Proverbios 31
31
Ocantayetiriri iriniro Lemuel
1Jero ocantiriri iriniro Lemuel, pincatsaritatsiri Masaqui:
2Notomi, pinquemisantena, narotaque timimpiri;
tempa iquemaquena Tasorentsi nocantasanotaqueri,
irotaque notimantaquempiri.
¿Paita noncamantempiri pashini?
3Eiro pishintsitimentiro pincoashiyetearo tsinanepee;
tempa irotaque peacaajeitacariri pincatsariyetatsiri,
4Aisati te oncameetsateji, Lemuel,
yora pincatsari aisati jivatacantayetatsiri
irirayetero ovaja jero shintsijayetatsiri;
5tempa ario impeacojeitanaquearo icantacoventanti cameetsa,
eiro ineshinoncatanajiritsi caari piacoventachane.
6Aitapaaque pirayetaquero ovaja cachojatatsiri aisati shintsijayetatsiri;
irointi irajeitiri oashirejeitachari.
7Irirajeiterorica, eiro iquenqueshireanajirotsi,
intsoncacotea aisati irashinoncaajeitea.
8Pincantacoventeri cameetsa yora itsenqueetiri;
¡pimpiacoventeari yora caari piacoventachane!
9Pincantacoventeri aisati pamitacoteri;
¡pojocaacoventeri coiteavetatsiri aisati caari piacoventachane!
Ineacameetsayeetiro tsinane cameetsatatsiri osaviqui
10Pomerentsi aneantearori tsinane savicatsiri cameetsa;
¡anaacotiro mapijaniquipee pinatasanovetachari!
11Yora ojime te iraamayemparo paita antayeteri,
aisati te oncoiteimoteariji paitarica aayetiri.
12Ocantani maaroni quitaiteripeequi oveshireacaari ojime.
13Ojati amananti iviti ovisha jero lino,
cameetsa oquimoshireventiro antaveeyetiri.
14Oquempevetacaro antearo pitotsi poneatsari areejiqui amayetirori ovararontsipee.
15Otinaita tequerata onquitaiteaje,
ocoventiri otomipee aisati onampirepee.
16Amenanontiro quipatsi cameetsatatsiri aisati amanantiro,
ora aantayetari antaveerequi, irotaque amanantantayetari opanquiyetiri ovamashi.
17Ocantani oshintsiventiro antaveeyetapiniti quitaiteripeequi.
18Amenacoventiro cameetsa opimantayetiri,
ocantani antaveeti irosati ontsitenitanaje.
19Irosati quiricayetatsi aisati otijayeti quitsaarentsipee.
20Ocantani amitacotiri ashinoncaincari aisati coiteaveetatsiri.
21Te onquenqueshireacoteriji otomipee ayeri iyatsincare; tempa otijanontayetiri iquitsaatari.
22Irosati antanontacha ovashicaropee
aisati oquiitsaataro jentamaotasanotatsiri.
23Yora ojime iotasanotiri inampiquiniri,
aisati ipincatsatasanoyeetiri.
24Aisati otijayetiro quitsaarentsi jeri shintoropee,
opimantayetiniri amanantayetatsiri.
25Ocantani oshintsiventiro antaveetapiniti aisati ipincatsajeitiro oshanincapee;
te onquenqueshireacotero avisayetatsineri quitaiteripeequi.
26Ocantani oneanatantaro cameetsa iotantsi,
aisati onintasanojeitiri oamejeitiri.
27Cameetsa amenacoventasanotiro timimoyetirori ovancoqui,
te catsini oacotantayeteaji, irosati antaveenontacha.
28Yora otomipee aisati ojime ineacameetsatasanotiro; icantiro:
29“¡Oshequi onaveta tsinanepee savicatsiri cameetsa,
iro cantaincha panaacotasanotiro avinti!”
30Ocameetsavoroveta tsinanepee aisati oanencayeveta,
iro cantaincha amatavitanti, ari ompeanajea;
irointiquea tsinane pincatsatiriri Tasorentsi,
ocameetsatasanoti; iriveshireimenteetearo.
31¡Pincantacotero maaroni nampitsiquiniri: “Ocameetsataque”!
¡Piveshireimentearo maaroni omayetaqueri!
Currently Selected:
Proverbios 31: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
