2 MANERAHA 25
25
I Jerusaleme ki vota
(2 Sihonga 36.13-21; Jeremia 52.3-11)
1O Setekia ki guguruga tanga o Nebukanesare na maneraha i Babele. Tahema o Nebukanesare ki merarâ me na mane ni me hato iana ma ki taharia i Jerusaleme igê na tangahuruta na tangiana igê na tangahuruta na hageha igê na sivata na harisi iana o Setekia i maneraha surigi. Ngaira ka tênga i metara igê na hinua ma ka rapigi na para rihia na hinua. 2Ngaira ka ama ni sugaria nga na hinua mataro me igê na tangahuri harisi matare tage iana o Setekia i maneraha surigi. 3Igê na sivata na tangiana igê na heta na hageha igê nga na harisi ngekana, matena na magêha ki raha teha ma ki mareha rârâ na ngêra tangara na enoni i hinua, 4na me ni Babele ka tahakurugi na para ni hinua. Henaka vi na me ni Babele ka ura rihia na hinua, na ara ni mane ni me iana o Setekia ka gava suria na bungiana. Ngaira ka gava aharê igê na mu ni hagamahe rihia na ruma raha iana na maneraha. Ngaira ka hura tenia na maani para, i ratorerua na para gi rua ma ka gava tanga na maruguna i Jotano. 5Ma na mane ni me ni Babele ka tarigenia ma ka têa na maneraha o Setekia igê na bena hagarangia i Jeriko, ma na mane ni me hato iana ka gava pania. 6Ngaira ka torea o Setekia tanga na maneraha o Nebukanesare, i oga i hinua i Ribila, ma i ngekana o Nebukanesare ki suria igê. 7Ngaia ki haribona ka hagamesira o karena. Ngaira ka nahuira i maana o Setekia. Hemuri o Nebukanesare ki haribona ka akarogi na maana o Setekia, ka baroa renigi na seni ma ka torea tanga i Babele.
Na ruhuruhuana na ruma ni rotu
(Jeremia 52.12-33)
8Igê na pita na tangiana igê na rimata na hageha igê na tangahuru matara na sivata na harisi iana o Nebukanesare i maneraha surigi i Babele, o Nebusaratana na mane ni hagaotonga iana na maneraha ma ki bêngenira na mane ni me iana na maneraha, ngaia ki banu i Jerusaleme. 9Ngaia ki sungigi na ruma ni rotu, na ruma raha iana na maneraha ma na ruma iata na enoni raha hato i Jerusaleme. 10Na mane ni me iana ka hogegi na para ni hinua. 11Hemuri o Nebusaratana ki henahuraura na enoni ga hita so i hinua, henira na ani ga manisingenigi na tagaraha, ma henira na ani ga bani pane henira na ai ni Babele. 12Ngaia ki panira so i Juta na ani ga matareha ngavê ma ki pe tongasira rârâ ta na marâ, ma ki hagatagarahira i mu ma igê na pariki ni vaini. 13Na me ni Babele ka barugigi na u na kapa higa na u ni ruma ni rotu ma na kati igê ma na bagamaraguhu raha na kapa higa. Ngaira ka toregi na ara ni kapa higa hato tanga i Babele. 14Ngaira ka hanagogi vê nikâ na maevo ma na marâ ga sinosino rahu hurigi, matena ga maningaia na bea ni vogasiha, ma na marâ ga maningaigi renigi na laiti, na apira i gogogo hurigi na gapu matena ga vogasi, ma na apira ga susu igê na marâ i sigini koro, ma na ara ni marâ na kapa higa getigi tanga na hagarahenga i ruma ni rotu. 15Ngaira ka toregi vê na ara ni marâ ga tagarahigi renigi na golo se na siliva henigi na kere apira sisite ma na apira ni maraha. 16Na maneraha o Salomo ki bani mahatangenigi tanga na ruma ni rotu na u gi rua, na kati ma na bagamaraguhu raha. Na marâ hato ngegana ka tagarahigi renigi na kapa i higa ma ka hihigaga ngavê. 17Na u gi rua ngegana karu heavore. Na borahusina na ara ni hitangiterua ki 9 mita. Igê na ara ni bêterua na u ki oga igê na kapa higa na boroterua. Na borahusigaterua ki 1 mita ma na papana. Ngairerua karu maremarega ki rihu ki taku ma ka tagarahigi igê na marâ i bâ mangagi na guani na bana ga tagarahigi renigi na kapa i higa.
Ga henahuraura na ai ni Juta tanga i Babele
(Jeremia 52.24-27)
18Ma nikâ o Nebusaratana na araha iata na mane ni me ki henahuraura o Seraia na mane ni vogasiha i teha, mo Sepania na mane ni vogasiha, na ruata tanga ma na mane gi oru ga onosuria na ruma ni rotu. 19I berarogata na enoni i hinua ngaia ki rakura na araha ni me igê na hearihatana, na vere rima na mane ni hagaotonga iana na maneraha ga oga mêngara i hinua, na mane segesege iana na araha ni me igê na hearihatana, i garira na mane tanga na hearihatana ma na enoni raha tangahuru ge ono. 20O Nebusaratana ki torera tanga na maneraha ni Babele i oga i hinua i Ribila, 21i na apanena i Hamata. I ngekana na maneraha ki haribona, ka hagatavatavara ma ka hagamesira.
Vikê ga henahuraura na ai ni Juta tenia na apanena iata.
O Getalia ki bâsuria i Juta
(Jeremia 40.7-9; 41.1-3)
22O Nebukanesare na maneraha i Babele ki kasia o Getalia karena o Agikama ma o vesina o Sapane, ki bâsuria i Juta, ki bâsurira na enoni hato ga hita so igê na agua, suria ga pe henahuraura tanga i Babele. 23Matena na araha ni me ni Juta henira na mane ni me iata, ga pe nakara mareta i ruguhana na maneraha i Babele, ka rongo vikana, ngaira ka haku henia o Getalia i Misipa. Ngaira ka no Isimaele karena o Netania, o Joganane karena o Kareaga, o Seraia karena o Tanagumeti i hinua i Netopa, ma o Jasania i Maka. 24O Getalia ki vi tangara, ki vi: “Hoi, inê be vi tangagamu, vi siana kamu magutenira na mane na gavumane ni Babele. Mu oga ma ikê, mu kamu tê viteana na maneraha i Babele ma na ara ni marâ ka page arâ bâkoro ma tangagamu.”
25Igê na pita na hageha igê na harisi ngekana ngaia o Isimaele ki merarâ na tangahuri mane tanga i Misipa. Vaemana o Isimaele ki no Netania ma o virana ka no Elisama. Ngaia ka no ahariana na maneraha i Juta. Ngaia ma na me iana ka taharia o Getalia ma ka nahuia ki me. O Isimaele ki hagamesira nikâ na Isiraelita ma na me i Babele, ga oga henia o Getalia. 26Hemuri na Isiraelita hato, na enoni raha ma na enoni purua, henira na mane ga bêngenira na mane ni me, ngaira ka gava tanga i Esipito, suria ga magutenira na ai ni Babele.
O Joiakino ki hura tenia na ruma ni hagaitangiha
(Jeremia 52.31-34)
27Igê na harisi o Evili Merotaka ki vora re igê na maneraha i Babele, ngaia ki hetaki tanga o Joiakino na maneraha ni Juta, ma ki kasia hura tenia na ruma ni hagaitangiha. Na tarana ngekê ki vora me igê na tangahuru gi rua matara na pita na tangiana igê na tangahuru matara na ruata na hageha igê na harisi tangahuru gi oru matara na pita na harisi, i murina ga bani henahuraua igê o Joiakino. 28O Evili Merotaka ki koro tanga ma ki hagarahasia teharira na maneraha getera, ga bani henahuraura henia tanga i Babele. 29I ngekana na maneraha ki hagamarumungenia o Joiakino, hanana vi urusia na gahu ni enoni rakuraku ma ki mebêrihu mataro me ki meme. 30Nikâ ngaia ki vatea tare na kere haga, i ararigi na ogaha iana i na ara ni tangiani mataro me ki meme.
Currently Selected:
2 MANERAHA 25: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific