Proverbios 16
16
Icantasanotiri: “Eiro yantantarotsi caari cameetsatatsi”
1Timatsi iquenqueshireyetiri atiri iranteri,
iro cantaincha irio Tasorentsi cantasanotatsiri.
2Yora atiri ocameetsatimotiri maaroni yantayetiri,
iro cantaincha irio Tasorentsi cantatsiri
ocameetsatirica icoayetiri, irompa terica.
3Pincanteri Tasorentsi iramitacotempi paitapeerica pantayeteri,
impoijiquea aitaque pimataquero.
4Yovetsicantacarori Tasorentsi maaroni paitapeerica timatsi icoaqueri,
aisati iroasanquetanteariri coajica caari cameetsatatsi.
5Yora Tasorentsi te iramaveteriji shemetatsiri,
aitaque iroasanquetaaqueri.
6Yora nintasanotiriri, peacotiniri itsipapee yantimotaqueri;
yora pincatsatiriri Tasorentsi, eiro antirotsi caari cameetsatatsi.
7Ariorica ineacameetsatiro Tasorentsi yantayetiri atiri,
ari incantacaashireajeari quisajeivetariri iraacameetsatantajeariri.
8Ocameetsati antaveetasanote cameetsa impinayeevetee capichaji;
irompa impinatasanoyeevetee, irointi iramataviyeete.
9Yora atiri irio quenqueshireyeterone irantayeteri,
irioquea Tasorentsi matacayerine.
10Yora pincatsari ineanatiro yoametiriri Tasorentsi,
irotaque caari yoashinoncaashitantari atiri
11Icoaque Tasorentsi cameetsa irimoncaratanteetearo tenayetatsiri aisati tsantsayetatsiri;
tempa iriotaque nintacantirori otimantacari.
12Yora pincatsaripee te incoyeroji caari cameetsatatsi yantashiyeetari;
tempa cameetsa icantacoventanti.
13Yora pincatsari ineacameetsatiri jaanicarica neanatatsiri cameetsa.
14Yora pincatsari iquisasanotarica, yoacantanti;
irintiquea iotatsiri, icoaque incatsimareacaajeari.
15Inquimoshireterica pincatsari, irisavicacantajeite cameetsa;
ariorica incavintsaante, iquempetacaro mencori opariantari incani.
16Ocameetsati ancoasanotero iotantsi aisati quenqueshireantsi;
anaacotiri oro aisati plata.
17Yora cameetsatatsiri te iranteroji caari cameetsatatsi;
yora aamaacoventarori yantiri irisati aamaacoventacha.
18Yora shemetatsiri irisati oashinoncaacantajanchane;
aisati jitacantavetachari iranaacotante, tecatsi irimate.
19Ocameetsati ancarateri coiteaveeyetatsiri,
ashitaarantavetearica irointi ancarateri shemejeitatsiri.
20Yora amenacantirori cameetsa yashiyetari, cameetsa irisavique.
¡Inquimoshirete shiretariri Tasorentsi!
21Yora quenqueshiretirori cameetsa irantayeteri, icanteetiri quenqueshiretincari;
ora neantsipee cameetsatatsiri oshiretacanti cameetsa.
22Anquenqueshiretemparica cameetsa, antimajeite cameetsa;
avamevetearirica caari iotatsi, ari antsipetashitaquearo.
23Yora quenqueshireasanotachari iotiro paita icantiri,
ora irineanepee oshiretacanti cameetsa.
24Ora neantsipee cameetsatatsiri oquempetacaro ija pitsi;
oimoshirencantasanoti aisati oshintsishireacanti.
25Ainiro yantayetiri atiri cameetsatimovetariri,
iro cantaincha omoncaratapaaquearica, aitaque incamimentaquero.
26Ora tashentsi antaveetacantasanoti ontimanteari, oanarontsi.
27Yora caari cameetsatatsi iquenqueshiretiro irantero caari cameetsatatsi,
ora ineaveeyetiri, oquempetacaro paamari tsoncantatsiri.
28Yora caari cameetsatatsi iriotaque poneacantarori yantavacaa;
aisati oayetirori tseeyantsi, iquisacaayetari itsipapee.
29Yora caari neashitantacha yamatavitiri itsipavintsatari,
irotaque yantacantariri caari cameetsatatsi.
30Yora coatsiri irantero caari cameetsatatsi, yamenampiojaquitavacaa,
ariorica yantaquero, yatsicatseratimentaro.
31Yora pajetanaintsiri ocameetsati impincatsayeeteri;
tempa isavicaque cameetsa.
32Ocameetsatasanoti eiro ashemashireatsi, anaacotiro aneaperovetearica.
Ocameetsati aamaventacotea arosati, anaacotiro ampincatsariventeri itsipapee.
33Yora atiri ipishonquimentiro paitarica, iriotanteari jaoca incanteari,
iro cantaincha irio Tasorentsi cantacanteroneri maaroni.
Currently Selected:
Proverbios 16: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
