Proverbios 21
21
1Yora Tasorentsi iotacairi pincatsari icoacairiri irantayeteri;
iquempetiro iquenaajatacairo nijapee.
2Yora atiripee ijitacantashiyetaro ocameetsati maaroni yantayetiri;
iro cantaincha irio Tasorentsi cantatsiri ocameetsatirica icoayetiri, irompa teerica.
3Icoasanoti Tasorentsi antayetero cameetsayetatsiri;
anaacotiri virantsi itaapiniyeevetari.
4Yora caari cameetsajeitatsi ishemei aisati ijitacantashita iotasanoti,
irointi iquenqueshiretaque caari cameetsatatsi.
5Ora iquenqueshireasanoyeetiri cameetsa iranteri, aitaque irimataquero;
irointiquea yantashiyeetari intsipaite, oshequi oncomitimoteari.
6Ora ovaararontsi yaashiyeetari itseeyacoventeetari, intsipaite otsonquita;
irotaque incamimentantearori coirori.
7Yora caari cameetsajeitatsi irosati tsoncacantajeitajerine yoashinoncantayeti;
tempa te incoyeji irantero cameetsayetatsiri.
8Yora caari cameetsatatsi te irisavique cameetsa, irointi yamatavitanti;
irintiquea cameetsatatsiri, ocameetsatasanotaque yantayetiri.
9Ocameetsati intime atiri otataroqui pancotsi apaniro,
anaacotiro intimantearo antearoite pancotsi irisavicacantearori tsinane quishincaro
10Yora caari cameetsajeitatsi irointi iquenqueshiretiro irantero caari cameetsayetatsi;
eiro catsini ineacameetsatimatiritsi icarajeitiri.
11Ariorica iroashinonqueeteri cantimatantatsiri, ari iriotanaje iriori caari quenqueshireacha;
irintiquea iotatsiri, aparo iroameyeetaqueri, iriotanaque.
12Yora Tasorentsi cameetsatasanotatsiri, iotacotiri caari cameetsajeitatsi jaoca icanta isavicajeiti;
ishinecoventiri intsoncajeiteri.
13Yora caari intacotearine coiteaveeyetatsiri paitarica incoacoveteariri,
aisati iriori, eiro intacoyetaritsi incoavetearica iramitacoyeeteri.
14Yora quenqueshireachari impashitantea cameetsa,
icatsimareacaari quisasanovetachari.
15Ariorica incantacoventante cameetsa, yora cameetsatatsiri inquimoshiretasanote;
irintiquea antayetirori caari cameetsatatsi, irashinoncaajeitea.
16Yora caari antiro yantayetiri quenqueshireachari,
irijate itiminta camatsiri.
17Yora coasanotirori inquimoshiretashitea
irirero cachojayetatsiri aisati intiriyetearo casancajayetatsiri,
intsoncacotasanotea; tecatsi timimotajerine.
18Yora amatavitantatsiri aisati caari cameetsatatsi
iroashinonqueeteri, impinayempari cameetsajeitatsiri.
19Ocameetsatasanoti antime caaraiteriqui apaniro,
eiro acaratantarotsi tsinane quishincaro.
20Anta ivancoqui iotatsiri otimimotasanotiri ovaararontsi aisati casancajaripee;
irintiquea caari iotatsi, itsoncasanotiro maaroni timimotiriri.
21Yora coasanotatsiri incameetsashirete aisati incavintsaante,
iraneasanojeite aisati impincatsayeeteri.
22Ariorica yora iotatsiri irimanateri nampitsi ticaacovetasanotachari,
irimatero intsoncasanotiri paitapeerica yaventajeivetari.
23Yora aamaventacotachari paitarica incanteri,
eiro opomerentsitimotaritsi.
24Yora antashiyetarori paitapeerica, ipajiyeetiri shemetatsiri, tseencantatsiri aisati piatsatachari.
25Yora peranti oamayeri icoayevetari;
tempa te incoyeji irantaveete.
26Icantani maaroni quitaiteriqui icoashiveeta;
irintiquea cameetsatatsiri ipashitanta, te irimashitsateji.
27Yora Tasorentsi te incoyeroji ipashiyevetariri caari cameetsajeitatsi;
tempa iquenqueshiretiro irantero caari cameetsatatsi.
28Yora camantacotashitarori tseeyantsi, intsoncasanoyeetajeri;
irintiquea quemisantasanotirori icanteetiriri, incanteani iranque cameetsa.
29Yora caari cameetsajeitatsi iquempetacantashitaro ioyetiro yantiri;
irintiquea cameetsatatsiri, iotasanotiro yantayetiri.
30Yora Tasorentsi tecatsi cameetsatimoterine ioyevetari atiri,
aisati iquenqueshireyevetari cameetsavetachari.
31Yora manatincari yovetsiquiri iyavaayotepee irijatanteari irimanatea,
iro cantaincha irio Tasorentsi matacayerine iranaacotante.
Currently Selected:
Proverbios 21: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
