2 MAKABEO 5
5
O Jasone ki taharia i Jerusaleme
1Igê na matena ngekana na heta o Antioko ki taharia i Esipito na ruata na matena. 2I sugia ma na tangiani tangahuru ge he na enoni suria i Jerusaleme ka bâsira na mane ni me igê na hosi ga vora me i vavearo. Ngaira ka tuguni renigi na gahu ga turagi igê na golo ma ka tango ka ri i vavearo. Ngaira ka tangaru renigi na ora ma na tatapa borahu. 3Ngaira ka ura harahara hetanga, ka heheuri ka tahariraheri, na bêata ka hetagitagi, na ora ma na mage ka gaha ka buhiraheri. Na golo igê na tuguni iata na mane ni me ma igê na hosi ka togatoga renia na arito. 4Na enoni hato i hinua ka nunginungi, hanana vi na tarani ngegana ke tonga na girarani na tarani koro ga page akê me.
5Matena i rongo raha na hagaparuana renia o Antioko vi me, o Jasone ki hagahakura na rehagaro ma ki asiba na mane ni me ma ki taharia hagakangia i Jerusaleme. Ngaira ka taharira na me igê na para ni hinua ma ka henahuraua na hinua. O Menelao ki gava ki ruku igê na ruma na para nganganihaga hagarangia na hungana na ruma ni rotu. 6O Jasone ma na me iana ka tako hagetage ka mutera na Siu na goata. O Jasone ki pe takusia, vi na tehariana na enoni i apena ki na votaha ngavê tanga. Ngaia ki takusia ma hete, vi na tehariana ngekana ki na tehariana i merongana, mareha vi na votaha renira na enoni i apena. 7O Jasone ki bara tanga vige têa na gavumane. Na katoha iana ki vota hete. Ngaia ki gava nikâ tanga i Amone. Na katoha era ngekana ki hagamakia ngavê. Na makiha ki nahuia ngavê mataro me ki me. 8O Aretasi na maneraha iata na ai ni Arabia ki kasia i ruma ni hagaitangiha. Ma o Jasone ki gavatenia na ruma ni hagaitangiha. Na enoni hato ka kitenia, suria i aharê igê na ramata ma ki merongasia ngavê na apanena iana marena ma ki mutera na enoni i apena. Ngaia ki gava i Esipito. 9Hemuri ngaia ki gava tanga i Gris, suria i hagêguri vi asitatara i pasita na ai ni Saparata na enoni i apeta na Siu. Ki rârâ ma na mane ngekana, i bani tarigenira hura rako na enoni getera tenia i pasita tanga na apanena iata na mahuara, ngaia ki me nogana igê na apanena iata na mahuara. 10O Jasone ki bani mutera rako na enoni ma ki pe bagigi na gahuata. Ma ke bâ, ki mareha rârâ ta na enoni vige angi maramara renia, matena i me, se vi igê na matahuta na êvarina. I mareha ngavê na anoanona.
O Antioko ki taharia i Jerusaleme
(1 Makabeo 1.20-63)
11Matena o Antioko ki rongoa na tarana i akê me i Jerusaleme, ngaia ki takusia ma, vi i Jutea hagenani kani merongasia. Ngaia ki mangariaga ngavê manga na marâ vasiga i hagamakuku. Ngaia ki tavoraha tenia i Esipito ma ki henahuraua i Jerusaleme. 12Ngaia ki bonasira na mane ni me iana, ka tako hagetage ka mutera na enoni hato ga tarahura i tara ma na ani ga rukuruku i ruma iata. 13Ngaira ka mutera ngaira hato, na mane ma na gete, na kere mane ma na kere gete ma na kare gari nikâ. 14Surigi na tangiani gi oru ka magahuru 80.000 na enoni tenia i Jerusaleme: 40.000 ka mute, ma tani na 40.000 ka henahuraura vê, ka hagavuringenira ka vora re na kare vurivuri.
