1 TIMOTI 6
6
Na tagaraha iata na enoni vurivuri
1Na enoni vurivuri hato ki tuguhira, viga hanetasira na araha iata, hanana siana ka page tamasi erasia God ma na hagesuringa na rotu iaka. 2Manga vi na enoni vurivuri, ma na araha iata ga tongesuri nogata, ki tuguhira na enoni vurivuri ngegana, siana viga ruhira, suria ngaira ka hegoata igê na tongesuriha. Ma ka tagara bâkoro ngavê hete tangara, renia ngaira ma na enoni, ga hagatagarahira tangara ngegana ngaira, ka obahaku igê na tongesuriha ma igê na hetakuiha.
Na hagesuringa hagaparu ma na rotu monari
I tuguhigo, vigo hagesurira na enoni renigi na tarani ngegana, ma ko ateate renigi tangara. 3Ma na enoni, i hagesurira na enoni renia na hagesuringa, i totora getea, ma ki pe arâ surigi na tamasinga monari iana na Araha iaka o Jesu Kirisito, ma ki pe arâ suria na hagesuringa na rotu iaka, 4ngaia ki paroparo bâraha, ma ki hite ngavê. Ma igê na apena ki tâ igê na teniha i pe koro, hanana i merahetuguri, ma ki merahetamasi na enoni renigi na tamasinga. Ma na tarana ngekê ki katora na enoni, ka hengari, ka hehanehane, ka heguhaguha, ma ka hagatoraira heri, 5ma ka hetuguri tare, renia na enoni ngegana ka tugupu, ma ka bani kasia vê na monariha. Ngaira ka takusia ma, vi na rotu ki na tarana tanga na ruruguha ma na haga.
6I monari, na rotu ki katoa na enoni, ki ruruguha ngavê, manga vi ngaia ma ki takusia, vi na marâ, i nahunigi, ka arari noga tanga. 7Igia ka mevora me vari ta na marâ i maveta? Mareha vê! Na ta igia ka merâ tenia na maveta, matena ga meme? Mareha vê! 8Tahema manga igia, ma ka nahunigi na ngêra ma na gahu, ngekana ki uhu nga tangagia. 9Ma na enoni, ga tenia, vi ga ruruguha, ngaira ka votavota igê na heuhungiha, ma ka tutu igê na tu na teniha rako, ga bekabekaga, ma ka hagaerasira. Na teniha ngegana ka katora na enoni, ka era ngavê, manga na ruma, ga hogea ma ka sungia. 10Renia na teniha ni haga ki na hunani na ani mavê na eraha. Tani na enoni ka bani tenigi bâraha na haga, tahema ga bani kasia vê na tongesuriha, ma ka bani erasigi na aitangihata igê na tarani ga pe koro.
Na tamasinga iana o Paulo tanga o Timoti
11Ma igo, God ki bani atego, i tuguhigo, vigo hinarugi na tarani hato ngegana. Ko uhungia nga, hanana go katogi na marâ, ga koro ma ka oto i maana God, go hanetasia tare God, go hetakui, go piringiape, ma ko haritagi. 12Go uhungia nga, hanana go tehateha igê na tongesuriha, ma ko taua na mêriha mora ma tarema tangago maremu, na mena na tangoha iamu. Renia God ki bani unigo tanga na mêriha nga ngekê, matena igo ko visia mataha na tongesuriha iamu i maata na enoni rako. 13I maana God, i votogi na mêriha tangagi na ara ni marâ, ma i maana o Kirisito Jesu, i visia mataha i maana o Ponsio Pilato, vi o ti kani ngaia, inê kê bonasigo: 14hanana go marupea bâkoro na ramata ngekana, ki arâ maninga mataro me na Tangiana na Suriha Raha, i page arâ me igê na Araha o Jesu Kirisito. 15Igê na matena tanga God i page katoa, i arâ me, God koro ngaia nga ki ramata, ngaia ki na maneraha, i teha, ma na Araha, i teha. 16Ngaia getea ma ki asa, vi ge page me. Ngaia ki oga igê na marara, i asa ta na enoni, vi ge râ me hagarangia. I mareha ta na enoni, vi ge bani bâsia, ma ki mareha ta na enoni, vi ge girara ge bâsia. Ka visia raha, ma ka naka, ki marungigia tare. Monari.
Na ta ki tuguhira na enoni ruruguha
17Go bonasira na enoni, ga ruruguha renigi na marâ ni maveta, hanana siana ka paroparo, ma siana ka hagêguritogo renigi na marâ mangagi na ruruguha, igia ka pe hagêguritogo renigi. Ma ko bonasira, ka hagêguritogo renia God hete, i mahatangenigi na ara ni marâ tangagia, hanana igia ka vagevage renigi. 18Go girarara, ka hekomani, ka ruruguha igê na tagaraha koro, ka mamahata, ma ka agana ka meratongani na enoni getera renigi na ruruguha iata. 19Igê na tarana ngekê ngaira ka page nakanaka haku tangara mareta na ruruguha, i hanira bâkoro tanga na matena i hemuri me. Ma vikana ngaira ka page girara ga nahunia na mêriha, na morana na mêriha.
Na hagahatongina na leta
20Timoti, go marupea maninga na marâ, ga bani hagatorago renia. Go hinarura na enoni, ga pe hanetasia God igê na tamasinga iata, ma ka hetuguri bekabekaga renia na tamasinga, tani na enoni ka hêtana vi na “Giraraha”, ma ki mareha. 21Renia tani na enoni ka vi, vi ngaira ka nahunia na giraraha, tahema ngaira ka bani kasia na tarana na tongesuriha.
Inê kê nungia God, ke korokoro tangagamu hato.
Currently Selected:
1 TIMOTI 6: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
