TAHINGA 24

God ki naka na suruheri iana henira na Isiraelita

1Na Araha ki vi tanga o Moise, ki vi: “Mu tagere me, igo, o Aroni, o Nataba mo Abihu henira na tangahuru gi pi na enoni raha iata na Isiraelita. Mu rêra tarege vê teniê, ma kamu tubê so, kamu rahesiê. 2Igo getego ma o Moise ko rêra me hagarangiê, mareha vi tani nikâ henigo. Ngaira hato na enoni ki apu tangara, vige tagere me.”

3O Moise ki hagarongora na enoni renigi na tamasinga ma na ramata hato iana na Araha. Na enoni hato ka arami haku, ka vi: “Igami kami girara mi arâ surigi na ara ni tamasinga hato iana na Araha.” 4O Moise ki segegi so na ramata hato iana na Araha. Ki tangi me, o Moise ki rite ma ki tagarahia na panga na bea ni vogasiha igê na hunana na hungana, ma ki hagêrasigi igê na hê tangahuru matarerua tonganigi na varo ninuni tangahuru matarerua iana o Isiraele. 5Ma hemuri ngaia ki kasira na mane na gapu haoru ka susu tanga na Araha, ma ka vogasia renira tani na puruka. 6O Moise ki apea tagua na gaputa na puruka hurigi na apira, ma tagua ki kamusia na panga na bea ni vogasiha renia. 7Ma hemuri ngaia ki tavoa na buka ni suruheri, ga oga igê na ramata iana na Araha, ma ki tomania mave tangara na enoni. Ma hemuri na enoni ka vi: “Igami kami girara mi têtê viteana na Araha ma kami marupegi na ramata iana.”

8O Moise ki kamusira na enoni renigi na gapu igê na apira. Ngaia ki vi: “Ikê ki na gapu i hagagatagatania na suruheri, na Araha ki naka henigamu, matena i nakagi na ramata hato ngegana.”

9O Moise, o Aroni, o Nataba, mo Abihu henira na tangahuru gi pi na enoni raha iata na Isiraelita ka tagere igê na hungana, 10ma ka bâsia na God iata na Isiraelita. Ngaia ki bâ manga i ura igê na hê maravarava, ga maravarava manga na vaveoro. 11God ki mareha vige hagamesira na enoni raha iata na Isiraelita ngegana. Ngaira ka bâsia God ma ka mebêrihu ma ka metono.

O Moise igê na hungana i Sinai

12Na Araha ki vi tanga o Moise, ki vi: “Gu tagere me, ma na matena go gâga ikê, inê kê page vatego na hê aberabera gi rua, gê segegi igê na ramata hato, hanana na enoni ka hagesuringenigi.” 13O Moise mo Josua na kariana karu nanê. Vikana o Moise ki tagere igê na hungana apuna. 14Ngaia ki vi tangara na enoni raha iata na Isiraelita, ki vi: “Mu gâga karigamirua igê na tênga ikê, mataro me kamuru aporo me. O Aroni mo Guru kani garu megamu oga. Matena ga akê me na tarani ga pe oto, mu arâ i pasiterua.”

15O Moise ki tagere igê na hungana i Sinai. Na vaha ki gahuia na hungana. 16-17Na Araha igê na bâbâhana raha ki oga igê na hungana. Tangara na Isiraelita na bâbâhana raha ki bâ manga na gi i tarê igê na hungana. Na vaha ki gahuia na hungana surigi na tangiani ge ono, ma igê na pita na tangiana na Araha i rarona na vaha ki unia me o Moise. 18O Moise ki tagere nga nikâ igê na hungana, ma ki banu igê na vaha. Ngaia ki oga i ngekana surigi na tangiani ma na bungiani tangahuru ge he.

Currently Selected:

TAHINGA 24: KCB

Highlight

Copy

Compare