15Henaka, ma o Antioko ki hagatage mênga. Ngaia ki banu i ruma ni rotu i apuna ngavê i maveta hagenani. O Menelao, i bani kasia na rotu ma ki merongasia na apanena iana, kani hagaotoa. 16O Antioko ki tavogi na marâ apuna tanga na hagarahenga renirerua na rimana garu pe apuna. Na rimana garu pe apuna karu hanagogi na votovoto na maneraha getera ga mahatangenigi tanga na ruma ni rotu, hanana ga hagabâkoroa kê nga na ruma apuna, ki rongo raha kê nga na atana. 17O Antioko ki akê na ageagena renigi na tarani ngegana, suria i pe girara, vi na Araha kani naka ki hagaerasia na ruma ni rotu apuna, suria na bagatauhata na ai ni Jerusaleme kaniga hagamangaria râ noga. 18Manga vi na ai ni Jerusaleme ma ka pe bagaparongata ngavê, hoi, God ke hagaitangia ototo râ nga o Antioko ma ke urabarasia, siana ke katoa na bekabekaganiha ngekana. Na ramusiha ke tarahua nogana manga o Heliotoro, na maneraha o Seluku ki hagatorangenia, hanana vi bâbâ i rarona na kiboru ni ruruguha. 19Na Araha ki pe atera na kariana tanga na ruma ni rotu iana, ma ki atea hete na ruma ni rotu iana tangara na kariana. 20Tahema na bagabevoani ga tarahura na enoni, ki page tarahua nikâ na ruma ni rotu. Na Araha ki rumakaka renia na ruma ni rotu, suria i mangariaga, ma na matena i hatohato na mangariaganiha iana, ngaia ki page tagarahia bâkoro aporo.
21O Antioko ki hanagogi na 54.000 kilo na siliva tenia na ruma ni rotu ma ki migiasihura tanga i Antioko. Suria na paroparoha ki aharêsia ngavê, tahema ngaia ki takusia, vi ngaia ki girara ma i katogi na haka i asi ka arâ mamata i bemu, se vi katora na me ka tavotavo uga i basina na asi. 22I nago tarana i aporo, ngaia ki kasira na gavumane i Jutea, hanana ga hagamamasiagara na enoni. Ngaia ki naka i Jerusaleme o Pilipo ni Pirigia, i erataga ngavê teharia o Antioko. 23Ngaia ki kasia o Antoroniko i hungana i Girisimi. Ma na mane i erataga teharirerua ka no Menelao, i merongasira na Siu teharira na ani getera na gavumane. O Antioko ki kitenira ngavê na Siu. 24Tahema ngaia ki hagatorangenia tanga i Jerusaleme o Apolonio henira na 22.000 na mane ni me ni Misia i vatevatera. Ngaia ki bonasira, hanana ga mutera na mane hato i hinua ma ka hagavuringenira na gete ma na kere mane, ka voravora re na kare vurivuri. 25O Apolonio ki ata i Jerusaleme ma ki hagabeka, vi ngaia ki râ me igê na marapeha. Ngaia ki ogakaria na tangiana ni mamaroha. Matena na Siu hato ka hagahigasia na tangiana ni mamaroha, ngaia ki bonasira na mane ni me hato iana, ka migiura harahara na tangaruha iata i metara na hinua. 26Ki parama ma ki bonasira na mane ni me iana, ka mutera hato na ani ga hura me ka bâsira. Ngaira ka guguhia na hinua ma ka nahuira ka me rako ngavê na enoni.
27O Juta Makabeo henira na mane gi siva ka gava tanga na bagamasusu raha ma ka oga igê na hungani igê mangara na marâ vasiga i bemu. Ngaira ka ngaugi ma na rauga, hanana ga ama ni matarotaro nga surigi na ramata igê na rotu.
Currently Selected:
2 MAKABEO 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific