Proverbios 14
14
1Ora tsinane iotatsiri osavicacaajeitiri cameetsa otomipee;
irointiquea caari iotatsi, opeacaajeitari.
2Yora savicatsiri cameetsa ipincatsatiri Tasorentsi;
irintiquea caari savicatsi cameetsa, itseenquiri.
3Ora icantashiyetari caari iotatsi irointi ishemeti;
irointiquea icantayetiri iotatsiri, ojocaacoventiri.
4Teerica intime vaca quiavaneterone quipatsi, eiro otimitsi tirico;
irompa intimerica, aitaque ontimasanotaque.
5Yora camantacotirori queariotasanotatsiri, te intseeyaji;
irintiquea camantacotashitarori caari cameetsatatsi, itseeya.
6Yora cantimatantatsiri icoaveta iriote, iro cantaincha eiro imatirotsi;
irintiquea quenqueshireachari, te ompomerentsitimoteariji iriotasanote.
7Pinijantareajeiteri caari iotatsi;
tempa ora icantayetiri, eiro iotacaimpitsi.
8Ora iotantsi iotacaasanotiri cameetsatatsiri jaoca icantari;
irintiquea caari iotatsi, yamatavitaja irisati.
9Yora caari iojeitatsi ishirontimentajeitaro yantashiyetiri;
irintiquea cameetsajeitatsiri, yaacameetsatavacaajeita.
10Iojeitiro aparopeeni oashiretacairi,
aisati te iriotacayeri pashinisati iquimoshiretirica.
11Intsoncajeitea ishanincasanoripee yora caari cameetsajeitatsi;
irintiquea ishanincasanoripee cameetsajeitatsiri, incanteani irisavique cameetsa.
12Ainiro yantayetiri atiri cameetsatimovetariri,
iro cantaincha omoncaratapaaquearica, aitaque incamimentaquero.
13Ishirontavetarica atiri, irosati icanta yoashireta,
inquimoshirevetea, impoiji irirayea.
14Yora caari iotatsi iquimoshireventavetaro yantashiyetari;
yora cameetsatatsiri iquimoshireventiro imayetiri.
15Yora caari quenqueshireacha ishiretaro maaroni icanteeyetiriri;
irintiquea quenqueshireachari cameetsa, ioti paita iranteri.
16Yora iotatsiri itsaroacaaro caari cameetsatatsi, te irantero;
irintiquea caari iotatsi, te inquenqueshireacoteroji paitapeerica.
17Yora quishitatsari shintsini yantantashita, te inquenqueshiretimateaji;
irintiquea quenqueshireachari, yaamaventaro iranteri.
18Yora caari quenqueshirejeitacha yashinoncaimentaro yantashiyetari;
irintiquea quenqueshirejeitachari, iotasanoti.
19Yora caari cameetsajeitatsi coajica impincatsateri cameetsajeitatsiri,
aisati incoacojeiteri iramitacoteri.
20Yora coiteaveeyetatsiri iquishiri itsipatapinivetari;
irintiquea ashitaarantincari, itimasanoyeti oshequi tsipavintsatariri.
21Yora tseenquiriri itsipavintsatari yantaquero caari cameetsatatsi;
¡inquimoshirete yora cavintsairiri coiteaveeyetatsiri!
22Yora coirori irantero caari cameetsayetatsi, impeashijeitea;
irintiquea coasanotatsiri, irantero cameetsayetatsiri,
incanteani irininteeteri aisati iraacameetsayeeteri.
23Yora shintsiventirori yantaveeti timatsi iroyeari;
irintiquea neaveetashitachari, tecatsi timimoterine.
24Yora iotatsiri irimatero inquenqueshiretasanotanajea;
irintiquea caari iotatsi, aiquero ijatatii eiro iotanaji.
25Yora camantacotantatsiri cameetsa yoavisaacotacantiri itsipa, eiro yoanteetaritsi;
irintiquea camantacotantashitachari tseeyari, yoacantanti.
26Yora pincatsatiriri Tasorentsi, iticaacoventiri,
aisati eiro yashinoncaatsi itomipee.
27Yora pincatsatiriri Tasorentsi iraneasanojeite;
yojocaacoventiri, eiro icamantatsi.
28Yora pincatsariventiriri oshequi ishanincapee, impincatsatasanoyeeteri;
irintiquea pincatsariventiriri caari oshequitatsi, eiro imatirotsi irojocaacoventea irisati.
29Yora caari shemantacha yonijantiro timatsi iotantari;
irintiquea shemantachari, yonijantiro te irioteji.
30Yora caari quenqueshiretiro paitapeerica, irisavique cameetsa, intecatsite;
irintiquea quisanentantatsiri, irimantsiate irosati itonquipeequi.
31Yora oashinoncairiri coiteaveeyetatsiri te impincatsatiri Vetsicaqueriri;
irintiquea yora cavintsairiri, ipincatsatiri.
32Yora caari cameetsatatsi oashinoncairi yantashiyetari;
irintiquea cameetsatatsiri, ojocaacoventiri yantayetiri.
33Ora iotantsi otimimotiri yora quenqueshiretirori cameetsa;
irintiquea caari iojeitatsiri, te irioteji.
34Ora cameetsatatsiri, irotaque iquimoshireventiri savicayetatsiri nampitsipeequi.
Irointiquea caari cameetsatatsi, oashiventaajeitiri.
35Yora pincatsari ineacameetsatiri inampire iotasanotatsiri;
irintiquea caari iotatsi, iquisacaari.
Currently Selected:
Proverbios 14: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
