1 ESETARASE 1
1
O Josia ki hagahigasia na paseka
(2 Maneraha 23.21-23; 2 Sihonga 35.1-9)
1Na maneraha o Josia ki hagarahasia na paseka i Jerusaleme, hanana i hagahigasia na Araha. Igê na tangahuruta matare he na tangiana igê na hageha hagenago ngaira ka nahuira na ganiani tanga na tangiana raha. 2O Josia ki atera na mane ni vogasiha, ga tuguni hanana i marisita vi na mane ni vogasiha, ma hanana ga tagara i ruma ni rotu surigi na mateni igê na tangiana tangara. 3Ngaia ki vi tangara nikâ na mane ni hagarahenga, ga tagara i ruma ni rotu, ka hagamatarotarora mareta tanga na hagarahenga tanga na Araha, hanana viga girara ga naka na bokesi na suruheri apuna iana na Araha i ruma ni rotu, na maneraha o Solomone karena o Tavite i bani tagarahia. 4O Josia ki vi tangara, ki vi: “I hato vigamu page tugia rârâ suri agua. I tuguhigamu, vigamu tagara tanga hete na Araha God iami ma tangara na kariana na Isiraelita. Mu nanê, hanana mu goga igê na atohami i ruma ni rotu surigi na apaparaha iami ma na apaneni me iami tangagi na tagaraha iami hehegitigi. 5Mu arâ surigi na tamasinga iana na maneraha o Tavite, manga na maneraha o Solomone i bani râ surigi maninga. Mu gâga igê na atohami hehegitigi i ruma ni rotu surigi na apaparaha iami, suria i tuguhigamu mu mane ni hagarahenga, kamu rahesia na Araha urusira na Isiraelita. 6Mu nahuira na kareta na sipi ma na goti tanga na paseka ma kamu hagarêgi na vogasiha ka nanê tangara na goami na Isiraelita. Hemuri kamu hagarahasia na paseka manga na Araha i bani tamasia i harana o Moise.
7O Josia ki vatera na enoni ga oga i ngekana na 30.000 na bêhâgata na sipi ma na goti ma na 3000 na kareta na puruka. Na marâ ngegana ka na mahatanga ga râ me tenigi na togoha iana na maneraha, hanana i hagamonaria na suruha iana tangara na enoni, na mane ni vogasiha ma na mane ni hagarahenga. 8Na mane ga bâsuria na ruma ni rotu o Gilikia, o Sekaria ma o Jegiele, ngaira ka vatera nogata na mane ni hagarahenga na 2.600 na sipi ma na 300 na kareta na puruka tangagi na vogasiha igê na tangiana raha ngekana. 9Na mane ga bêngenira na mane ni me o Konaniahu, o Semaia ma o Netanele o goana, ma o Gasabia, o Ogiele ma o Jorame ngaira ka vatera na mane ni hagarahenga na 5000 na sipi ma na 700 na kareta na puruka, hanana ga vogasi re.
10-11Na tarani ga akê me kaniga manga igê. Na mane ni vogasiha ma na mane ni hagarahenga, ga tuguni manga hanana i marisita ma ka migirâ me na bereti ga pe ahunga, ngaira ka râ igê na mavoraro tagana ngekana, hanana ga tagarenigi na votovoto tanga na Araha surigi na tamasinga igê na buka ni ramata iana o Moise. Ngaira ka râ tangagi na atohata i maata na enoni surigi na apaparaha iata ma na apaneni me iata hehegitigi. 12Na mane ni hagarahenga ka hanunu na ganiani na vogasiha ni paseka, ma hemuri ka hagagobo igê na kuki, na ani raha ma na ani sisite. Na ganiani ka unuha koro ngavê. 13Hemuri ngaira ka votogi na ganiani tangara na enoni hato. Hato vikana, ma ngaira ka tora tangara so mareta ma tangara na mane ni vogasiha, tenia na varo ninuni iana o Arone, 14suria na mane ni vogasiha ka aruma rârâ mataro me na bungi, ka sungigi na êbeni na ganiani. 15-16Na mane, ga anumasigi na maani para ni ruma ni rotu ma na mane ni kiha i ruma ni rotu, ga mane ni hagarahenga tenia na hagosi ninuni iana o Asapa, henira o Asapa, o Sekaria ma o Etino ga urusia na maneraha, ngaira ka oga tonge igê na atohata surigi na ramata iana na maneraha o Tavite. Ngaira ka pe ahaharaga rârâ, suria na mane ni hagarahenga ka hagarêa na paseka tangara.
17-18Ngekana ngaira ka râ surigi na tamasinga iana na maneraha o Josia. Na hagarahenga hagenani tanga na Araha igê na tangiana ngekana ki râ manâhi. Ngaira ka hagahigasia na tangiana na paseka ma ka vogasi igê na bea ni vogasiha. 19Na Isiraelita hato ga oga i ngekana, ka hagarahasia na paseka ma ka hagahigasigi na tangiani raha ni bereti i pe ahunga surigi na tangiani gi pi. 20Haganega tenia na matena iana na poropete o Samuele mataro me i ngekê ka pe hagahigasia rârâ na paseka manga ngekana. 21-22I mareha rârâ ta na maneraha i nago vige hagahigasia na paseka manga na maneraha o Josia i Jerusaleme henira na mane ni vogasiha, na mane ni hagarahenga ma na enoni hato i Juta me Isiraele. Na tarana ngekana ki akê me igê na tangahuruta matare varu na harisi o Josia i maneraha surigi.
I me o Josia
(2 Maneraha 23.28-30; 2 Sihonga 35.20-27)
23Na Araha ki obakoro renigi na tauhana hato o Josia, suria ngaia ki totosuria maninga ngavê. 24Ma na bani buka ni sihonga ka tamasi nikâ renira na enoni ga haritohea na Araha ma ka usitenia igê na matena i maneraha igê o Josia. Ngaira ka tasi teharira na enoni igê na agua getigi i maveta ma ka hagamangaria ngavê na Araha renigi na bagatauhata. Tahema ngaia ki hagaitangira na Isiraelita.
25I murina o Josia i katogi hato na tarani ngegana, na maneraha i Esipito ki bêngenira na mane ni me, hanana ga meraheariha na ai ni Babilonia i Karegemesi. O Josia ki uhungia vi hagabarasia. 26Ma na maneraha i Esipito ki kasi tamasinga tanga o Josia, ki vi: “Maneraha i Juta, na hearihatana iaku ngekê ki mareha vige tangago igo. 27Na Araha God ki pe hagatorangeniê, hanana vi ve megoheariha igo, ma kê meraheariha hete na merongaku i ve i Uparatesi. God ki panepane heniê. Ngaia ki vi tangê, vi siana kê kakaviaga. Tahema gu mera aporo na mane ni me iamu. Siana ko haritohea na Araha.” 28Ma o Josia ki pe aporo tanga na kati ni me iana ma ki pe mera aporo na mane ni me iana. Ngaia ki pe karingagi na tamasinga iana na Araha, i tamasi i harana na poropete o Jeremia. O Josia ki togeaga ki meheariha. 29Ngaia ki râ ki meheariha igê na bena i Megito. Na mane ga bêngenira na mane ni me ni Esipito ka taharia.
30Na maneraha o Josia ki bonasira na kariana, ki vi: “Mu toreê râ hura tenia na hearihatana. Inê kê mamari ngavê.” Hoi, ngaira ka torea hura ototo râ. 31Ngaia ki tage igê na ani getea na kati ni me ma ngaira ka torea râ tanga i Jerusaleme. Ngaia ki me i ngekana ma ka bagia igê na matahuta na maneraha. 32Na enoni hato i Jerusaleme ka angi maramara renia.
Na poropete o Jeremia ki baro ki ni angiha maramara renia na maneraha o Josia. Na ki ngekana ki tâ tangara na meraha i Isiraele ma na gete iata, hanana ga kiria igê na matena ga angisia igê. 33Na tarani ngegana ka bani segegi so igê na buka ni sihonga renira na maneraha i Juta. Na tauhana hato o Josia, na atana i rongo raha, na marupeani na ramata ma na marâ ga bani akê me igê na ogaha iana, ka bani segegi so igê na buka ni sihonga renira na maneraha i Isiraele me Juta.
O Joagasi na maneraha i Juta
(2 Maneraha 23.30-35; 2 Sihonga 36.1-4)
34Na ai ni Juta ka kasia o Joagasi karena o Josia ki maneraha. O Joagasi ki tonga na tangahuru gi rua matare oru na harisi iana, matena i vora re na maneraha. 35Ngaia ki marungirerua i Juta me Jerusaleme surigi na hageha gi oru. Hemuri na maneraha i Esipito ki hatungia tenia i maneraha, 36ma ki tugurira na Isiraelita ka vuri re na 3000 kilo na siliva ma na 30 kilo na golo. 37Na maneraha i Esipito ki kasia o Joiakimo o vesina o Joagasi ki maneraha i Juta me Jerusaleme. 38O Joiakimo ki kasira na meraha iata na Isiraelita i ruma ni hagaitangiha. Ngaia ki haribona ka rakua o Sario o vesina ma ka meaporo tenia i Esipito.
O Joiakimo ki maneraha i Juta
(2 Sihonga 23.36-24.7; 2 Sihonga 36.5-8)
39O Joiakimo ki tonga na tangahuru gi rua matare rima na harisi iana, matena i vora re na maneraha i Juta me Jerusaleme. Ngaia ki murisigea na Araha. 40O Nebukanesare na maneraha i Babilonia ki sugaria i Juta, ki henahuraua o Joiakimo, ki rakua renigi na seni na kapa ma ki merâ tanga i Babilonia. 41O Nebukanesare ki migirâ vê tani na marâ apuna ni hagarahenga tenia na ruma ni rotu ma ki nakagi igê na ngêsu iana i Babilone. 42Na sihonga renia o Joiakimo henigi na bagatauhana ma na ogaha erataga iana ka bani segegi so igê na buka ni sihonga renira na maneraha.
O Joiakino ki maneraha i Juta
(2 Maneraha 24.8-17; 2 Sihonga 36.9-10)
43O Joiakino ki tonga na tangahuru matare varu na harisi iana, matena i vora re na maneraha urusia o Joiakimo o vaemana. 44Ngaia ki oga i Jerusaleme ma ki maneraha surigi na hagaha gi oru ma na tangiani tangahuru gi tage. Ngaia nikâ ki murisigea na Araha. 45I murina na harisi gi tage na maneraha o Nebukanesare ki rakua o Joiakino ma ki torea i Babilonia. O Nebukanesare ki toregi vê na marâ apuna ni hagarahanega tenia na ruma ni rotu. 46Hemuri ngaia ki kasia o Setekia ki maneraha i Juta me Jerusaleme.
O Setekia ki maneraha i Juta
(2 Maneraha 24.18-22; 2 Sihonga 36.11-12; Jeremia 52.1-3a)
O Setekia ki tonga na tangahuru gi rua matare tage na harisi iana, matena i vora re na maneraha ma ki maneraha surigi na harisi tangahuru matare tage. 47Ngaia nikâ ki murisigea na Araha ma ki usi vige rongoa na tamasinga iana o Jeremia na poropete, i tamasi urusia na Araha.
I Jerusaleme ki vota
(2 Maneraha 25.1-21; 2 Sihonga 36.13-21; Jeremia 52.3b-11)
48O Setekia ki guguruga tanga na maneraha o Nebukanesare, i tuguria ki tohe renia na atana na Araha, vi tototo suria ngaia. Ma ngaia ki pe hagamonaria na tohenga iana. Ngaia ki usi ngavê vige marupegi na ramata iana na Araha God iata na Isiraelita. 49Nikâ na meraha i pasita na enoni ma na mane ni vogasiha ga teha, ngaira ka bagatauhata ma ka aharê igê na ramata teharira na enoni ahuroto hato ga erataga. Ngaira ka hagaerasia ngavê na ruma ni rotu, na Araha i bani hagapunaria. 50Na God iata na êvarita ki bani ama ni hagatorangenira me nga na poropete, hanana ga ramonira ka murisigegi na bagatauhata, suria ngaia ki obania vi hagatahira ngaira ma na ruma ni rotu. 51Ma na matena na Araha ki tamasi i harata na poropete iana, na enoni ka mera merabe ma ka rurusira. 52Ki rârâ ma na Araha ki mangariaga ngavê tangara na kariana renigi na bagatauhata. Tahema ngaia ki bonasira na maneraha i Babilonia ka taharira. 53Na me ni Babilonia ka mutera na mane na gapu haoru ni Juta rihia na ruma ni rotu. Ma ki pe tahi rârâ tani, henaka ma vi na kare se vi na gemêa, na mane se vi na gete. Na Araha ki tagarenira ngaira hato tangara na merongata. 54Na ai ni Babilonia ka toregi vê na ara ni marâ apuna hato ni hagarahenga tenia na ruma ni rotu henigi na bokesi ni haga ma na ruruguha iana na maneraha. Ngaira ka migirâ na ara ni marâ tanga i Babilone, mareha rârâ vige hita so tani. 55Ngaira ka hagamakaka na ruma ni rotu, ka hogea na para ni hinua ma ka sungigi na bebetehe igê. 56Ngaira ka hagaerasia ngavê na bâkorohana. O Nebukanesare ki bonasira na mane ni me iana ka merarâ tanga i Babilone na ani hato ga tahitahi mêngara. 57Ngaira ka vora re na kare rakuraku i ngekana ma ka tagara tanga ngaia ma na ani ga heheuri ka maneraha urusia mataro me ki akê me na raramohana i Pesia teharia i Babilonia. Ngekana na Araha ki hagamonaria na tamasinga iana i harana o Jeremia na poropete, i vi: 58“Na agua ki page aruga ma ki hihiruga surigi na harisi tangahuru gi pi, hanana i mamaro ararigi na harisi na enoni ga pe hagahigasia surigi na tangiani ni mamaroha.”
Currently Selected:
1 ESETARASE 1: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific