1 ESETARASE 8
8
O Esera ki ata me i Jerusaleme
(Esera 7.1-10)
1Rako na harisi i muri, matena o Ataseresese i maneraha i Pesia, ta na mane o Esera na atana, ki râ me tenia i Babilone. Ngaia ki tomanira bê aporo vikê na êvarina tanga o Arone na mane ni vogasiha i teha: o Seraia ki apara o Esera, o Asaria ki apara o Seraia, o Gilikia ki apara o Asaria, o Salumu ki apara o Gilikia, 2o Satoke ki apara o Salumu, o Agitubu ki apara o Satoke, o Amaria ki apara o Agitubu, o Asaria ki apara o Amaria, o Buki ki apara o Asaria, o Abisua ki apara o Buki, o Pinega ki apara o Abisua, o Eleasare ki apara o Pinegasi karena o Arone.
3-4O Esera ki na mane ni hagesuringa raha. Ngaia ki aitangisigi ngavê na ramata, God iata na Isiraelita i bani vatea o Moise renigi. Na maneraha ki hagahigasia ngavê ma ki aganarigi na ara ni nungiha iana. O Esera ki tavoraha tenia i Babilonia 5tanga i Jerusaleme henira na ruruha na Isiraelita. I berarogata ka oga igê na mane ni kiha i ruma ni rotu, na mane ga anumasia na ruma ni rotu ma na mane tagara. 6Ngaira ka pania i Babilonia igê na tangiana hagenago igê na hageha hagenago igê na pita na harisi iana o Ataseresese i maneraha surigi. God ki katora ka râ purunguni. Ngaira ka ata me i Jerusaleme igê na tangiana hagenago igê na rimata na hageha. 7O Esera ki aitangisigi ngavê na ramata iana na Araha ma ki marupegi na ara ni marâ igê na buka ni ramata. Tahema ngaia ki girara i hagesurira na Isiraelita hato renigi na ramata ma na hagesuringa hato igê.
Na maneraha ki vatea o Esera na pepa ni ramoha.
(Esera 7.11-26)
8Ikê ka na pepa ni ramoha, na maneraha o Ataseresese i vatea o Esera na mane ni vogasiha, i aitangisigi ngavê na ramata iana na Araha:
9“Inê na maneraha o Ataseresese, kê hagamauru koro tangago o Esera na mane ni vogasiha, go aitangisigi na ramata iana na Araha.
10Suria inê kê koro tangara na Siu, tahema inê kê haribona, vi inê kê hagamarumungenira na Siu hato surigi na apaneni hato gê marungigi, henira na mane ni vogasiha ma na mane ni hagarahenga, ka râ henigo tanga i Jerusaleme, manga vi ngaira ma ka obania. 11Igami, inê ma na vere pi na mane ni hagaotonga ga visira vi na tamana koro na maneraha, igami kami vi, vi ngaira hato na ani ga obania viga arâ henigo, ka arâ henigo. 12Nakara ke râ bâbâ renigi na ogaha iata na enoni i Jerusaleme ma i Juta, manga vi ngaira ma ka marupegi na ramata iana na Araha se mareha. 13Nakara nikâ ke migirâ tanga i Jerusaleme na votovoto, igami, inê ma na mane ni hagaotonga iaku, gami bani surugi tanga na Araha iata na Isiraelita, henigi hato na siliva ma na golo iana na Araha, ga gâga vari i Babilonia, 14ma henigi nikâ na marâ hato, ga bani hakugi na Isiraelita tanga na ruma ni rotu iana na Araha iata. Ga hakugi nga na siliva ma na golo, hanana ga vurira re na puruka mane, na sipi mane, na kareta na sipi ma na ara ni marâ hato ga obanigi tanga na hagarahenga, 15hanana ga vogasia re na Araha igê na bea ni vogasiha iana i Jerusaleme.
16Na siliva ma na golo ka tangagi na ani mavê na marâ igo ma na goamu na Siu, mu obanigi suria na obaniha iana God iami. 17-18Igo ko girara go tavogi tenia na kiboru ni ruruguha iana na maneraha na apira ma na kâkâ apuna iana na Araha, ga tagarenigi tangago tanga na hagarahenga i ruma ni rotu iana God iami i Jerusaleme, henigi na anima na marâ go obanigi tanga na hagarahenga i ruma ni rotu.
