2 MANERAHA 24
24
1Matena o Joiakimo ki maneraha, o Nebukanesare na maneraha i Babele ki sugaria i Juta. O Joiakimo ki oga i ruguhana o Nebukanesare surigi na harisi gi oru ma ki kahu hura tenia na ruguhana. 2Na Araha ki nakara na haku na me ni Babilonia, ni Siria, ni Moaba ma ni Amone ka taharia o Joiakimo, hanana ga ruhuruhua i Juta, manga i bani visia na Araha i harata na poropete na kariana. 3Na Araha kani naka nga vikana, hanana i rumakaka renira na ai ni Juta surigi na bagatauhana hato na maneraha o Manase, 4ma suria nga hete i mutera rako na enoni ga pe erasia rârâ ta na marâ. Na Araha ki asa vige bonotenia na bagatauhana o Manase ngekana.
5Na tauhana hato getigi o Joiakimo ka bani segegi so igê na buka na sihonga renira na maneraha i Juta. 6O Joiakimo ki me ma o Joiakino o karena ki maneraha urusia.
7Na maneraha i Esipito henira na mane ni me iana ki asa, vige tavo uga hura nikâ tenia i Esipito, suria na maneraha i Babele ki marungigi na apaneni hato ga oga i nago i ruguhana i Esipito, haganega tenia na ve i Uparatesi ki tariha igê na ve na taritarihana i Esipito.
O Joiakino ki maneraha i Juta
(2 Sihonga 36.9-10)
8Matena o Joiakino ki tonga na harisi tangahuru matare varu iana, ngaia ki vora re na maneraha i Juta. Ngaia ki oga i Jerusaleme ma ki marungia i Juta surigi na hageha gi oru. Kenana kani ka Negusita ka karena o Elenatane i Jerusaleme. 9O Joiakino ki murisigea na Araha, suria i amake surigi na bagatauhana o vaemana.
10Matena o Joiakino ki maneraha, na mane ni me ni Babele ka tavo uga tanga i Jerusaleme ma ka oga rihia. Na maneraha o Nebukanesare ki mareha vige bêngenira. 11Ngaia marena ki kahu râ me ma tanga i Jerusaleme, matena ga bani oga rihia. 12Na maneraha o Joiakino henira kenana, o karena, na mane ga bêngenira na mane ni me iana ma na mane ni hagaotonga i ruma raha iana, ngaira ka nakara mareta i ruguhata na ai ni Babele. Igê na varuta na harisi i maneraha igê o Nebukanesare ngaia ki henahuraua o Joiakino. 13Ngaia ki rurugu tanga i Babele na ruruguha hato i ruma ni rotu ma i ruma raha iana na maneraha. Manga i bani visia na Araha, o Nebukanesare ki hasuigi râ na golo hato tenigi na marâ i bani tagarahigi o Salomo na maneraha tanga na hagarahenga i ruma ni rotu. 14O Nebukanesare ki henahuraura na ai ni Jerusaleme, na mane hato ga bêngenira na mane ni me ma na meraha hato. Ngaira haku ka vora na rehagaro tangahuru gi tage. Ngaia ki henahuraura nikâ na mane hato ga manisingenigi na tagaraha henira na ani ga tagara renigi na aiani. Nga noga ma na enoni purua ma ka matareha ngavê kaniga hita so i Juta.
15O Nebukanesare ki henahuraura tanga i Babele o Joiakino ma kenana, ngaira kaniana, na mane ni hagaotonga iana ma na meraha i Juta. 16Ngaia ki henahuraura tanga i Babele na enoni raha hato. Na rehagaro gi pi ngaira hato ma nikâ na rehagaro gi pi na mane ga manisingenigi na tagaraha henira na ani ga tagara renigi na aiani. Ngaira hato ka na mane ramo ma ka arari ni hearihatana.
17O Nebukanesare ki kasia o Matania o mona o Joiakino ki maneraha i Juta ma ki urusia na atana, ga hêtana vi o Setekia.
O Setekia na maneraha i Juta
(2 Sihonga 36.11-12; Jeremia 52.1-3)
18Matena o Setekia ki tonga na harisi tangahuru gi rua matare tage iana, ngaia ki vora re na maneraha i Juta. Ngaia ki oga i Jerusaleme ma ki marungia i Juta surigi na harisi tangahuru matare tage. Kenana kani ka Gamutale ka karena o Jiremeiahu ni Libina. 19Na maneraha o Setekia ki murisigea na Araha manga na maneraha o Joiakimo. 20Na Araha ki mangariaga ngavê tangara na ai ni Jerusaleme me Juta. Tahema ngaia ki rumakaka ngavê renira.
Currently Selected:
2 MANERAHA 24: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific