AMOSE 9
9
Na rimata na maruteha: na suriha
1Inê kê bâsia na Araha,
i ura hagarangia na bea ni vogasiha.
Ngaia ki tamasi, ki vi:
“Mu vangigi na gogohane
igê na u ni hê na Ruma ni Rotu,
hanana i gisigisi na ruma hagenani.
Mu hogegi hurira na enoni, ga hagarahe igê.
Na ani, ga gava ka tahitahi,
inê be hagamesira igê na henahuita.
I asa hagetage ta na enoni, vige ahi teniê.
2Naka ma vige so igê na agua iata na enoni, ga me,
inê be tahurara akê me tenia.
Naka ma vige akê i haha i vavearo,
inê be tahusigenira vato.
3Naka ma vige ahiahi igê na barana i Karamele,
inê be garira ma be torera.
Naka ma vige ahi teniê igê na rutuni i asi,
inê be bonasia na ega raha, ke garahunira.
4Naka vi na merongata ma ke henahuraura,
inê be bonasira na enoni getera, ke nahu hunuira.
Inê kê obania nga, vigê erasira ngavê,
mareha ve tamanira.”
5Na Araha God raramohaga hunia ki hataria na maveta.
Na maveta ki gisigisi, ma na enoni hato igê ka angiangi maramara.
Na maveta hagenani ki arubobo manga na ve i Nile.
6Na Araha ki naka i pasina, i avorana na vavearo.
Ma ngaia ki naka na vavearo ki buhia na maveta.
Ngaia ki katoa na ruarua ki anuia na maveta.
Na Araha nga ki katogi vigana.
7Na Araha, ki vi:
“Isiraelita, tangê inê,
mu takusia vari, mu pe mangara na ai ni Etiopia?
Monari, inê kê toregamu hura tenia i Esipito.
I hega, inê kê pe torera hura vari
na ai ni Pilisitia tenia i Kerete?
I hega, inê kê pe torera hura vari
na ai ni Siria tenia i Kire?
8Inê nga na Araha God
kê hahutugira na ai ni Isiraele,
ga tasi tare ngavê.
Inê be mutera,
ma ki mareha vi be mutera
ngaira hato na raraha iana o Jakobo.
9“Bâ, matena gê bani tokorenira na Isiraelita
i pasita na enoni ga pe Siu,
inê kê bonasira na merongata, ka hiora,
manga na enoni i rusia na suru.
Inê be hiora,
hanana ga gâga getera ma
na ani koro tenira na ani era.
10Na kariaku, ga erataga,
ka page me igê na henahuita,
ma ka page me nogata na ani, ga vivi:
‘God ki asa, vige hagamarumungenigi
na bagabevoani, ke tarahugia.’”
God ki page hagakorora aporo na Isiraelita
11Na Araha ki vi:
“I ta na matena inê be hagakoroa aporo
na arahanga iata na Isiraelita,
ki nganganihaga aporo
manga na matena iana o Tavite,
suria na arahanga ngekê
ki manga na ruma i ahoge.
Inê be surungia ma be torea aporo
ke bâ manga i nago.
12Vikê na Isiraelita ka page taua aporo na mako,
na ai ni Etome ka bani parênia tenira.
Ngaira ka page marungigi na agua getegi nikâ,
gê bani visigi vi na aniku.
Ngaia kani gê visia,
inê na Araha gê page katogi.”
13Na Araha ki vi:
“Bâ, i na bevoana i muri me
na mako ki page korokoro ngavê.
Na mu hato ka page akê garigari ngavê.
Mareha vige kasikasi bevoa
na hasinga ma na hutohutoêa.
Na pariki ni vaini ka rasirasi hesurisuri.
Na tavoni na vaini ka tatata berabera
igê na barani ma na hungani.
14Inê be torera aporo na kariaku
tanga i pasita mareta.
Ngaira ka page tagarahigi aporo na hiru iata
ma ka page gâga igê.
Ngaira ka page hasihasi na pariki ni vaini,
ma ka page tonomigi na tavoni na vaini.
Ngaira ka page tagarahigi na mu
ma ka page ngêngê igê.
15Inê be hasira na kariaku
igê na agua, gê bani vatera,
ma ki asa, vige page ragera nikâ.
Ngaia kani gê visia,
inê na Araha God iami.”
Currently Selected:
AMOSE 9: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
