AMOSE 5
5
Urisi parongami
1Isiraelita, mu karingê!
Inê be kiria na ki ni angiha maramara renigamu.
2Isiraele, kareku,
kare viru iaku,
ga nahuigo, ko me.
I asa gu tahi nikâ.
Go tâ hagetage
suri parongamu i ano.
Ka pe botage renigo.
3Suria na Araha God ki vi:
“I Isiraele ka page manga ikê:
Ta na hinua ki kasira na rehagaro na mane ni me
tanga na hearihatana,
ma na tangarê gi tage ma
ka page tahitahi ka aporo.
Ta na hinua ki kasira na tangarê gi tage na mane ni me,
ma na tangahuru gi tage ma
ka page tahitahi ka aporo.”
4Na Araha ki vi vikê nikâ tangara na Isiraelita:
“Mu tari suriê aporo,
hanana mu tahitahi.
5Siana mu hagarahe i Betele.
Siana mu avaravara i Gilegale.
Siana mu gahe tara suria Beresiba.
Gilegale ka page henahuraura.
Betele ki page magahuru ngavê.”
6Mu tototo suria na Araha,
hanana mu tahitahi.
Manga i mareha, Isiraelita,
ngaia ki page mangariaga ngavê tangagamu,
manga na anguruna na gi.
Na gi ngekê ki page ngaura i Betele,
ma ki bara, vige hunuia.
7Ki page era ngavê tangagamu,
suria mu pe botage renia na otoha
ma kamu heherigagi na ramata.
8Na Araha ki hagavoragi na higu,
ma na ara ni marara ve i vavearo
na rogaroga ahuru ma na hutohutoêa.
Ngaia ki urusia na roto renia na mavetana
ma na tangiana renia na bungiana.
Ngaia ki katoa na ruarua
ki anuia na maveta.
Ngaia nga na Araha ki katogi vigana.
9Ngaia ki kasira so na enoni raha
ma ki hogegi na ruma nganganihaga iata.
10Igamu kamu ruhira na enoni,
ga gunahia na otoha igê na kotiha,
ma kamu kitenira na enoni,
ga tamasi igê na monariha.
11Igamu kamu hagamamasiagara na enoni matareha,
ma kamu hanagogi tenira na ngêra iata.
Tahema, naka ma igamu kamu toregi na ruma bâkoro na hê,
i asa, vigamu oga igê.
Naka ma igamu kami hasigi na pariki ni vaini,
i asa, vigamu tono na guani na vaini igê.
12Inê kê bani girara, ga era ngavê
na bagatarihami ma na bagaparongami.
Igamu kamu merongasira na enoni koro.
Igamu kamu vatevate,
ma igê na kotiha
igamu kamu pe vatea na enoni matareha
na marâ vige oto tanga.
13Igê na mateni ni bagabevoani manga ngegê
na enoni, ga takotako mataha, ka marape ma!
14Mu gunahia na koroha,
ma siana kamu tenia na eraha,
hanana mu tahitahi.
Ma na Araha God raramohaga hunia
ki page ngahisigamu maninga
manga mu visia i ngekê.
15Mu kitenia na eraha,
ma kamu barigia na koroha,
ma kamu katoa na otoha,
ki akê me aporo igê na kotiha.
Na Araha ki page takuira vari
na hitangita na Isiraelita,
na ani ga page tahitahi mêngara.
16Vikê na Araha God raramohaga hunia ki vi:
“I na ara ni mahera ni hinua ma i tara
na enoni ka page angiangi maramara igê.
Ga page unira me na enoni matareha,
ga tagara i mu,
hanana ga angiangi maramara
henira na ani ni angiha.
17Na enoni igê na ara ni pariki ni vaini
ka pe obakoro,
ma ka angiangi maramara ma hete.
Na tarani hato ngegê ka page vora me,
matena gê arâ me, kê hagaitangigamu.
Ngaia kani gê visia, inê na Araha.”
Na Isiraelita ka rotu hagaparu
18Na tangiana, mu naasia na Araha
vi arâ me igê,
ki page era ngavê tangagamu.
Na ta ki page koro tangagamu
renia na tangiana ngekana?
Ngaia ki na tangiana ni mamasiaganiha,
mareha vi tanga na vagevageha.
19Ngaia ki manga na mane i gava tenia na laione
ma ki me torahe tanga ma na hua,
se i manga na mane i ahiahi i ruma iana.
Ngaia ki oga so igê na bea,
ma na ma ki garea.
20Na tangiana, i page arâ me igê na Araha,
ki na tangiana ni rotoha ma ni mamasiaganiha,
ni bagabevoani ma ni hataerana.
21Na Araha ki vi:
“Inê kê kitenigi na tangiani raha,
mu hagarahe igê.
I mâmâga na obaku renigi.
Inê kê usitenigi hagetage.
22Naka ma mu susu tangê,
se kamu vogasiê renigi na ngêra,
i asa hagetage ve aganarigi.
Naka ma mu vogasiê renigi na puruka se na sipi,
mu bani hagabigara,
i asa hagetage be botage renigi.
23Siana kamu hagabono obaku renigi na kiha.
Inê kê pe pasi karingagi na gita iami.
24Mu katogi na koroha ma na otoha
ka tehateha hete,
mangagi na ve oto,
i asa vige page mamata.
25“Isiraelita, surigi na tangahuru harisi ge he,
matena gê bêngenigamu igê na bagamasusu raha,
ki hega, igamu kamu vogasiê vari
renigi na ngêra ma na ganiani?
26I na matena ngekana igamu kamu merâ vari
na nununa o Sakuti, na ataro raha iami?
Se na nununa vari na higu Kaivane, na ataro iami?
Se na nunuta vari na ataro getera iami, mu tahegi?
27Ma suria mu hagarapera i ngekê,
tahema inê be hagamarumungenira na merongami,
ke henahuraugamu tanga i Tamasiko ma kere râ,
ma igamu kamu page migirâ na nunuta na ataro iami.
Ngaia kani gê visia, inê na Araha God raramohaga huniê.”
Currently Selected:
AMOSE 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
