1 TESALONIKA 4
4
Na mauriha i hagakoro obana God
1Hoita, goamami igê na tongesuriha, igami kami bani hagesurigamu, manga hanana i tuguhigamu, vi gamu mauri, hanana mu hagakoro obana God. Ma inê kê girara, igamu kamu bani mêri suria na tarana ngekana. Ma i ngekê igami kami nungigamu, ma kami kanukanugamu igê na raramohana na Araha o Jesu, hanana mu hagarahagi nga na parongami koro. 2Renia igamu kamu bani giraragi na hagesuringa, mi bani vategamu renigi igê na raramohana na Araha o Jesu. 3Ikê nga ka na marâ, God i obania tangagamu: i tuguhigamu, vi gamu mauri suria na tamasinga iana, ma siana hagetage kamu gamogamo. 4Na ara ni hitangimi na mane ki tuguhia, i torea na hehene iana, ma ki mauri henia, ma ki hanetasia igê na tarana, i hagakoro obana God renia, ma ki hagakoro obata na enoni renia. 5Ma siana ki tenia ma na apena, mangara na enoni ahuroto, ga pe toto suria God. 6Igê na tarana ngekana ki apu hagetage ta na mane, vi ge oga erasia na goana igê na tongesuriha, se vi ge hagahagaparua. Igami kami bani hagarongogamu renia na tarana ngekê, ma igami kami bani haganunugamu bâraha, renia vi na Araha ki page hagaitangira na enoni, ga katogi na tarani era ngegana. 7God ki pe unigia, vi ge gamogamo, ma ki unigia, hanana vi ga mauri suria hete na tamasinga iana. 8Hoita, manga vi na anima na enoni, ma ki usisitenia na hagesuringa ngekana, ngaia ki pe usitenia na enoni ma ki usitenia hete God, i vategamu na Higona Apu.
9I asa, vigami tamasi tangagamu renia na hetakuiha, suria igamu kamu bani takuira noga na tamami, ga tongesuri. Renia God marena ki bani hagesurigamu, hanana vigamu hetakuiheri. 10Ma igamu kamu bani takuira na goaka hato igê na tongesuriha i Masetonia hagenani. Tahema igami kami nungigamu, na goamami igê na tongesuriha, hanana mu hagaraha na hetakuiha iami. 11Mu uhungia nga, kamu haritagi, ma siana kamu totora vero, ma kamu mauri surigi na tagaraha iami maremi. Na tarani ngegana igami kami bani visigi tangagamu, matena mi oga i pasimi. 12Igê na tarana ngekê na enoni, ga pe tongesuri, ka page visigamu koro, ma igê na tarana ngekê nikâ ki asa iami, vi gamu page oga hagêguria na anima na enoni.
Na aporoha me iana na Araha
13Goamami igê na tongesuriha, igami kami obanigamu, vi gamu girara na tarana i tarahura na enoni, ga bani magahuru, hanana siana igamu ki rugurugu na obami mangara na enoni, ga pe naasia na mêriha i pasina God. 14Igia ka tongesuria, vi o Jesu ki me, ma ki mêri aporo. Tahema igia ka tongesuria, vi God ki page votoa na mêriha henia o Jesu tangara na enoni, ga tongesuria, ma ka bani me.
15Hoi, na hagesuringa ngekê iana na Araha igami kami visia tangagamu: igia na enoni, ga tahitahi mênga igê na tangiana, i page arâ me igê na Araha, ki asa iaka, vi ge hagenago tarata na enoni, ga bani me. 16God ki page unini, ki page tamasi na angelo raha, ki page rongo raha na ringena na ahuri iana na Araha, ma na Araha, ngaia marena, ki page soso me tenia na vavearo! Na enoni, ga tongesuria o Kirisito, ma ka bani me, ngaira ka page mauri aporo hagenago. 17Ma hemuri igia, ga tahitahi mênga i na matena ngekana, God ki page hakugia henira i haha igê na vaha, hanana igia ka arâ vurusia na Araha igê na bevoa tatara. I manga ngekana igia ka page gâga tare henia na Araha. 18Tahema igamu kamu hagamanapugamu heri renigi na tamasinga ngegana.
Currently Selected:
1 TESALONIKA 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
