1 TIMOTI 5
5
Na parongana o Timoti tangara na enoni ga tongesuri
1Siana ko ramonia na meraha, ma ko tamasi tanga ma hete, manga vi ngaia ki no vaemamu. Go katora na mane haoru, manga vi ngaira ki no vesimu. 2Go katora na gemêa, manga vi ngaira kani kenamu, ma ko katora na gete haoru, manga vi ngaira kani kesimu, ma ko hanetasira ngavê.
3Go hanetasira na gete, ga nâ, ma ki mareha ta na enoni, vi ge bâbâsurira. 4Manga vi na gete, i nâ, ma ki nahunira na karena, se na esina, ki tuguhira na karena ma na esina, viga girara maninga i nago, hanana ga tanugi na tagaraha, ga ararira tanga na ahemata iata, ma igê na tarana ngekana ngaira ka barua aporo tangara kenata ma kirata, renia na tarana ngekana ki hagakoro obana God. 5Ma na gete, i nâ ngavê, ma ki mareha ta na enoni, vi ge bâbâsuria, ngaia ki bani hagêguritogo renia God, ma ki ama ni nunginungi nga, ki avarasia tare igê na bungiani ma na tangiani. 6Ma na gete, i nâ, ma ki ata ni ataka mavê, ngaia ki bani me, henaka vi ngaia ki mauri mênga. 7Na tarani gê bani visigi tangago, go hagarongora renigi, hanana na parongata ki korokoro igê na ara ni marâ. 8I manga ta na enoni, ma ki pe bâbâsurira na kariana ma na ahemata nga iana marena, ngaia ki bani kasia na tongesuriha, ma ki era ngavê teharia na enoni, i pe tongesuri.
9Go girara go tomania me nikâ ta na nâ henira na nâ getera, manga vi na harisi iana ma ki teharigi na tangahuru ge ono. Manga vi ngaia, ma ki nâ hagetage ma. 10Manga vi ngaia, ma ki katogi na tagaraha koro: na gete, i bâbâsurira maninga na karena, ki unira banu i pasina na mahuara, ki tananigi na êgata na enoni, ga tongesuria God, ki tamanira na enoni, i bara na ogaha iata, ma ki tâtâ nga igê na ani mavê na tagaraha koro.
11Ma siana ko tomanira me na gete haoru, ga nâ, henira na nâ getera, suria, na matena na teniha iata ka katora, ka obania, vi ga auragi aporo nikâ, ngaira ka murisigea o Kirisito. 12Manga ngekana ngaira ka tangahurira, suria ngaira ka aharê igê na suruha hagenago iata tanga o Kirisito. 13Nikâ ngaira ka haganega ka hotohoto suri ruma purua ma. Ma ta na marâ nikâ i era ngavê: ngaira ka haganega ki rakorako i harata, ma ka purugenira mareta purua ma igê na ara ni marâ, ma ka tamasigi na marâ, ga pe marisita. 14Tahema inê kê obania hete, vi na gete haoru, ga nâ, ka auragi aporo nikâ, ma ka apara kare, ma ka bâbâsurigi na ruma iata. Igê na tarana ngekana na merongaka ki asa iata, vi ge tamasi erasigia. 15Renia tani na gete, ga nâ, ka bani kasia vê na tara koro, ma ka râ suria Satana. 16Ma ki manga vi ta na gete, i tongesuri, ma ki nahunira na gete, ga nâ, ga gâga henia i ruma iana, ki tuguhia, i bâbâsurira, ma siana ki hagamarâ apena na rotu, hanana vi na rotu ke bâbâsurira na gete, ga nâ, ma ki mareha ta na enoni, vi ge bâbâsurira.
Na meraha igê na rotu
17Na meraha igê na rotu, ga bêngenira bâkoro na enoni, ki ararira, viga vurira teharigi na vurita. Ngaira nga ka na meraha ga tâtâ nga igê na ateateha ma na hagesuringa. 18Renia na Buka Apuna ki vi, “Siana kamu pagoa na harana na puruka, matena i pupu baturigi na koni.” Ma na Buka Apuna ki vi nikâ, “Na mane, i tagara, ki nahunia na mena na tagaraha iana.” 19Siana ko tongesuria na ani, i tamasi pusia na meraha, manga i mareha vi na vererua, se na vera oru henia. 20Go ramonira mave na enoni hato, ga tasitasi, hanana na enoni getera ka makuku.
21I maata God mo Kirisito Jesu ma na angero koro inê kê nungigo nga, hanana go arâ surigi na tarani ngegana. Siana ko surira na enoni surigi na obaniha iamu maremu ma, ma siana ko têtê henia na anima na enoni igê na anima na tarani pe oto. 22Siana ko hata ni têtêbuhia ta na enoni, hanana vi tagara tanga na Araha. Siana ko têtê henigi na tasi iata na enoni getera, ma ko ototo surigo maremu hete.
23Siana ko totono tare ma na ve taranina. Ma ko totono nikâ hete na kere vaini, hanana i tamania na auna obamu, suria igo ko maeha tare.
24Tani na enoni ka tâ mave na tasi iata, ma na tasi iata ka bêngenira tanga na suriha. Ma tani na enoni ka pinihi na tasi iata, ma hemuri ma ka kahu rangaranga mave. 25I tagenana ma na tagaraha koro ka bâsigi mave, ma ki manga ga pe bâsigi mave, ngaigi ki asa, vi ge pinihigi.
Currently Selected:
1 TIMOTI 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
