2 MAKABEO 4
4
O Jasone ki haganega ki hagaerasia na rotu
1Manga gê bani visia, o Simone ki hagarongoa o Apolonio renigi na ruruguha ma ki hagarateta na Siu. Hoi, ngaia ki hagatoraia nikâ o Oniasi. Ngaia ki vi, vi o Oniasi nga kani taharia o Heliotoro ma ki rapasia. 2Ngaia ki torahuria o Oniasi, vi ngaia kani harikato renia na gavumane henaka o Oniasi ki mahata ngavê tanga i Jerusaleme, ki anumasira na Siu ma ki kanukanura na enoni tangagi na ramata. 3Ma o Simone ki merongasia ngavê o Oniasi. Tahema ta na kariana o Simone ki mutera tani na enoni. 4Vikana o Oniasi ki tahetara vi na perenga ki oga, suria o Apolonio karena o Menesiteo, i bâsurirerua i Selesiria ma i Punisia, ki pane henia o Simone ma ki kanukanua igê na bagatauhana. 5Tahema o Oniasi ki râ ki bâsia na maneraha, mareha vige hagagege renira na tamana na Siu ma ki tako renigi hete na ogaha iata hegitigi ma iata ngaira hato. 6Ngaia ki girara, vi, manga na maneraha ma ki pe tamania, na marapeha ki bara vige akê me igê na agua ma o Simone ki asa vige rumakaka renigi na bekabekaganiha iana.
7I murina i me na maneraha o Seluku, o Antioko, ga hagavoravora atana vi o Epipanese, ki maneraha urusia. O Jasone ki vora re mane ni vogasiha i teha urusia o Oniasi o veogana surigi na hagabekasiha. 8Ngaia ki râ ki bâsia na maneraha ma ki vatea renigi na 10.800 kilo na siliva ma ki suru tanga, vi page vatea renigi na 2400 kilo i hemuri. 9O Jasone ki suru nikâ, vi page vatea akê nikâ renigi na 4500 kilo na siliva, manga vi ngaia ma ki hagamarumungenia, ki tagarahia na ruma ni hagesuringa tangara na mane haoru ga hagesuringenia igê na hearihatana, na hagaramoniha ni ape ma na tauha iata na ai mahuara ma ki katora na ai ni Jerusaleme ka voravora re na ai ni Antioko.
10Na maneraha ki aganaria vikana. Pusina ma o Jasone ki têa na âgâga iana na mane ni vogasiha i teha, ngaia ki haganega ki tugurira na ai ni Jerusaleme ka râ surigi na ogaha iata na ai ni Gris. 11Ngaia ki kasigi râ na tarani na maneraha i Siria i bani hagamarumungenigi i nago tangara na Siu, o Joane ki gunahigi tangara. O Joane ki no vaemana o Upolemo, i râ hemuri i Roma, hanana i naka na suruheri ni panepaneha ma ni hekomaniha henia. O Jasone ki hagamagahurugi nikâ na tauha iata na Siu ma ki urusigi renigi na tauha haoru, ga urapusigi na ramata iana o Moise. 12Ngaia ki age ki tagarahia na ruma ni hagesuringa ngekana i gunitara na hungana na ruma ni rotu ma ki hagesurira na mane haoru, ga arari ngavê, ka râ surigi na tauha iata na ai ni Gris ma ka nakagi i bêta na esara ni ataro ni anumasiha iata. 13Suria o Jasone ka na eragani nuni, i asa vige maki, ki pe botage renia God ma ki mareha vi na morana na mane ni vogasiha i teha, tahema na teniha ni ogaha iata na ai ni Gris ma ni tauha ni mahuara ki akê me raha ngavê. 14Na teniha ngekana ki tarahura nogata na mane ni vogasiha ma ni hagarahenga. Tahema ngaira ka hagêrahu vige hagarotu. Ngaira ka marusi vige hagarotu ma ka nakagi râ na vogasiha. Matena i angiangi na belo, ngaira ka tangotango ototo râ nga ka kutera na mane haoru tange na henguringuriana ma na herupurupuana ma na marâ vigana, na ramata iana o Moise ga manimanigi. 15Ngaira ka kitenigi na tagaraha, ga raha igê na aitangihata na êvarita ma ka gunahigi ma na tarani ga raha igê na aitangihata na ai ni Gris. 16Suria vikana, tahema na bagabevoani ka tarahura suria na enoni nga kaniga uhungia viga amake surigi na tauha iata ma viga maratorata, ngaira kaniga haganega ka merongasira ma ka hagamamasiagara. 17Na aharêngiani na ramata iana God ki hagamamakuku ngavê. Na tarani ga akê me ka page hagamonaria.
