AMOSE 6
6
Na hagaitangiha tangara na Isiraelita ga hagarahasira mareta
1Igamu na maneraha i berarogata na Isiraelita,
na enoni purua ka avarasigamu tare.
Naka ma i mataku ma tangagamu na ogaha iami i Sione,
naka ma mu ape tatara i Samaria,
ma ki page era ngavê tangagamu.
2Igamu kamu vi,
“Mu râ i Kalene ma kamu bâ igê.
Ma hemuri kamu arâ i hinua raha i Hamati
ma kamu arâ i Gata i Pilisitia.
Hoi, na ogaha iata vari ki koro teharia na anika?
Na apanena iata vari ki raha teharia na anika?’
3Naka ma igamu kamu obania, vigamu hagatêria
na tangiana ni mamasiaganiha ngekana,
na ara ni marâ hato, mu katogi, ka okea hete,
ki hagarangi me na tangiana ni hagaitangiha.
I page era ngavê tangagamu!
4Igamu kamu gâga ma igê na bea reoreoga iami,
ma kamu ngêngê ma na hasigota
na karena puruka binibinikaga ma na sipi.
I page era ngavê tangagamu!
5Igamu kamu barobaro ki ma henigi na gita.
Mu vi vari mu manga o Tavite?
6Igamu kamu totono ma na vaini,
na apira ma na apira.
Igamu kamu monegamu maremi ma
renigi na marâ, ga sigini koro ngavê,
ma kamu pe ape ruruhi hete renia na hagaitangiha,
i sugi tarahugamu, Isiraelita.
7Tahema igamu ka na ani ga page henahuraugamu hagenago.
Ma na magotoha ma na vagevageha iami
ka page hato ngavê.”
8Na Araha God raramohaga hunia ki tohe, ki vi:
“Inê kê kitenia ngavê na paroparoha iata na Isiraelita.
Inê kê usitenigi na ruma raha ma nganganihaga iata.
Inê be hagamarumungenira na merongata,
ke henahuraua na hinua raha iata i Samaria
henigi na ara ni marâ hato igê.”
9Manga na tangahuri nuni, ga tahitahi mêngara, ma ka rukuruku igê ta na ruma, ngaira hato ka page me. 10Manga ta na enoni, ma ki bêbanu vê i ruma, hanana vi torea na gahuana na goana, ki vi bagia, ngaia ki page hagatea na enoni, i goga igê na ruguna roto i ruma. Ki vivi, “Igo getego ma ngekana?” Ma na enoni ngekana, i arami, ki vivi, “Mareha.” Ma ngaia i maani ruma ki page suia banu, ki vi, “Manapu! Manapu! Siana ko visia na atana na Araha. I era ma ki rongorerua.”
11Bâ, manga na Araha, ma ki tamasi ma,
na ara ni ruma hato,
na ani raha ma na ani sisite,
ka page ahogehoge ma ka aruhuruhu.
12I hega, na hosi ka girara vari
ga tangotango igê na maniverake?
I hega, na enoni ki girara vari
i hikiru igê na tagaru?
Naka ma, ma igamu kamu bani urusigi
na koroha ma na otoha renigi na marâ era,
mu hagamesira na enoni renigi.
13Igamu kamu parunigamu renia mu henahuraua na kere hinua i Lotebare. Igamu kamu tamasi paroparo, kamu vi, “Igami maremami kami ramo teharia na hinua i Karanaimi!” 14Bâ, na Araha God raramohaga hunia ki vi, “Isiraelita, inê be hagamarumungenira na merongami, ke hagamamasiaga apemi, ma ke parênia na apanena iami tenia i ta bogona tanga i ta bogona.”
Currently Selected:
AMOSE 6: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
