Salmos 40
40
Notasorentsite, onimotaquena nantero picoacaanari
(Ivampoyeane David)
(Sal. 70.1-5)
1Noyeacotaqueri Tasorentsi,
ari iquemaquero nocajemaqueriri;
2yoavisaacotajana caari nocamanta;
oquempevetaca yaajana, noquiavetaca tsampovatsajaqui;
aisati oquempevetaca yoajana imperitaqui,
nosavicantajari cameetsa.
3Iotacaajanaro iroaquerari pampoyeantsi,
nopampoyeacotiri Atasorentsite: Icameetsati.
Oshequi quemajeitaquerori iquimoshiretasanotanaque
aisati ishiretasanotacari Tasorentsi.
4¡Iquimoshireti shiretariri Tasorentsi,
caari coatsine incarateri shemejeitatsiri
aisati pincatsatashiyetariri ijitasorentsitashiyeetari!
5Notasorentsite, oshequi pimayetaqueri caari noneapiniti,
aisati maaroni pipajeitaquenari.
¡Tecatsi quempetempine!
Noncoavetearica nonquenquetsatacotero maaroni,
eiro nomatirotsi nontsoteero.
6Te onimotempiji noapinitempiri virantsi
aisati nompapinitempiro panquirentsi nocashiacaimpiri,
Te pincoacotena nontaasanotempiri virantsi,
pimpeacotantenarori caari cameetsatatsi nantiri.
Irointiquea pimatacaaquena nonquemisantasanotempi.
7Irotaque nocantantacari: “Jerocana meeca;
tempa irotaque ocantacotanari Sanquenarentsi:
8Onimotasanotaquena, Notasorentsite,
nantempiro picoacaanari.
¡Tempa noquenqueshiretapinitiro picantacantiri!”
9Yapatojeitanta maaroni pishanincajeitajari,
noametaqueri cameetsatasanotatsiri.
¡Tasorentsi, piotaquena, te nomajereteji!
10Te nomaneroji noquenquetsatacotimpi: picameetsatasanotaque,
aisati nocamantacotaquero piquearioventiro picantaqueri
aisati poavisaacotanti.
Te catsini nomanapitsateriji pinintaqueri
aisati piquearioventiro pishanincatacari.
11Tasorentsi, ¡eiro pojoquirotsi pincavintsayena!
¡Pincanteani pinquempoyeacoventena;
tempa pinintasanotana aisati piquearioventiro picantaquenari!
12Tempa avishimotaquena oshequi catsini pomerentsitantsi,
te nomatimateroji niotero jaocarica ocaratiri.
Oashinoncaajana nantayetaqueri, anaanaquero ocarati noishi;
te nomatajeaji namenaje aisati te nonquimoshiretanaje.
13¡Notasorentsite, nocoi pojocaacoventena,
caate shintsini pamitacotena!
14¡Panaacojeiteri coavetachari iroyena, pincomitacasanoteari!
¡Irishiajeitanaqueta maaroni coatsiri iroashinoncayena!
15¡Irishiajeitanaqueta shirontimentanari,
impashiventanaquea!
16Irintiquea maaroni aventajeitimpiri,
inquimoshirejeitanaqueta,
aisati maaroni coasanotatsiri poavisaacoteri,
incantapinite: “¡Ipincatsaritasanoti Notasorentsite!”
17Naintiquea, oshequi nashinoncaaca, opomerentsitimotaquena;
Novincatsarite, eiro pipeacotanatsi,
tempa avirotaque amitacotanari, jocaacoventanari.
¡Eiro pisamanititsi, Notasorentsite!
Currently Selected:
Salmos 40: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
