1 KORINTO 15
15
Na mêriha aporo iana o Kirisito
1Hoita, goaku igê na tongesuriha, i ngekê inê kê obania, gê hagatakusigamu renia na Taroha Koro, gê bani tarohenia tangagamu, ma igamu kamu bani têa. Na Taroha Koro ngekê ki na hunana na tongesuriha iami. 2Igamu kamu tahi renia na Taroha Koro, manga vigamu taua gatagata na Taroha Koro, gê bani ateate renia tangagamu, manga vi igamu ma kamu pe tongesuri purupuru ma.
3Inê kê hagatarêngenia tangagamu na tarana i raha teha, na enoni getera ga hagatarêngenia tangê. Ngaia ki manga ikê: o Kirisito ki me renigi na tasi iaka, tagenana manga na Buka Apuna i vi: 4Ga naka, ma ngaia ki mêri aporo igê na oruta na tangiana, ma ki manga na Buka Apuna i bani visia. 5Ngaia ki vora tanga o Petero, ma hemuri tangara na aposotolo hato tangahuru matarerua. 6Ma hemuri ngaia ki vora tangara na kariana tangarê gi rima ma ki asiba. Tani na hitangita ka mauri mênga, ma tani ka bani me. 7Ma hemuri ngaia ki vora tanga o Jakobo, ma hemuri tangara na aposotolo hato.
8Ma i hemuri tagana ngaia ki vora tangê nogaku, henaka vi inê kê manga na ataka vê ma na marâ, ga apara me. 9Inê ki na ataka mavê na enoni i berarogata na aposotolo hato. I pe arariê, vi ge visiê, vi na aposotolo, suria inê kê merongasira na haku na enoni, ga tongesuria God. 10Ma suria God ki takiê ma ki tamaniê, tahema inê kê manga ngekê. Ma na takuiha ma na hetamaniha iana ka pe tagara purua ma i pasiku. Inê kê bani tagara raha teharira hato na aposotolo getera. I monari, inê mareku kê pe tanugi, ma God ma, kani takuiê ma ki tamaniê. 11Vikê, henaka vi râ me teniê inê, se vi tenira ngaira, igami hato kami tarohenia tagenamami na tarana ngekê, ma na taroha ngekê igamu kamu tongesuria.
Na mauriha aporo iaka
12Hoi, manga na taroha iamami, ma ki vi, vi o Kirisito ki bani mêri aporo tenia na mera, tanu hega, tani na hitangimi kaniga vi, vi na enoni, ga me, ki asa iata, vi ge page mêri aporo? 13Manga vi na enoni, ga me, ma ki asa iata, vi ge page mêri aporo, o Kirisito ki asa vige mêri aporo nogana. 14Ma ki manga vi o Kirisito, ma ki pe mêri aporo tenia na mera, na ateateha iamami ki vora vi na marâ purua ma, ma na tongesuriha iami ki vora vi na marâ purua ma nogana. 15Ma ta na tarana nikâ: na tarana ngekê ki visigami, vi gami hagaparu renia God, suria igami kami bani visia, vi ngaia ki hagamêria aporo o Kirisito tenia na mera. Ma ki asa, vi ge hagamêria aporo, manga vi na enoni, ga me, ka pe mauri aporo. 16Suria manga vi na enoni, ga me, ma ka pe mauri aporo, o Kirisito ki asa vige bani mêri aporo nogana. 17Ma ki manga o Kirisito, ma ki pe bani mêri aporo, i ngekana na tongesuriha iami ki vora re na marâ purua ma, ma na tasi iami ka rakugamu mênga. 18Ma nikâ i vi, vi na enoni ga bani me, ga tongesuria o Kirisito, ka magahuru ngavê. 19Manga vi igia, ma ka naasigi na marâ koro tenia o Kirisito igê na mêriha iaka i ngekê ma, manga ngekana igia ka era ngavê teharira na enoni getera i maveta.
20Ma ki monari, o Kirisito ki bani mêri aporo tenia na mera, hagenago tarata na enoni, ga me, ka page mauri aporo nogata. 21Na mera ki râ me i maveta tenia na mane. Ma ki tagenana ma na mêriha aporo ki râ me tenia na mane. 22Na enoni hato ka page me, suria ga usuria o Atama, ma ki tagenana ma na enoni hato ka page mauri aporo, suria ga usuria o Kirisito. 23Ma na ara ni hitangita ki nahunia na matena iana, i araria: o Kirisito ki hagenago tarata; ma i hemuri na kariana o Kirisito igê na râha aporo me iana. 24Hemuri ki page râ me na hagahatungina. O Kirisito ki page teharira ma ki page hagamagahurura na marâ hato, ga araha ma ka ramata, ma ka nahuni ramoha, ma ki page hagatarêngenia na Arahanga tanga God Vaemana. 25Suria o Kirisito ki araria, i araha mataro me na matena God ki teharira igê na merongana hato, ma ki purira so i ano. 26Ma i hemuri tagana ngaia ki page teharia na merongana, ngaia ki na mera. 27Suria na Buka Apuna ki vi, “God ki vatea, ki marungigi na ara ni marâ hato.” Na tamasinga i vi “na ara ni marâ hato”, ga rongo mataha, ga pe hagatarobêa God suria God ki atea o Kirisito, ki marungigi. 28Ma na matena na ara ni marâ hato ka gâga i marungana o Kirisito, hemuri o Karena God ngaia marena ki naka marena i marungana God, i bani nakagi na ara ni marâ hato i marungana, ma God ki page marungira hagenani na marâ hato.
29Hoita, i hega, manga vi na enoni, ma ka têa na batesimo tangara na enoni, ga me? Ngaira ka kato vikana tanga na ta? Ngaira ka vi, vi na enoni ga me ki asa, vi ge mêri aporo. Manga vi monari, tanu hega kaniga têa na batesimo tangara na enoni, ga me? 30Ma ki hega igami? Suria i hega igami kami aganarigi tare na mamasiaganiha na mera? 31Goaku igê na tongesuriha, na mamasiaganiha na mera ki tarahuê tare i na ara ni mateni. Inê kê tamasi vikê, suria inê kê ageage renigamu, renia igia ka obahaku henia o Kirisito Jesu na Araha iaka. 32Manga inê, ma be meheariha ta na marâ vasiga ikê i hinua i Epeso, suria vi gê takuiê mareku ma, na marâ koro ta, kani vigê page nahunia renia, manga vi na enoni, ga me, ma ka pe mauri aporo? Manga ngekana, igia ka arâ suria na tamasinga, i vi, “Nika, ge ngê ma ke tono, suria i gomaha igia ka page meme!”
33Siana na enoni ka hagabekasigamu. “Na enoni era ka hagatasira na enoni koro.” 34Mu urisi parongami, ma siana kamu tasitasi nikâ. Be vi hagamakigamu: tani na hitangimi ka pe girara God.
Na mauriha aporo ni apeka
35Ta na enoni ki hagate vari, ki vi, “Manga i he na enoni ga me kaniga girara viga mauri aporo? Na apeta ka page bâbâ manga i he?” 36Igo ko hagate beka! Matena go hasia na marâ manga na pini, ki asa, vi ge baogo, manga vi ngaia ma ki pe meme. 37Ma na marâ, go hasia, ngaia ki na maana ma, vari na maana na koni, se na marâ vigana, ma ki mareha vi gu hasia na ani, i bani baogo ma ki bani akê. 38God ki katoa na maana, go hasia, ki baogo ma ki voravora na apena, i obania. Ngaia ki katogi na maani na ara ni marâ hegitigi, ka baogo ma ka voravora na apeni, ga ararigi hegitigi.
39Tahema na hasigota na marâ, ga mauri, ka pe râ haku. Ngaira hato ka tora hegitigi: na hasigota na enoni, ma na hasigota na marâ i bemu, ma na hasigota na manu, ma na hasigota na siare.
40Ga oga na marâ i vavearo, ma ka oga na marâ i maveta. Na bâkorohata na marâ i vavearo ma na bâkorohata na marâ i maveta ka bâ hegitigi. 41Na bâkorohana na arito, ma na bâkorohana na hageha, ma na bâkorohata na higu ka bâ hegitigi; ma nikâ na bâkorohata mareta so na higu ka bâ hegitigi.
42Matena na enoni, ga me, ka mauri aporo, ki page manga ngekana nikâ. Na marâ, i girara i meme, ka naka, ma na marâ, i mauri aporo, ki asa, vi ge page me. 43Matena ga naka, ngaia ki bâbâ mamêkuga ma ki pe ramoramo. Matena i mauri aporo, ngaia ki na apena i bâkoro ma ki ramoramo. 44Matena ga naka, ngaia ki na apena, i girara i meme. Matena i mauri aporo, ngaia ki na apena i mauri tare, suria i gâga na apena, i girara i meme, tahema i gâga nikâ na apena, i asa, vi ge page meme. 45Renia na Buka Apuna ki vi: “God ki hagavora hagenago na mane o Atama. Ngaia ki na marâ mamauri.” Mo Atama, i hagemuri, ngaia ki na Higona, i hagamauri. 46Na apena, i asa, vi ge page me, ki arâ me hagemuri; ma ki hagenago na apena, i girara i meme, ma hemuri na apena, i asa, vi ge page me. 47O Atama, i hagenago, ki vora me tenia na mako; na ruata o Atama ki râ me tenia God. 48Na ani i maveta ka usuria na ani, i vora me tenia na mako; ma na ani i pasina God ka usuria na ani, i râ me tenia God. 49Matena igia ka gâga i maveta ikê, igia ka na nununa na mane, i vora me tenia na mako; ma ki tagenana ma, i muri me, igia ki na nununa na Mane, i râ me tenia God.
50Gaku igê na tongesuriha, na takotako iaku ki manga ikê: na enoni, i tonga na hasigona ma na gapuna, ki asa, vi ge oga igê na Arahanga iana God. Ma na marâ, i girara i meme, ki asa, vi ge page mauri tare.
51Mu rongo! Be visia tangagamu ta na marâ, i pinihi tenira na enoni, ga pe tongesuri: i asa, vi igia hato ke me, ma igia hato ka page paraparama, ma ka riariaga; 52i rêrê, manga na matena go piringi maa, matena na ahuri ki angi ma ki arâ su. Suria na matena i angiangi igê na ahuri, na enoni, ga me, ka page mauri aporo, ma ki asa, vi ge page me nikâ, ma igia hato ka page riariaga. 53Suria na marâ, i girara i meme, ki tuguhia, i voravora renia na marâ, i asa, vi ge page me. Ma na marâ, i girara i magahuru, ki tuguhia, i voravora renia na marâ, i asa, vi ge page magahuru. 54Matena na marâ, i girara i meme, ki bani voravora renia na marâ, i asa, vi ge page me, ma matena na marâ, i girara i magahuru, ki bani voravora renia na marâ, i asa, vi ge page magahuru, na tarana ngekana ki page hagamonaria na tamasinga igê na Buka Apuna, i vi:
“Na mera ki hato!
Igia ka teharia!
55E, Mera, igo ko teha vari, iê?
E, Mera, i he na tangaruha iamu?” 56Na tangaruha iana na mera ki na tasi, ma na raramohana na tasi ki râ me tenia na Ramata. 57Ga visia koro God, i katogia, ka teha igê na raramohana na Araha iaka o Jesu Kirisito!
58Tahema goaku hetakui igê na tongesuriha, mu ramoramo, ma kamu rêra gatagata. Mu arumasigi tare na tagaraha iami tanga na Araha, suria mu bani girara, vi manga mu tagara tanga na Araha, igamu ki asa, vi gamu tagara purua ma.
Currently Selected:
1 KORINTO 15: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific