BUKA NI TAKOHA 12
12
1Vikê matena go karekare mênga, go takusia God i hagavorago, suria i hemuri ka page tarahugo na tangiani ma na harisi ni mamasiaganiha. Ma i ngekana igo ko page vivi: E, inê kê kahu pe vagevagesia nikâ na ogaha iaku. 2Tangago, igê na matena ngekana ki ataraha ma vi na arito, na hageha ma na higu ka pe mave, ma ki rangirangi tare ma. 3Igê na matena ngekana na mane ga anumasia na ruma iamu, ka gêmêa ka tatata. Na mane ni me ramo iamu ka arâ tukutukura. Tani ma na hitangita na gete rakuraku iamu ga hagamako ngêra tare tangago, ka hitahita râ. Na gete iamu ga obania viga borebore hura, ngaira ki guruha na maata. 4Na maa ni ruma iamu tanga râ na mahera ki purupuru. Na mateteha ni hagamako ngêra ki ama ni soso nga. I kere bara vigu rongorongo na manu ga angiangi ma na kua i hagarite ki hagaritego ma ki bara vigu mêru nikâ. I go ko mamakuku tenigi na tagereha ma tenigi na tavo ugana. 5Na bagora ki pe ngê koro tangago. Na ganiani ka tâtâ era i obamu. Na guani na apinige ki asa vige hagakomagago. Igo ko oga ma tanga na kiru. Na enoni ka nanê, viga angiangi maramara renigo.
6Na seni na siliva ka mumuagani. Na laiti na golo ki votavota ki akama. Na varo tanga ga titi ve igê na ve karu i soso ngavê, ma na pi ni ve ki mumu ki abotabota. 7Na apemu ki voravora aporo renia na mako ma na rogaroga ni mêriha iamu ki aporo tanga God i haganahunigo renia.
Hagatarobêgi
8Na mane ni takoha mataha ki vi: Hagâbo! Hagâbo! Na ara ni marâ ka oga hagâbo ma. 9Ma suria ngaia ki na mane ni takoha mataha, tahema ngaia ki ama ni hagesurira nga na enoni renigi na marâ i aitangisigi. Ngaia ki hagesuringenigi na maramarêrava ma ki garigi na monariha igê. 10Ngaia ki uhungia vi tarahugi na maramarêrava, ga monari ma ka hagagatagatanira na enoni.
11Na tamasinga iata na enoni ni takoha mataha ka mangagi na maata na mane ga bâsuri sipi ga masi hanana ga hagaotora na sipi iata renigi. Na maramarêrava iata ka tâtâ igê na mangatamu mangagi na nila ga rapusigi gatagata. Ngaigi ka na mahatanga iana God tangagia. God ngaia getea ma kani hagaotogia manga vi igia ka na sipi iana.
12Goaku, go hinarua ta na marâ. Na enoni ka ama ni segegi nga na buka ma siana ko hagame apemu vigu tomanigi ngaigi hato.
13Na hagahatongina na tamasinga iaku ka na hagaotonga tangago. Go hagahigasia nga God ma ko têtê viteana, suria tahema ngaia ki hagavorago tanga. 14God ki page surigo surigi na ara ni tauhamu, na ani koro ma na ani era ma na ani ga pinihi.
Currently Selected:
BUKA NI TAKOHA 12: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