19Inê kê bonasigamu na mane hato mu bâsurigi na haga i Siria me Punisia, hanana mu vatea ototo râ nga o Esera na mane ni vogasiha i aitangisigi na ramata iana God raramohaga hunia, na ara ni marâ hato i nungigi, 20i tariha ma igê na 3000 kilo na siliva, na 500 paike na koni, na 1375 lita na vaini ma na golo hato ga obanigi. 21Mu katogi maninga nga na ara ni marâ na ramata ga visigi renia na hagarahenga tanga God raramohaga hunia, i era ma ki mangariaga tangê se tangara na ani ga page maneraha urusiê. 22Siana kamu tavotavo takesi tenira na mane ni vogasiha, na mane ni hagarahenga, na mane ni kiha, na mane ni anumasiha, na mane tagara se vi tenira na anima na enoni ga tagara i ruma ni rotu ngekana. I apu ta na enoni vige hagamarâ apeta.
23Igo, o Esera, gu hagabângenia nga na takoha mataha i râ me tenia God, matena go atera na gavumane ma na mane ni hagaotonga, hanana ga bâbâsurira na enoni hato i Siria me Punisia, ga râ surigi na ramata iana God iamu. Gu hagesurira nga na enoni hato ga pe hagare renigi na ramata ngegana. 24Na enoni i pe marupegi na ramata iana God iamu se vi na ramata iana na maneraha gu hagaitangia ototo râ nga: i meme, i tavotavo haga, go paia hura se tani na hagaitangiha getigi.”
O Esera ki hagarahasia God
(Esera 7.27-28)
25O Esera ki vi: “Ge hagarahasia na Araha, na Araha ngaia getea ma! Ngaia ki katoa na maneraha ki agana, ki tagarahia aporo na ruma ni rotu iana na Araha i Jerusaleme ki bâkoro aporo. 26Suria God ki koro tangê, tahema na maneraha, na mane ni hagaotonga iana, na tamana koro hato ma ngaira hato na enoni ga raha igê na gavumane iana, ngaira ka hagahigasiê. 27Na Araha God iaku ki bani hagaramoniê ma inê kê girara gê hagaharora rako na mane, hanana ga aporo me heniê.”
Na enoni ga aporo me tenia i Babilonia
(Esera 8.1-14)
28Igê nga na atata na bêni na apaparaha ma na ahemata, ga bani henahuraura tanga i Babilonia ma ka aporo henia o Esera tanga i Jerusaleme, matena i maneraha o Ataseresese:
29-40O Geresome tenia na apaparaha iana o Pinegasi. O Gamaele tenia na apaparaha iana o Itamara. O Gatusi karena o Sekania tenia na apaparaha iana o Tavite. O Sekaria tenia na apaparaha iana o Parosi henira na 150 na mane tenia na apaparaha iana. Na pepa na apaparaha iata ki gâga. O Eliehoenai karena o Sekaria tenia na apaparaha iana o Pagata Moaba henira na 200 na mane. O Sekania karena o Jagasiele tenia na apaparaha iana o Satu henira na 300 na mane. O Ebeti karena o Jonatane tenia na apaparaha iana o Atini henira na 250 na mane. O Jesaia karena o Gotolia tenia na apaparaha iana o Elama henira na 70 na mane. O Seraia karena o Mikaele tenia na apaparaha iana o Sepatia henira na 70 na mane. O Obatia karena o Jegiele tenia na apaparaha iana o Joaba henira na 212 na mane. O Selomiti karena o Josipia tenia na apaparaha iana o Bani henira na 160 na mane. O Sekaria karena o Bebai tenia na apaparaha iana o Bebai henira na 28 na mane. O Joganane karena o Hakatane tenia na apaparaha iana o Asagate henira na 110 na mane. O Elipelete, o Jeiele, ma o Semaia tenia na apaparaha iana o Atonikame henira na 70 na mane. Ngaira ka aporo hemuri. O Utai karena o Isitalakuru tenia na apaparaha iana o Bigivai henira na 70 na mane.
O Esera ki tarahura na mane ni vogasiha ma na mane ni hagarahenga tanga na ruma ni rotu
(Esera 8.15-20)
41Inê kê hagahakura na enoni hato ngegana i ve i Terase ma igami kami tênga i ngekana surigi na tangiani gi oru. Inê kê râhira kê bâsira, 42ma kê tarahua, viga mareha rârâ na mane ni vogasiha se vi na mane ni hagarahenga i berarogata. 43-44Tahema inê kê kasi tamasinga tangara na tangahuru na hitangita na meraha ga girara: o Eliesere, o Ituele, o Masamase, o Elenatane, o Semaia, o Jaribi, o Natane, o Elenatane, o Sekaria ma o Mesulame. 45Inê kê vi tangara ka râ i pasina o Ito, na mane i bâsurigi na haga iana na gavumane, 46hanana ga nungira ngaia, na tamana na ani ga bâsurigi na haga i ruguhana, hanana ga hagatorangenira me tangagami na mane ni vogasiha tangagi na tagaraha i ruma ni rotu iana na Araha iaka. 47Suria God ki koro tangagami, tahema ngaira ka hagatorangenira me tangagami tani na mane ga arari tanga vikana: o Serebia na mane ni hagarahenga tenia na hagosi ninuni iana o Mali henira na 18 o karena ma na goana, 48ma o Gasabia, o Anunusi ma o Jesaia o vesina tenia na hagosi ninuni iana o Ganania henira na 20 o kareta. 49Nikâ na 220 na mane tagara i ruma ni rotu, na maneraha o Tavite henira na gavumane iana ki bani atera na êvarita ka tamanira na mane ni hagarahenga. Na atata ngaira hato ka oga igê na pepa.
O Esera ki avarasia God ki ngahisira na Siu
(Esera 8-21-23)
50I ngekana i papana na ve i Terase inê kê tohe, kê bonasira na mane na gapu haoru viga harihari i maana na Araha iaka ma ka nungia, hanana i anumasigami kami arâ purunguniaga, igami, na karemami ma na togoha iamami. 51Inê kê maki vi ve nungia na maneraha renira na mane ni me ga tavo uga ma na me igê na hosi ke râ me henigami ma ke anumasigami pusira na merongamami, 52suria inê kê bani vi tanga, vi na Araha raramohaga iaka ki korokoro tangara na ani ga hagêguritogo renia ma ki anumasira. 53Vikana igami kami nungia nikâ na Araha iaka ki anumasigami ma ngaia ki aganarigi na avarasiha iamami.
Na mahatanga tanga na ruma ni rotu
(Esera 8.24-30)
54I berarogata na bêni na mane ni vogasiha inê kê atera o Serebia, o Gasabia ma na tangahuru me nikâ. 55Hemuri inê kê hagararingenigi na higahigani na siliva, na golo ma na marâ apuna tanga na hagarahenga, na maneraha, na mane ni hagaotonga iana ma na gavumane iana ma na Isiraelita ga bani votogi tanga na ruma ni rotu ma inê kê vatera re na mane ni vogasiha. 56-57Na marâ gê vatera kani igê:
na 25.000 kilo na siliva,
na 3700 kilo na marâ na siliva tanga na hagarahenga,
na 3700 kilo na golo,
na 20 na apira na golo,
na 12 na apira bâkoro na kapa ga bâ manga na golo.
58Inê kê vi tangara na mane ni vogasiha, kê vi: “Igamu kamu bani hagapunarigamu tanga na Araha, na Araha iata na êvarika, ma ka apuna nogani na marâ tanga na hagarahenga, na siliva ma na golo ga bani surugi tanga. 59Mu bâbâsurigi maninga, mataro me kamu atata râ i ruma ni rotu. Ma i ngekana, i raroni na kiboru iata na na mane ni vogasiha, igamu kamu tagarenigi nga tangara na bêni na mane ni vogasiha ma na mane ni hagarahenga ma tangara na meraha iata na Isiraelita i Jerusaleme.” 60Hoi, na mane ni vogasiha ma na mane ni hagarahenga ka bâsurigi na siliva, na golo ma na marâ tanga na hagarahenga ma ka migirâ tanga na ruma ni rotu i Jerusaleme.
Na aporoha tanga i Jerusaleme
(Esera 8.31-36)
61Igê na tangahuruta matarerua na tangiana igê na hageha hagenago igami kami pania na ve i Terase. Na Araha ki ngahisigami ma ki anumasigami ma igami kami ata i Jerusaleme. Igê na râha iamami ngaia ki anumasigami pusira na merongamami hato ma igami kami ata bâkoro ma. 62I murini na tangiani gi oru mi ata me, igami kami râ tanga na ruma ni rotu, kami hagararingenigi na higahigani na siliva ma na golo ma kami tagarenigi hato tanga o Meremote na mane ni vogasiha karena o Uria. 63O Eleasare karena o Pinegasi ma na mane ni hagarahenga gi rua o Josabata karena o Jesua ma o Moete karena o Sabano kaniga oga henia. 64Ngaira ka tomanigi na marâ hato ma ka hagararingenigi na higahigani ma ka segegi ototo râ nga na ara ni marâ hato.
65Ngaira hato ga bani aporo me tenia i Babilonia ka vogasia na Araha iata na Isiraelita. Ngaira ka vogasi re na 12 na puruka mane renira na Isiraelita hato, na 96 na sipi mane 66ma na 72 na kareta na sipi henira na 12 na goti tanga na vogasiha ni ngê haku. Ngaira ka vogasia na Araha renigi na ganiani hato ngegana. 67Hemuri ngaira ka tavoa na pepa ni haribonaha iana na maneraha ma ka vatea tangara na mane ga bâsuria i Siria me Punisia henira na gavumane iata, ma ngaira ka kasira akê na Siu ma ka hagahigasia na ruma ni rotu iana na Araha.
Na auragiha hetarênge
(Esera 9.1-15)
68I murini na marâ hato ngegana tani na meraha iata na Isiraelita ka râ me ma ka hagarongoê inê o Esera, 69ka vi, vi na enoni, na enoni raha, na mane ni vogasiha ma na mane ni hagarahenga ka hakunira na enoni ahuroto i Etome, i Moaba me Esipito, ma ka hakunira nikâ na Kananita, na Mitita, na Perisita ma na Jebusita. Ngaira ka râ surigi na bagatauhata na enoni ahuroto ngegana. 70Na kariana apuna God ka erataga, suria na mane na Siu ka auragira na gete ga pe Siu. Ngaira nikâ na enoni raha ma na gavumane ka bani aharêngia me na ramata i manimania na auragiha hetarênge ngekana. 71Matena gê rongo vikana, inê kê tarisigi na tuguni iaku ma na tuguni ni hagarahenga iaku, suria gê obaera ngavê ma kê tako tugupu. Inê kê piripirigi nikâ na varehuku ma na taboturiku. Inê kê anumanuma ma ki rugu na obaku. 72Na tasi ngekana ki hagaera obaku ngavê. Inê kê oga so rârâ mataro me igê na matena ni vogasiha i manurahi. Na enoni ka haganega ka aruruhiê. Ngaira hato ka magu ngavê, suria ngaira ka bani girara na tamasinga iana na Araha iata na Isiraelita renia na tasi ngekana.
73Hemuri inê kê aharaga tenia na agua gê harihari igê. Henaka ga taritarisiga na tuguni iaku, ma inê kê susure, kê gasigi akê na rimaku tanga na Araha. 74Inê kê nunginungi, kê vi: “Araha, inê kê maki ma kê tako tugupu i maamu. 75Na tasi iamami ka haripage ka akê teharigi na bêmami. Ngaigi ki tariha akê i vavearo. 76Haganega me tenigi na mateni iata na êvarimami mataro me i ngekê igami na kariamu kami tasi bâraha tare ngavê. 77Surigi na tasi iamami maremami ma na tasi iata na êvarimami, igami ma na goamami, na maneraha iamami ma na mane ni vogasiha iamami, igami kami vota i rimata na maneraha iata na ai ni mahuara. Ngaira ka mutegami, ka hanago tenigami ma ka henahuraugami. Ngaira ka hagamakigami ngavê ma igami kami maki ngavê mênga i ngekê. 78Hoi, Araha, igo ko bani takigami ngavê suria na kere matena abubu. Igo ko nakara ta kereani na hitangimami kami tahi, hanana vi igami na Isiraelita kami rahesigo ikê i ruma ni rotu apuna iamu. 79Igo ko bani naka ki mave aporo na marara iamami na Isiraelita, suria go bani hagangêgami ma ko bani marupegami igê na matena mi vora re na kare rakuraku suria. 80Henaka vi igê na matena mi vora re na kare rakuraku, ma igo ko pe rumakaka renigami. Igo ko katora na maneraha i Pesia ka koro tangagami, hanana ga hagangêgami, 81ka tagarahia bâkoro aporo na ruma ni rotu iamu, ka tagarahia aporo na hinua i Jerusaleme, suria i aruhuruhu, ma ko katogami kami oga asitatara ikê i Juta ma i Jerusaleme.
82Igo ko bani katogi me na marâ hato ngegana. Ma igami, Araha, na ta kani vigami visia? Igami kami aharêngigi nikâ na ramata, go bani vatera renigi na kariamu na poropete tangagami. Ngaira ka hagarongogami, 83vi na mako mi parênia ki na agua ni eraha, suria na enoni ahuroto ga oga igê, ka hagaerasia ngavê renigi na bagatauhata. 84Ngaira ka hagapêpugami, vi siana kami auragi hetarênge henira na enoni ngegana, 85ma vi siana kami komanira. Manga i mareha, igami ki asa iamami vigami ramo ma kami vagevagesia na agua ma kami hagatarêngenia heheuri tangara na raraha iamami i muri. 86Ngaigi ka na hagaitangiha meni na bagatarihamami. Henaka, ma igami kami bani girara, Araha, vi igo ko pe hagaitangigami ke arari, 87ma ko nakagami so hete kami tahi. Ma igami kami haritohego nikâ, kami aharêngigi na ramata iamu ma kami êragi hetarênge henira na enoni erataga ngegana. 88Henaka, ma igo ko pe mangariaga ngavê, hanana vigu hagamagahurugami hagatege, se vige pe tahi rârâ tani, mareha vi na raraha, mareha vi na Isiraelita. 89Araha iata na Isiraelita, igo ko hagamonarigi tare na suruha iamu. Igo ko nakagami kami tahi. 90Igami kami ranganigi na tasi iamami tangago. I pe oto tangagami, vigami gâga i maamu.”
Na tarana na hagatongiana na auragiha hetarênge
(Esera 10.1-7)
91Matena i susure o Esera, ki tubê so ki nunginungi i maana na ruma ni rotu, ngaia ki angi ma ki ranganigi na tasi ngegana, rako era na enoni ni Jerusaleme, na mane ma na gete ma na kare, ka arurume ka rihia. Ngaira hato ka angi bâraha. 92Hoi, o Sekania karena o Jegiele na Isiraelita ki vi tanga o Esera, ki vi: “Igami kami haritohea na Araha, suria mi êragi hetarênge henira na gete na mahuara. Henaka i manga ngekana, ma igia na Isiraelita, ki ararigia, viga ama ni hagêguritogo nga. 93Hoi, ge tohe nga tanga na Araha, vi igami kami page kasira aporo na gete mahuara ngegana henira na kareta. 94Igami kami page arâ surigi na tamasinga iami, igo ma na enoni getera, mu marupegi na ramata iana na Araha. 95Gu katoa na tarana i tuguhigo vigo katoa. Igami i murimu. Hoi, gu katoa nga!”
96Ngekana o Esera ki katora na bêni na mane ni vogasiha, na mane ni hagarahenga ma na enoni getera, ka tohe, vi ngaira ka kasira na gete mahuara iata.
Currently Selected:
1 ESETARASE 8: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific