Proverbios 22
22
1Iro cameetsatasanotatsiri irineacameetsatasanoyeetee antimerica cameetsa,
anaacotiri intimimotasanoyevetee oro jeri plata.
2Yora ashitaarantincari aisati coiteaveetatsiri iquempeavacaajeitaca,
iriotaque Tasorentsi vetsicajeitaqueriri apiiteroqueti.
3Yora quenqueshireachari yamaacoventasanotaro covencayetatsiri, eiro avishimotantaritsi;
irintiquea caari quenqueshireacha, aiquero irijatatiye inquemaatsitearo.
4Yora caari shemetatsi aisati pincatsatiriri Tasorentsi,
oshequi timimotasanoterineri,
impincatsayeeteri aisati intime cameetsa.
5Eiro itimitsi cameetsa yora caari cameetsatatsi, oshequi ompomerentsitimoteari;
irintiquea aamaventacotachari irisati, eiro yantantarotsi paitapeerica.
6Ocameetsati poameteri cameetsa jananequi ainiroquera ijananequiti;
eiro catsini ipeacotantarotsi ariorica irantearitanaque coajica.
7Yora ashitaarantincari ipincatsariventiri coiteaveeyetatsiri;
aisati pimantatsiri quireequi, ipincatsariventiri coacotantayetatsiri.
8Yora antirori caari cameetsayetatsi, irosati irineajeri oashinoncantsipee;
¡yora Tasorentsi intsoncasanotantajeari iisanca!
9Yora intacotariri itsipapee, intasoncacoventeeteri iriori;
tempa ipaarantapinitiri yoari coiteaveetatsiri.
10Irojoqueeteririca cantimatantatsiri,
ari ompeanajea antavacantsi aisati tseencantsi.
11Yora pincatsari ineacameetsatiri cameetsashiretatsiri,
aisati irishanincatajeari neaveetatsiri cameetsa.
12Yora Tasorentsi icantani yamenacoventiri iotatsiri;
irintiquea icantacoventi itseeya.
13Yora peranti te incoyeji irantaveete, icantashiyeta:
“Anta nianqui avotsi timatsi anteariite maniti icoaque iroyena.”
14Ora tsinane aimentariri ojime oneanaveta cameetsa,
oquempetacaro quianarentsi tsompoinatatsiri ipariantapinitari yoashinoncairi Tasorentsi.
15Ora iquenqueshireyetiri evancaripee, te ojiteari,
iro cantaincha impasatimenteeterica, ario iriotanaje.
16Yora oashinoncairiri coiteaveetatsiri irashitaarantanteari,
aisati pimantiniriri ashitaarantincari, intsoncacotanaquea.
Caratatsiri 30 icantayetiri iotatsiri
17Pinquemavaquero maaroni icantimpiri iotasanotatsiri; pinquenqueshiretasanotero noametasanotempiri. 18Oncameetsatimotempi pinquenqueshiretapinitero aisati pampiitapinitero maaroni. 19Meeca niotacayempiro pimatanteari pishiretasanoteari Tasorentsi. 20Nosanquenatacotaquempiro 30 nocantayetimpiri piotanteari, aisati pinquenqueshiretanteari; 21noametasanotempiro piotantearori queariotasanotatsiri, aisati pimatanteari panqueri cameetsa jaanicarica sampitempine.
— 1 —
22Eiro picoshitiritsi coiteaveetatsiri, pineaqueririca tecatsi timimoterine,
aisati eiro poashinoncatashitaritsi cantacoventantatsiriqui caari materone irojocaacoventea.
23Tempa ario impiacoventaqueari Tasorentsi,
iroashinoncaasanoteri jaanicarica oashinoncayerine.
— 2 —
24Eiro pitsipavintsataritsi aisati picarateri caari neashitantacha aisati quishincari,
25pantirocari avirori caari cameetsatatsi yantapinitiri,
pashinoncaajeitacari, oquempetimotimpicari pishiticasanotaca.
— 3 —
26Eiro picantiritsi ireevitantatsiri:
“Naro pinacoventempine.”
27Teerica intimimotasanotempi pimpinacoventeriri,
aitaque iraapitsataquempiro pimaamento.
— 4 —
28Eiro povaayetajirotsi yoaticashitironiri iipatsite intacantajeitaquempiri.
— 5 —
29Yora antaveetasanotatsiri cameetsa, iriotaque antaveetenerine pincatsaripee:
eiro yantaveetiniritsi caari neacameetsatatsi.
Currently Selected:
Proverbios 22: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