18Igê na matena na pileha i akê me tare igê na ara ni rimata na harisi i hinua i Taire i maana na maneraha, 19na eragani nuni o Jasone ki hagatorangenira râ tani na mane tenia i Jerusaleme, ga bani vora re na ai ni Antioko, hanana ga toregi i Taire na 9000 kilo na siliva tanga ga vuria re na vogasiha tanga o Herekulo na ataro. Ma na mane ngegana ka takusia, vi i pe koro vige vuria na vogasiha renigi na haga raha vikana. 20Tahema ngaira ka pe kasigi na haga ngegana renia na vogasiha tanga o Herekulo na ataro, ma ka kasi hete tanga na tagarahiana na haka ni hearihatana.
O Menelao ki panea râ o Jasone
21Matena o Pilometore ki vora re na maneraha i Esipito, o Apolonio karena o Menesiteo ki oga i ngekana urusia na maneraha iana o Antioko. Hoi, o Apolonio ki hagarongoa o Antioko, vi o Pilometore ki merongasia o Antioko. Ngekana o Antioko ki tako bâraha, vi i era ma ki hato tenia vi maneraha. Hanana i hagagatagatania kê nikâ na arahanga iana, tahema ngaia ki râ i Jopa ma ki râ nga tanga i Jerusaleme. 22I ngekana o Jasone ma na ai ni Jerusaleme ka ageagesia igê na râha me iana ma ka hagarere tanga. Ngaira ka râ vurusia, ka ngerengere ma ka mebanu henigi na ahame ga tangagi. Hemuri o Antioko henira na mane ni me hato iana ki tavoraha i Jerusaleme tanga i Punisia.
23I murini na harisi gi oru o Jasone ki hagatorangenia o Menelao, hanana i toregi na haga na takesi tanga na maneraha ma ki mehekarigi renigi tani na tarani ga raha. O Menelao ki no vesina o Simone, mu bani girara. 24Ga hagagirara na maneraha renia o Menelao. O Menelao ki kasia akê na maneraha, hanana na maneraha ki takusia, vi o Menelao ki na mane i nahuni ramoha. O Menelao ki mahata tanga renigi na 9000 kilo kê nikâ na siliva teharia o Jasone, hanana vi na maneraha ki atea ki mane ni vogasiha i teha. 25Ngekana o Menelao ki aporo i Jerusaleme henia na leta iana na maneraha, i kasia ki mane ni vogasiha i teha. Ma ngaia ki mareha ngavê ge araria vige mane ni vogasiha i teha, suria i bagamangamangariaga ngavê, ki bagararamo ngavê ma ki hagamamasiagara ngavê na enoni. Matena i mangariaga, ngaia ki bâbâ manga na marâ vasiga i hagamamaguraga ngavê. 26Vikana o Jasone, i bani panea râ o veogana tenia i mane ni vogasiha i teha, ngaia ki gava tanga i Amone, suria o Menelao ki panea râ nogana. 27Hoi, o Menelao ki mane ni vogasiha i teha ma ki mareha vê vige vatea na maneraha na haga i bani surugi tanga, 28henaka o Sositarato, na mane i bêngenira na mane ni me igê na ruma na para nganganihaga i Jerusaleme, ki ama ni nungigi nga na haga, suria ki na tagaraha iana. Tahema na maneraha ki bonasirerua karu râ me i pasina renia na tarana ngekana. 29O Menelao ki atea o Lisimako o vesina ki urusia râ noga, ki mane ni vogasiha i teha, ma o Sositarato ki atea o Karate ki urusia râ noga ki anumasia na ruma na para nganganihaga. O Karate ki bêngenira na mane ni me ni Saepero ga vatevatera.
Ga nahuia ki me o Oniasi
30Igê nga na matena ngekana na ai ni hinua i Tareso ma i Malo i Silisia ngaira ka katoa na perenga tanga na maneraha, suria na maneraha ki tagarenirerua na hinua ngegana tanga ka Antiokisi na gete iana râ ma. 31Vikana na maneraha ki atea o Anteroniko, na hitangita na mane ni hagaotonga iana, ki urusia râ noga, ma ngaia marena ki hatani gaha râ i Silisia, hanana i hatungia igê na perenga. 32O Menelao ki takusia vi ngaia ki na matena koro tanga. Ngaia ki hanagogi tani na apira na golo tenia na ruma ni rotu i Jerusaleme. Tani ngaia ki mahatanginigi tanga o Anteroniko ma tani ngaia ki hagavuringenigi i hinua i Taire ma surigi na hinua hagarangia. 33Matena o Oniasi ki rongoa vi akê me monari na tarana ngekana, ngaia ki gava ki ruku igê na ngêsu i Tapene hagarangia na hinua i Antioko ma ki ramonia o Menelao renia igê. 34Tahema o Menelao ki tamasi pinihi tanga o Anteroniko, hanana i nahuia ki meme o Oniasi. O Anteroniko ki agana ma ki râ tanga o Oniasi. Ngaia ki ageagesia bâkoro ma ki tohe tanga, vi mareha ge rapasia, ma hete i hagabekasia ma. Henaka o Oniasi ki hinarua, ma ngaia ki aganaria na tamasinga iana o Anteroniko ma ki hura me tenia na rukuruku na ngêsu. Pusina ma i hura me, o Anteroniko ki tako hagetage ki nahu hunia ototo râ nga.
