1 TESALONIKA 5
5
Mu nananêa na aporoha me iana na Araha
1Goamami igê na tongesuriha, i asa, vi igami kami sege tangagamu renigi na bevoani ma na mateni, ga page atata me igê na tarani ngegana. 2Suria igamu maremi kamu bani girara bâkoro, na Tangiana iana na Araha i page arâ me igê, ma ki arâ me manga na mane hanago igê na bungiana. 3Matena na enoni ka pe hinaru igê ka vi, vi “Na ara ni marâ ki koro ma. Siana ka hinaru,” ki paraparama, ma ki tarahura na hagaitangiha! Ma ki asa hagetage, vi ge gavatenia. Ma ki hagakakangi me manga na mamasiaganiha iana na gete, i riki na gerina, matena i sugia vige apara. 4Ma igamu, goamami igê na tongesuriha, kamu pe oga igê na mengo ma na Tangiana, i arâ me igê na Araha, ki asa, vi ge hagakangigamu manga na mane hanago. 5Igamu hato ka na enoni igê na marara, igê na mavetana. Igia ka pe oga igê na bungiana, se igê na mengo. 6Hoita, manga ngekê, siana igia ka gâga purupuru mangara na enoni, ga pe tongesuri. Ma ki tuguhigia hete, viga nanê, ma ka bâbâsurigia mareka. 7Suria nga na bungiana na enoni ka mauru nga, suria nga na bungiana na enoni ka totono nga igê, ma ka bekabeka. 8Ma igia ki na enoni igê na mavetana, ma ki tuguhigia, viga bâbâsurigia mareka. I tuguhigia, viga ama ni tongesuria nga o Kirisito, ma ka ama ni hetakuiheri nga, ma ka ama ni naasia nga God, i page hagatahigia. Na tarani ngegana ka na tarure, ga anumasigia pusia Satana. 9God ki pe ategia tanga vi ge hagaitangigia, ma ki ategia hete, vi hanana igia ka tahitahi renia na Araha iaka o Jesu Kirisito. 10Ngaia ki me renigia, hanana vi igia ka mauri henia, henaka vi igia ka tahitahi mênga, se viga bani meme, matena i aporo me. 11Tahema mu hagagatagatanigamu heri, ma kamu hetamaniheri, manga hanana i na matena i ngekê akê.
Na hagahatongina na leta
12Goamami igê na tongesuriha, igami kami nungigamu nga, kamu hanetasira maninga na enoni, ga tagara bâraha i pasimi, suria na Araha ki bani atera, hanana vi ngaira ka hagaotogamu, ma ka hagesurigamu. 13Mu hanetasira ngavê, ma kamu takuira ngavê, renia ngaira ka tamanigamu bâraha. Mu hekomaniheri.
14Goamami igê na tongesuriha, igami kami nungigamu nga, hanana vigamu ramonira na enoni, ga marusi, vi ge tagara; gamu hagaramonira na enoni, ga magu; gamu tamanira na enoni, ga pe ramo, ma kamu piringiape henira na enoni hato. 15Siana kamu hagamarumungenia ta na enoni, ki barua na eraha renia na eraha, ma kamu uhungia tare nga hete, kamu hetamaniheri, ma kamu tamanira na enoni hato.
16Mu vagevage tare. 17Mu nunginungi tare. 18Mu visia koro God tare igê na ara ni marâ. God ki obanigamu, vi gamu katogi na tarani ngegana igê na mêriha iami, suria igamu ki na kariana o Kirisito Jesu.
19Siana kamu rêrapusia na Higona Apu. 20Siana kamu haritohegi na tamasinga iata na enoni, ga vi, vi God ki tamasi i harata. 21Mu tahetara maninga i nago renigi na marâ hato. Mu taugi gatagata na marâ, ga koro, 22ma kamu kasigi râ na ara ni marâ, ga era.
23Igami kami nungia God, ki hagakorogamu maninga, suria ngaia ki vategia na marapeha iana, ma ki hagatahigamu, na aitangihami, na ataromi, ma na apemi tenigi na ara ni tasi, matena i arâ me nikâ igê na Araha iaka o Jesu Kirisito. 24God, i bani unigamu, ki page katogi na tarani ngegana, suria ngaia ki hagamonarigi tare na tamasinga iana.
25Goamami igê na tongesuriha, mu nunginungi tangagami nikâ.
26Mu harite henira na goami hato igê na tongesuriha, ma kamu siginira, suria mu vagevage renira.
27Inê, na urusina na Araha, kê bonasigamu, kamu tomania na leta ngekê tangara na goami hato igê na tongesuriha.
28Inê kê nungia na Araha iaka o Jesu Kirisito ke takuigamu, ma ke korokoro tangagamu.
Currently Selected:
1 TESALONIKA 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
