1 ESETARASE 2
2
O Siro ki bonasira na Siu ka aporo i pasita
(2 Sihonga 36.22-23; Esera 1.1-11)
1Igê na harisi hagenago i maneraha igê o Siro i Pesia, na Araha ki hagamonaria na tamasinga iana i harana o Jeremia na poropete. 2Ngaia ki katoa o Siro, ki sege ki haribona, hanana ga tomania raha surigi na ara ni agua i marungigi. Na haribonaha ki manga ikê:
3“Inê o Siro na maneraha i Pesia, kê haribona vikê. Na Araha iata na Isiraelita na Araha raha teha ngavê, ki bani kasiê kê marungia na maveta hagenani. 4Ngaia ki hagatorê, hanana gê tagarahia na ruma ni rotu tanga i Jerusaleme i Juta. 5Na Araha ke ngahisigamu igamu hato na kariana. Mu arâ nga i Jerusaleme ma kamu tagarahia aporo na ruma ni rotu iana na Araha iata na Isiraelita, na Araha i gâga i Jerusaleme. 6Manga vi na hitangita na kariana, ga henahuraura me, ma ka obania na hetamaniha, hanana viga aporo, na enoni ga merabasigu hetanga ki tuguhira viga tamanira. Ngaira ka vatera nga na siliva ma na golo 7ma na mahatanga getigi henira na hosi ma na tonki henigi na marâ, ga bani surigi tanga na ruma ni rotu iana na Araha i Jerusaleme.” 8Hemuri na bêni na apaparaha igê na varo ninuni iaterua o Juta ma o Benamino, na mane ni vogasiha ma na mane ni hagarahenga ma ngaira hato na ani na Araha i hagatako obata, hanana viga arâ, ngaira ka hagarurugu ka arâ ma ka tagarahia aporo na ruma ni rotu iana na Araha i Jerusaleme. 9Na enoni ga merabasigu hetange ka tamanira renigi na ara ni marâ: na siliva, na golo, na hosi ma na tonki. Rako na enoni ga merabasigu hetanga ka mahatangenigi na marâ getigi tangara, hanana ga hagamonarigi na suruha iata.
10Na maneraha o Siro ki vatera aporo na marâ apuna ni hagarahenga, i bani tora na maneraha o Nebukanesare tenia i Jerusaleme ma ki bani nakagi igê na ngêsu iata na harasina. 11Ngaia ki tavogi hura ma ki tagarenigi tanga o Mitiretata, i bâsuria na kiboru ni haga iana na maneraha. 12O Mitiretata ki tagarenigi tanga o Sesebasare i bâsuria i Juta. 13Igê nga na marâ ni hagarahenga ngegana:
| na apira na golo tanga na vogasiha | 1000 |
| na apira na siliva tanga na vogasiha | 1000 |
| na apira na siliva tanga na gi | 29 |
| na apira sisite na golo | 30 |
| na kere apira na siliva | 2410 |
| na ani getigi na marâ ni hagarahenga | 1000 |
14Ngaigi hato ka vora 5.469 na apira na golo ma na siliva ma na ani getigi na marâ ni hagarahenga. 15O Sesebasare ki migirâ, matena ngaia ma na enoni getera ga bani henahuraura, ka râ tenia i Babilone tanga i Jerusaleme.
Na Urapusiana na tagarahiana aporo i Jerusaleme
(Esera 4.7-24)
16Igê na matena o Ataseresese i maneraha i Pesia o Bisilama, o Mitiretata, o Tabele, o Regumu, o Beletetemo, o Simisai na mane segesege i Juta, ma na tamata ga oga i Samaria ma i tagua, ngaira ka segea na leta pusira na Siu, ga oga i Juta me Jerusaleme. Na leta ki manga ikê:
17“Maneraha o Ataseresese, igami na kariamu kami sege tangago, igami inê o Regumu gê sege, o Simisai na mane ni segesegeha, na mane getera igê na gavumane ma na mane ni hagaotonga igê na apanena i Siria me Punisia.
18Igami kami obania, vigami hagarongogo renira na Siu, ga bani râ me ikê tenigi na apaneni getigi ma ka bani ogasia i Jerusaleme ma ka tagarahia aporo noga na hinua erataga i merongasigo tare. Ngaira ka tagarahigi aporo noga na agua ni hohoronga ma na para ni hinua, ma ka naka noga na angisiruma tanga na ruma ni rotu. 19Manga ga tagarahigi aporo hato na hinua ma na para, na enoni ka page usi vige vuri takesi ma ka page guguruga tangago maneraha. 20Suria ngaira ka bani haganega ka tagarahia na ruma ni rotu, igami kami takusia, vi i pe koro vigami atani bâbâ mavê renia 21ma kami hagarongogo renia hete maneraha. Manga go takusia vi i koro, gu gari igê na segesegeha iata na êvarimu. 22Ngekana igo ko page tarahugi igê na tamasinga renigi na tarani ngegana igê na segesegeha renigi na tarani ga akê me i nago. Igo ko page tarahua igê, vi na hinua ngekana ki bani guguruga me ma ki bani merongasira me na hinua getigi ma na maneraha igê. 23Haganega me tenia i kerevê noga, na Siu igê ka arâ tare ka merongasira ma ka meraheariha na enoni getera. Tahema na hinua ki aruhuruhu. 24Tahema igami kami vi tangago, vi matena ga tagarahigi aporo hato na hinua ma na para, igo ki hato, vigu page marungia nikâ i Siria me Punisia.”
25Na maneraha ki aramira bê aporo o Regumu, i segea na leta ngekana, o Beletetemo, o Simisai na mane ni segesegeha ma na tamata ga oga i Samaria me Siria me Punisia. Ngaia ki sege, ki vi:
26“Matena gê tomania hato na leta mu kasia me tangê, inê kê haribona, ka hahutugia na tarana ngekana. I monari, igami kami tarahua, vi i Jerusaleme ki bani usitenira me na maneraha, haganega me tenia i nago kerevê noga, 27ma na enoni igê ka bani urapusira ma ka bani meraheariha me. Na maneraha raramohaga ni hagatavatavaniha ka oga i nago i ngekana ma ka marungia i Siria ma i Punisia ma ka nungi na takesi tenia. 28Tahema i ngekê inê kê haribona, vigê hagabarasira na enoni ngegana, hanana siana ka tagarahia aporo na hinua, ma kê katora ka arâ surigi na bonasiha ngegê, 29hanana vi siana na hinua ngekana, i gâga sutaga tare, vige rêrapusia na maneraha.”
30Pusina ma o Regumu, o Simisai na mane ni segesegeha ma na tamaterua ka tomania hato na leta iana o Ataseresese, ngaira ka rêrête tanga i Jerusaleme henira na mane ni me igê na hosi ma rako na mane ni me ga tavo uga. Ngaira ka haganega ka hagatoketokea na tagarahiana aporo na ruma ni rotu. Na tagaraha ki mamaro mataro me na ruata na harisi iana o Tario i maneraha suria i Pesia.
Currently Selected:
1 ESETARASE 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific