Números 9
9
Inquimoshireventero yavisantaniri inampire Tasorentsi.
1Ari omoncaratapaaca apitetatsineri osarentsi iponeajeitantanajari Egiptoqui, aparoquera ini cashiri intanajarori. Ari iquenquetsatacaajiri Tasorentsi Moiseshi caaraiteriqui Sinaí, icantiri:
2-3“Yora pishanincapee ocameetsati inquimoshireventapinitero yavisantaniri, ariorica omoncaratapempa 14 quitaiteri aparoqueratatsiri cashiri, irintanaquearo ishaaviniji. Ocameetsati irimoncaratasanotero noamejeitaqueriri, iriotantearori inquimoshireventajeitero.”
4-5Impoiji icantajeitaqueri Moiseshi ishanincapee inquimoshireventantearori yavisantaniri. Ari imajeitaquero omoncaratapaaca 14 quitaiteri aparoqueratatsiri cashiri. Intanacaro ishaaviniji iquimoshireventaquero caaraiteriqui Sinaí. Imoncarataquero maaroni icantaqueriri Tasorentsi Moiseshi.
6-7Iro cantaincha ainiro ishanincapee yantaqueri camatsiri. Irotaque caari imatantaro iriori inquimoshireventero. Ari ijatashijeitaqueri Moiseshi jeri Aarón, icantajeitapaaqueri:
—¿Jaoca noncantajeiteari narori? Te noncameetsateji; nantaqueri camatsiri. ¿Eirompa nomatirotsi nomperi Tasorentsi nocashiacaaqueriri narori, noncarajeiteri ashanincapee? Tempa irotaque quitaiteri icantaqueeri.
8Ari icantiri Moiseshi:
—Ari poyeavaquenatsita, nonquemisantavaquerita Tasorentsi, paitarica incantenari.
9-10Ari icantaqueri Tasorentsi Moiseshi:
“Jero oca pincantajeiteriri pishanincapee: ‘Ocameetsati piojeitero oca aisati pishanincajeitajeari coajicani. Yora antaquerine camatsiri icaariperotacaacari aisati iroorica irijate areejiqui, ocameetsati iriveshireimentearo yavisantaniri, impincatsatantenari. 11Iro cantaincha ocameetsati inquimoshireventajeitero pashiniqui cashiri, omoncaratapaajearica 14 quitaiteri ishaavijiiteanajerica. Ocameetsati iroyeari ovisha, intsipataaqueri oshi panquirentsi quepishitatsiri jero tanta caari conoacha tapiacaarori. 12Eiro yoanontajatsi iroamanajeari osaitequera aisati eiro icarajirotsi aparoni itonqui. Ocameetsati inquimoshireventero, irimoncaratero maaroni nocantaquempiri. 13Irintiquea caari coatsine inquimoshireventero, teerica incaariperoveteaji aisati te irijaveteaji areejiqui, ocameetsati pintiancajeri, eiro icarajeitantajaritsi pishanincapee. Tempa te irimoncarateroji iramena impashitenaro quitaiteriqui nocantaqueriri. Irashinoncaimentearota caari cameetsatatsi yantaqueri.
14“ ‘Aisati iriori pashinisati saviquimojeitimpiri, ocameetsati inquimoshireventero yavisantaniri, impincatsatantenari; irimoncaratasanotero noamejeitaquempiri. Oca nocantacantayetiri, irotaque iriojeiteri iriori pashinisati aisati pishanincasanoripee.’ ”
Otimapaaque mencori Pancotsi yapatotimentantariri Tasorentsi
(Éxo. 40.34-38)
15Itsoncantacarori Inantari Tasorentsi otimantari Icantacantiri, osaviincapaaque mencori apataapaaquero. Ariorica otsitenijencaiteanaji, oconijatanaque oquempevetacaro paamari. Ocantani amorecaque tsiteniriqui irosati quitaiteacotanajantsi. 16Aitaque ocantapinitacari mencori: quitaiteriqui apataaquero Pancotsi, tsiteniriqui oconijatapiniti oquempetacaro paamari. 17Ariorica ovancanaca jenioquiji, yora ishanincajeitaniri Israel yovaajeitanaja. Jaocarica otimapaaqueri mencori, aitaque isavicajeitapaajiri. 18Ariorica icoacaajiri Tasorentsi irovaajeitanajea, ari yovaajeitanaja. Aisati icoacaajiri irisavicajeitapaaje, ocantani mencori otimaque Inantariqui Tasorentsi. 19Osamanirica otimapaaque mencori Inantariqui, aisati iquempejeitaca iriori te irovaajeiteaji. Iquemisantaquero icantaqueriri Tasorentsi. 20Irompa otimapaaquerica mencori Inantariqui aparopee quitaiteri, aitaque irisavicajeiteri; ariorica incoacaajeri Tasorentsi, yovaajeitanaja; aisati ariorica incoacaajeri, irisavicajeitapaaje. 21Ariorica otimi mencori aparoni tsiteniri, ariorica oquitaiteamanaji ovancanaja, impoiji yovaajeitanaja. Aisati oquempeta tsiteniriqui ariorica ovancanaja yovaajeitanaja. Aitaque ocantapinitari. 22Aisati ariorica otimaque mencori Inantariqui apite quitaiteri, ariorica aparo cashiri, teerica aparo osarentsi, irosati icanta isavicajeitaque iriori ishanincajeitaniri Israel. Ariorica ovancanaja, impoijiquea yovaajeitanaja aisati. 23Ariorica icoacaajiri Tasorentsi irisavicajeitapee, ari isavicajeitapaaque. Aisati icoacaajiririca irovaajeitanajea, ari yovaajeitanaja yantaveetantapaajanariri. Imoncarataquero icantaqueriri Tasorentsi Moiseshi.
Currently Selected:
Números 9: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
