Proverbios 30
30
Icantayetiri Agur
1Yora Agur, itomini Jaqué Masaquiniri, icantiri Itiel jeri Ucal, icantajeitiri:
2Te niotasanoteji catsini, nanaacotaqueri itsipapee te nioteji.
Te ontimimotena noquenqueshireantari.
3Te ontimimotenaji iotantsi; te catsini niotacoteriji Tasorentsi cameetsatasanotatsiri.
4¿Jaanicampa matirori ijati inquitequi aisati ipiajaro aca quipatsiqui?
¿Jaanicampa matirori tampea yajiriquiro?
¿Jaanicampa matirori incajare yampinaiquiro iitsaarequi?
¿Jaanicampa oaquerori overapaaca quipatsi?
¿Jaanicampa iotirori ivajiro aisati ivajiro itomi?
Piotirompa, pincantename.
5Yora Tasorentsi yojocaacoventiri shirejeitariri;
oqueariotasanotaque maaroni icantasanotaqueri, ocameetsati ashirejeitearo.
6Eiro catsini povaayetajirotsi icantaqueri;
tempa ari incantimentaquempiro, aisati incantempi, avinti tseeyari.
7Notasorentsite, ocarati apite noncoacotempiri,
pimatasanotenaro tequerata meeca noncame:
8pojocaacoventenaro caari queariotatsi aisati tseeyantsi,
eiro pishinetanatsi nashitaarantea aisati noncoiteayete;
irointi pimpenaro coiteimotanari noyeari.
9Ariorica ontimimotasanoyetena paitapeerica,
aitaque nompeacotanajempi, noncante: “Te niotempiji”.
Ariorica oncoiteimotaquena, ario noncoshitaque,
aitaque nontseencanaquempi.
10Eiro picantimatiritsi iperanayeetari, iquemimpicari peranatariri;
tempa ario incantimatanaquempi iriori, impoiji pashinoncaimentearo pantaqueri.
11Ainiro atiri oamaimatiriri iriri,
aisati te irineacameetsatero iriniro.
12Ainiro jitacantashitachari icameetsajeiti;
iro cantaincha te irojoquero irantane.
13Ainiro jitacantashitachari irioperotasanojeiti;
irotaque itseencajeitantariri itsipapee.
14Ainiro timatsiri isataamentopee, iro timimoterineme irajipee,
aisati iotsirojaniquitepee, iro timimoterinemeri itsitipancanaaji,
intsoncasanotanteariri coiteaveetatsiri nampitsiquiniri.
15Yora penta timatsiri apite irishinto,
apaniro ioti ocoacotantapiniti.
16Ainiro caratatsiri 4 apanivanimotirori ocoiri:
ora omoro yoanteetariri camatsiri,
ora tsinane shiravaro,
ora quipatsi pirijatatsiri,
jero paamari coasanotatsiri tsitsi.
17Yora caari neacameetsaterine iriri aisati shirontimentarori iriniro anteashipataquerica,
ocameetsati inquitsoreajaquiteri iroquipee tisoni aisati paquitsa iroyeari intsonqueri.
18-19Ainiro caratatsiri 4 oacaanari cavaco caari nomati niotacotero jaoca icantajeitari:
jaoca icanta paquitsa yarayeti jenoquinta,
jaoca icanta maranque inoshica imperitaqui,
jaoca icanta antearo pitotsi avishiro incajare,
aisati jaoca icantari shirampari tsipatarori tsinane.
20Jero ocantari tsinane aimentariri ojime:
antaqueririca shirampari impoiji oncaataje, ari oncante: “Tecatsi nante.”
21Ainiro caratatsiri 4 caari yamaveyeeti oimintsaroiriri atiripee:
22yora nampirentsi pincatsaritanajantsiri,
yora caari iotatsi otimimotasanotiri yoari,
23ora tsinane caari icoyeeveta, aajantsiri ojime,
yora nampirentsi poyeetanajearone nampitarori.
24Aca quipatsiqui timatsi caratatsiri 4 irijaniquiyevetachari iotasanotatsiri, yanaacotiri ioyevetachari:
25yora sancoripee oshequianti ini, te irishintsiveteaji,
icantani ipiononta iroanaro osarentsiqui;
26yora quiimapee te iroshequitasanoveteaji,
iro cantaincha itimajeiti oshetayeti imperita;
27yora tsinaropee, te aneajeiveteariji jivaterine,
iro cantaincha cameetsa iquisoavacaajeita jaocarica irijateri;
28iro cantaincha macotajaniquipee yajiriqueetiri acotsiqui,
aisati yareeta ivancoqui pincatsari.
29Ainiro caratatsiri 4 caari tsaroatsi, neaperotachari yaniijeiti:
30yora anteariite maniti covencatatsiri, tecatsi materine iroimishiyeeteri aisati tecatsi ampitetearine;
31yora teapa shemetatsiri,
yora shirampari chiivo,
aisati pincatsari jivatacairiri manajeitachari.
32Teerica pioteji pijitacantashitaca avirori pipincatsariti,
aisati picoashitaca pantero caari cameetsatatsi;
ocameetsati pinquenqueshirempa.
33Ariorica pimpishaajateri otsomija vaca, ari paavaque orejipatsa,
aisati pantisanquerica shintsi piirinaqui, osotoantanaque piraja;
pinquisacayemparirica itsipa, ari pantantaque.
Currently Selected:
Proverbios 30: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
