Proverbios 15
15
1Yora neanatatsiri cameetsa yoimajerentiro tsimajencantsi;
irintiquea shintsitirori ineanati, iquisacaasanotari itsipa.
2Ariorica ineanati iotatsiri, iotacanti;
irintiquea caari iotatsi, ineaveetashiyeta.
3Yora Tasorentsi itsoteiro maaroni,
yamenacoventiri cameetsajeitatsiri aisati caari cameetsajeitatsi.
4Yora neanatatsiri cameetsa yoimoshirencanti, iquempetacaro inchato oaneantatsiri;
irintiquea neanatirori caari cameetsatatsi, yoashiretacanti.
5Yora caari iotatsi itseenquiro yoamevetariri iriri;
irintiquea quemisantirori, yonijantiro iotasanoti.
6Yora shirampari cameetsatatsiri otimimotasanotiri ivancoqui yashiyetari;
irintiquea caari cameetsatatsi, yatsipetashitaro yaayevetari.
7Yora iotatsiri yoameyetantiro cameetsayetatsiri iotiri;
irintiquea caari iotatsi, oshequi icomita; tecatsi iriote.
8Yora Tasorentsi te irineacameetsatero ipashiyevetariri caari cameetsatatsi;
irintiquea cameetsatatsiri, ineacameetsatiro iquenquetsatacairiri.
9Yora Tasorentsi te irineacameetsatero yantayetiri caari cameetsatatsi;
irintiquea savicatsiri cameetsa, inintasanotiri.
10Yora jocajeroneri cameetsatatsiri, yoasanquetasanoyeetiri;
aisati caari coatsi incantimenteeteri yantaqueri, incame.
11Ineasanotiri Tasorentsi camajeitatsiri jaoca intijeari,
¡aisati iotasanotaquero iquenqueshirejeitiri aneajeitatsiri!
12Yora cantimatantatsiri te irininteriji cantimentavetariri yantayetiri,
aisati te incoyeji incarajeiteri iotatsiri.
13Yora quimoshiretatsiri aisati oashiretachari
ioyeetiri jaoca icantavorotari.
14Yora quenqueshireachari icoasanoti iriote;
irintiquea caari iotatsi, iquenqueshiretiro yantashiyetari.
15Yora oashiretachari, ompomerentsitimoteari maaroni quitaiteripeequi;
irintiquea quimoshiretatsiri, incanteani iroveshireajeitea.
16Ocameetsati eiro ashitaarantatsi, irointi ampincatsateri Tasorentsi,
anaacotiro ashitaarantavetearica, irointi antime ashinoncayea.
17Ocameetsati ayearo panquirentsi shiocayetatsiri aisati anintavacaajeitea;
anaacotiro ayearirica ivatsa vaca anquisavacaimentajeiteari.
18Yora quishitatsari shintsini, iriotaque poneacantarori yantavacaa;
irintiquea caari shintsitatsi irishemempa, yoimajerentiri antavacaachari.
19Yora peranti oshequi irineero pomerentsitimotearine,
oquempetaca iquenaque totseequimashiqui;
irintiquea cameetsatatsiri, tecatsi pomerentsitimotearine,
oquempetaca iquenaquero avotsi cameetsatatsiri.
20Yora jananequi iotatsiri iquimoshiretacairi iriri;
irintiquea caari iotatsi, itseenquiro iriniro.
21Yora caari quenqueshireacha iquimoshireventiro yantashiyetari;
irintiquea quenqueshireachari yoameta irisati jaoca incanteari irisavique cameetsa.
22Teerica pinquenquetsatavacayeaji cameetsa, eiro pimatirotsi piquenqueshireyevetari;
ariorica pinquenquetsatavacaajeitea maaroni, ari pimataquero.
23¡Oveshireacanta incamanteeterica cameetsa,
ocameetsatasanoti incamanteete intsipaite!
24Yora iotatsiri iquenantaro avotsi oaneantatsiri,
aisati ojocaacoventiri eiro ijatantatsi caamanentsiqui.
25Yora Tasorentsi intsoncajeri ishanincapee shemetatsiri;
irointiquea camajimentaaro, intasoncaventenero ashitasanotari.
26Yora Tasorentsi te irineacameetsatero iquenqueshiretiri caari cameetsajeitatsi;
irointiquea ineacameetsati neantsi cameetsatatsiri.
27Yora nevetarori yashiyetari itsipa, iroashinoncaacantajeiteri ivancoquiniripee;
irintiquea caari aantari ishaninca quirequi, osamani intime.
28Yora cameetsatatsiri iquenqueshiretiro cameetsa paita incanteri;
irintiquea caari cameetsatatsi, ineaveetashiyetaro caari cameetsatatsi.
29Yora Tasorentsi inijantareiri caari cameetsajeitatsi;
irintiquea cameetsatatsiri iquemisantiro iquenquetsatacairiri.
30Yora quimoshiretatsiri yoimoshirencanti,
aisati ora camantantsi cameetsatatsiri, oimoshirencanti.
31Yora quemisantirori icantimenteetiriri oaneeri,
incarajeiteri iotatsiri.
32Yora caari coyerone iroameyeeteri, te irintacoteaji irisati;
irintiquea quemisantirori incantimenteeteriri yantayetiri, iriotasanotanaque.
33Ampincatsateririca Tasorentsi, iriotacaasanotee;
aisati ancoyerica impincatsayeetee, ocameetsati eiro ashemetitsi.
Currently Selected:
Proverbios 15: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