Ga suria o Anteroniko ki me
35Na Siu ma na ani ga pe Siu nikâ ka mangariaga bâraha, suria o Menelao ki nahuia ki me vikana o Oniasi. 36Matena na maneraha ki bani aporo me tenia na apanena i Silisia, na Siu i Antioko ka râ i pasina ka hagagege tanga renia o Anteroniko i nahu hunia purua o Oniasi. Rako na enoni ga pe Siu ka kato vikana nogata. 37Na maneraha o Antioko ki hataera ngavê renia ma ki rugu ngavê na obana. Ngaia ki angiangi, matena i takusia o Oniasi na mane ni takoha mataha i oto suria marena tare igê na ogaha hagenani iana. 38O Antioko ki mangariaga ngavê, ki okea râ na aruha rotorotoaga memera tenia o Anteroniko, ki tarasigi râ na ara ni gahu i apena ki rupaturi ma ki merârâ suria na hinua tanga na agua i nahuia ki me igê o Oniasi. I ngekana o Antioko ki haribona, ka nahuia igê ki me na manero ngekana. Ngekana nga hanana na Araha i vatea renia na hagaitangiha i araria.
Ga nahuia ki me o Lisimako
39Hagarako o Lisimako ki hanagogi na golo na apira ma na kâkâ tenia na ruma ni rotu i Jerusaleme. Ma o Menelao o veogana ki hagamarumu ma tanga. Matena i hura mave na rongoha renia na hanagoha ngekana, na enoni ka hakuria me o Lisimako, hanana ga ramonia. 40Matena na enoni ka mangariaga ngavê ma ka haganega na perenga, o Lisimako ki bonasira na 3000 na mane ni me, hanana ga meraheariha. O Aurano kani bêngenira. Ngaia ki gemêa. Ngaia ki gemêa ngavê, ma ki bonobonoga ngavê nikâ. 41Matena na Siu igê na mahera na ruma ni rotu ka bâsira na mane ni me ga râ me ka taharira, ngaira ka tavogi na hê, na bogoni na apinige ma na rahu ma ka rangora na me renigi. 42Ngaira ka nahuira ta kereani na mane ni me iana o Lisimako, ka hagamamarira rako ma ka hagavasira na ani ga tahi. Ngaira ka nahu hunia na mane i hanago i ruma ni rotu hagarangia na kiboru ni ruruguha.
Ga hagatamasia o Menelao
43Suria vikana, tahema ka hagatamasia o Menelao. 44Matena na maneraha ki vatugia na hinua i Taire, na haku na meraha i Jerusaleme ki hagatorangenira na vera oru na mane igê, hanana ga hagatamasia o Menelao i maana na maneraha. 45Matena o Menelao ki girara so, vi ngaia ki page so igê na tamasinga, ngaia ki suru tanga o Potolemeo karena o Torimenesi, vi vatea renigi rako ngavê na haga, manga vi ngaia ma ki tamasi tanga na maneraha ki urusi parongana ma ki panepane henia. 46O Potolemeo ki vi tanga na maneraha, hanana i mehura tenia na ruma ni kotiha tanga garu totora rogaroga igê na mamaruha. I ngekana ngaia ki katoa igê na maneraha ki urisi parongana. 47Tahema na maneraha ki suria, vi o Menelao ki pe erasia rârâ ta na marâ, henaka ngaia ki katogi na tarani era ngegana, ma ki surira na vera oru na mane ka meme, henaka ga pe erasia rârâ ta na marâ. Na ai ni Sikitia ki asa vige kato vikana! 48Na mane gi oru ngegana ka tamasi ramo pusira na ai ni Jerusaleme, ma pusigi i Jerusaleme ma na marâ apuna tanga na hagarahenga, ga bani hanagogi tenia na ruma ni rotu. Henaka, ma ngaira ka mutera ototo râ nga. Na tarana ngekana ki aharê igê na ramata. 49Tahema tani na ai ni Taire ka mangariaga ngavê renia na tarana era ngekana ma ka hagabângenia viga ngaira ka hagahigasira na mane ngegana ma ka hagarahasira matena ga bagira. 50O Menelao ki pe hato vige mane ni vogasiha i teha, suria na mane ga nahuni ramoha ka gunahigi na ruruguha. Ngaia ki ama ni erataga ngavê nga ma ki merongasira ngavê na kariana na Siu.
Currently Selected:
2 MAKABEO 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific