1 KORINTO 16
16
Na haga tangara na goaka igê na tongesuriha
1Hoi, i ngekê be tamasi sisite renia na hakuha ni haga, hanana ga tamanira renigi na kariana God i Jutea. I tuguhigamu, mu katoa na tarana, gê bani bonasira renia na haku na enoni, ga tongesuri, ga goga i Galasia. 2Na ara ni Sate na ara ni hitangimi ki tuguhia, i bani nakanaka kasigi tani na haga, ga araria na haga, i nahunia, hanana mu pe hakuhaku haga, matena gê page vatugigamu igê. 3Matena gê vatugigamu, inê kê page hagatorara na mane, mu hagêguritogo renira, hanana ga torea na mahatanga ni haga iami tanga i Jerusaleme. Ma inê kê page vatera na leta, ga hagagirarara renira. 4Manga i arariê, vi gê arâ nogaku, hanana mi tage arâ.
Na suruha na râha iana o Paulo
5Inê be vatugigamu, matena gê vatugia hato i Masetonia, suria inê kê page vatugia i Masetonia. 6Inê be oga henigamu arihu sisite vari, vari igê ki na matena hagenani na gari, ma hemuri igamu kamu girara mu kahu tamaniê, hanana gê uria na râha iaku. Ma i ngekê inê kê pe girara mênga, vi i he kanigê page arâ nikâ igê. 7Suria inê kê pe obania, ve riritare tenigamu. Inê kê obania, ve oga arihu henigamu, manga vi na Araha ma ki hagamarumungeniê.
8Ma inê kê kato, vi gê gâga ikê i Epeso mataro me na tangiana na Pentekosite. 9Renia ikê i Epeso ki hagagara koro tangê, vi gê tarohenia igê o Kirisito, henaka ga rako na enoni, ga ura pusiê.
10Manga o Timoti, ma ki vatugigamu, ki ararigamu, vigamu manatangenia, hanana i obâbakoro, suria ngaia ki tagara tanga na Araha manga inê. 11Siana ta na enoni ki ruhia. Ma ki tuguhigamu hete, mu tamania, hanana i uria na râha iana, ma siana ta na tarana ki hagabarasia, matena vi aporo me i pasiku, renia inê ma na goaka igê na tongesuriha ikê kami naasia.
12Hoi, ta na marâ renia o Apolo, na goaka igê na tongesuriha. Inê kê bani kanukanua hagarako, hanana vige vatugigamu, i takura tani na goaka igê na tongesuriha, ma ngaia ki vi, vi mamênga na matena iana, vi ge arâ igê. Ma ngaia ki page arâ, manga vi ngaia ma ki nahunia na matora.
Na hatongina na leta
13Mu hinaru. Mu nganganihaga igê na tongesuriha. Mu ramoramo. Mu nganganihaga. 14Mu hagabângenia na takuiha igê na ara ni marâ, mu tanugi.
15Igamu kamu bani girara o Setepana ma na ahemata iana. Ngaira ka hagenago ka têa na tongesuriha i Agaia, ma ka tagara bâraha, hanana ga tamanira na kariana God. Goaku igê na tongesuriha, inê kê nungigamu nga, 16hanana mu têtê viteata na enoni mangara na ani ngegê, ma na viteata na enoni hato, ga tagara bâraha manga ngaira.
17Inê kê vagevage, renia ga râ me o Setepana, mo Fotunato mo Agaiko. Ngaira ka hagakoro obaku, suria inê kê arisigamu. 18Ma ngaira ka nganinganiê, tagenana manga ga bani nganinganigamu igamu. I tuguhigamu, vigamu visira koro na enoni mangara na ani ngegana.
19Na haku na enoni, ga tongesuri i na apanena i Asia ka hagamauru koro tangagamu. O Akuila ma ka Pirisila ma na haku na enoni, ga tongesuri, ga râ me haku i ruma iaterua tanga na hagarahenga, ka hagamauru koro tangagamu, suria igia ka obahaku henia na Araha. 20Na goaka hato igê na tongesuriha, ga oga ikê, ka hagamauru koro tangagamu.
Mu nunugugamu heri, manga i marisita na enoni, ga tongesuri.
21Inê mareku kê sege: “Inê Paulo kê hagamauru koro tangagamu.”
22I page tarahua na eraha na ani mavê na enoni, i pe takuia na Araha.
Ga nungi: Araha, gu râ me!
23Inê kê nungia na Araha o Jesu, ki korokoro tangagamu.
24Inê kê takuigamu hato, suria igia ka obahaku henia o Kirisito Jesu.
Currently Selected:
1 KORINTO 16: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific