu ni parematona na mane ni vogasiha i teha ma tanga na anga ni girarasiha igê. 8Na enoni ki tuguhira, viga tagarahia na ruma na gahu apuna tangê, hanana gê girara gê gâga i berarogata. 9I tuguhira, viga tagarahia nga henigi na ara ni marâ tanga na rarona suria na katoha, gê page hagabâsigo renia.
Na bokesi na suruheri
(Tahinga 37.1-9)
10“Gu tagarahia na bokesi renia na apinige na akasia. Na borahusigana ki 1 mita ma na 25 sentimita. Na aberaberagana ki 75 sentimita ma na 75 sentimita ki akê. 11Gu taruhia na rarona ma i metara renia na golo tararina ma ko naka na tarina na golo rihuia. 12Gu tagarahigi na ringi ge he na golo tanga na tugiana na bokesi na suruheri ma ko nakagi tonganigi na bêni kê na êgani ge he: na ani gi rua i ta apanena ma i ta apanena. 13Go tagarahirerua na apinige na akasia ni tugiha ma ko taruhirerua renia na golo, 14ma ko suvarenirerua igê na ringi i na apanenaheri na bokesi na suruheri. 15Na apinige ni tugiha karu gâga tonge nga igê na ringi. I apu vige okererua râ. 16I rarona na bokesi na suruheri ko nakarerua nga igê na hê ni ramata gi rua, gê page vatego renirerua.
17“Go tagarahia na bubuhina renia na golo taranina. Na borahusigana ki 1 mita ma na 25 sentimita ma na aberaberagana ki 75 sentimita. 18Go tagarahirerua na nunuterua na angero renia na golo, 19tani i ta bogona ma tani i ta bogona igê na bubuhina. Na bubuhina haku henirerua na angero ka na golo gi tage ma tagenani. 20Na angero karu matomato hetanga ma karu tubêhia na bubuhina ma karu gasigi hetanga na gagahaterua i avorana. 21Go nakarerua nga na hê ni ramata gi rua, gê page vatego renirerua i rarona na bokesi na suruheri ma ku buhia na bokesi renia na bubuhina. 22I ngekana, i avorana na bubuhina, i berarogaterua na angero inê kê page mego hetarahu igê ma kê hagarongogo igê renigi na ramata hato iaku tangara na Isiraelita.
Na bea tangagi na bereti tanga God
(Tahinga 37.10-16)
23“Go tagarahia na bea renigi na apinige na akasia. Na borahusigana ki 1 mita, na aberaberagana ki 50 sentimita ma na 75 sentimita ki akê. 24Go taruhia renia na golo taranina ma ko naka na tarina na golo ki ririhu igê. 25Go naka na tarina na 8 sentimita na golo rihuia na akerena ma tani na tarina na golo nikâ ko naka ki ririhu i murina hura. 26Go tagarahigi na ringi ni tugiha ge he na golo ma ko nakagi tonganigi na sukuni ge he ga oga igê na êgani. 27Na ringi tangarerua na apinige ni tugiana na bea ka gâga nga i ruguhana na tarina i murina hura. 28Go tagarahirerua nga na apinige ni tugiha renigi na apinige na akasia ma ku taruhirerua renia na golo. 29Go tagarahigi na apira, na ani raha ma na ani sisite, na kâkâ ma na pi tanga na vaini ni vogasiha renigi na golo taranini. 30Go naka nga na bea hagarangia na bokesi na suruheri, ma igê na bea ngekana ka tâtâ tarema igê na bereti apuna tangê.
Na atohana na laiti
(Tahinga 37.17-24)
31“Go tagarahia na atohana na laiti renia na golo taranina. Na hunana, na gatana henigi na takani ga ahaketa ma na ani ga pe ahaketa. Ngaigi haku ka na golo gi tage ma tagenani. 32Na arani ge ono ka huhura me tenia na gatana: gi oru i ta apanena ma i ta apanena. 33Na ara ni hitangini ki nahunigi nga na takani gi oru mangagi na gahiga: tani ka ahaketa ma tani ki mareha. 34Na gatana na atohana na laiti ki nahunigi nga na takani ge he ngegana: tani ka ahaketa ma tani ki mareha. 35I ruguhana na ara ni arani ga bê hetanga ki gâga nga igê na takana i pe ahaketa. 36Na hunana, na gatana henigi na arani ma na takani ki na golo gi tage togo ma. 37Go tagarahigi nga na laiti gi pi tanga na atohana na laiti ma ko nakagi igê na arani, hanana ga mave bê me. 38Go tagarahigi na eahi ma na kere apira tanga renia na golo taranina. 39Go tagarahia na atohana na laiti henigi na ara ni marâ hato tanga renigi na 40 kilo na golo taranina. 40Go tagarahigi maninga nga suria na katoha gê bani hagabâsigo renia igê na hungana.
Currently Selected:
TAHINGA 25: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
