AMOSE 8
8
Na heta na maruteha: na guani na marâ i mata igê na heni
1Na Araha God ki hagamaruteê nikâ. Inê kê bâsia na heni, i vunu renigi na guani na marâ i mata. 2Na Araha ki hagateê, ki vi: “Amose, na ta ko bâsia?” Inê kê arami, kê vi: “Na guani na marâ i mata igê na heni.”
Na Araha ki vi tangê, ki vi: “Na kariaku, na Isiraelita, ka sugi mamata. I ngekê ki asa vê, be urusia nikâ na katoha iaku. Inê be hagaitangira nga. 3Igê na tangiana ngekana na ki ni vagevageha, ga kirigi i ruma, ka page vora re na angiha maramara. Na gahuata ka page tâ tokora. Ki page mamangu raha. Ngaia kani gê visia, inê na Araha God.”
God ki page hagaitangira na Isiraelita
4Mu karinga, igamu na enoni,
mu purira so i ano na enoni, i bara tangara,
ma kamu obania, vigamu hagaerasira na enoni matareha.
5Igamu kamu vi: “E, keta ki hatohato igê
na tangiani ni sukuruha,
hanana ge hagavuri hete na ngêra iaka?
I na keta ki hatohato igê
na Tangiana ni Mamaroha,
hanana ge hagavuri na marâ iaka?
Hoi, ma ke kahu hagateharenigi na meni, ke akê,
ke hagabekasira na enoni renigi na higahigata
ma ke ravarava haga tenira.
6Ke hagateharenigi na meni na momogani na ngêra.
Ke hagavuringenira na enoni matareha,
ke vora na kare vurivuri,
suria i bara, ge barugi na hagaba iata tenigia,
naka ma na hagaba manga na kere mena na santele.”
7Na Araha God, na Isiraelita ka agegage renia,
i bani tohe, ki vi:
“I asa ngavê, be page bonotenigi na bagaparongata ngegana.
8Tahema na maveta ki page nunu.
Na enoni hato i maveta ka page anumanuma ngavê.
Na agua hagenani ki page gisigisi,
ma ki page arubobo manga na ve i Nile.
Ngaia kani gê visia, inê na Araha God.
9“Igê na matena ni hagaitangiha ngekana
inê be hagarotohia na arito igê na ritovagana,
ma na maveta ki rotoroto igê na tangiana.
10Inê be katogi na tangiani raha ni vagevageha iami,
ke vora na tangiani ni bagiha ni nuni.
Na ki ni vagevageha iami
ke vora re na angiha maramara.
Inê be katogamu kamu gorogoro bê huri,
ma kamu gahugahu tatari,
suria mu angi maramara
mangarerua na arua garu angisia
o kare i tage iaterua, i me.
Na hatongini na marâ hato
ka page era ngavê.
11“Igê na matena ni hagaitangiha ngekana
inê be katoa na magêha raha igê na agua.
Na enoni ka page magê ngavê,
ma ka pe magêsigi na ngêra.
Ngaira ki page mamata na riota,
ma mareha vi renia na ve.
Ngaira ka page magêsigi na tamasinga iaku,
ma ka page mamata na riota renigi.
Ngaia kani gê visia, inê na Araha God.
12“Na enoni ka page arârâ
tenia i tapanena tanga tapanena
ma tenia i ta bogona tanga i ta bogona.
Ngaira ka page garigi na tamasinga iaku
igê na ara ni agua hato,
ma ki asa iata, vige tarahugi.
13Igê na matena ni hagaitangiha ngekana
naka na gapu haoru, na mane ma na gete,
ngaira ka page me,
suria i mamata na riota.
14Na ani ga hagarapera na ataro i Samaria,
se ga avarasia na ataro o Tana,
se na ataro i Bereseba,
ngaira hato ka page vota ka meme.”
Currently Selected:
AMOSE 8: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
