Números 8
8
Iramorecantearori Aarón tsiorontsipee.
1Ari iquenquetsatacaajiri Tasorentsi Moiseshi, icantiri:
2“Pincanteri Aarón, ariorica irovetsiqueri tsiorontsipee caratatsiri 7 ijempequi iramorecanteari, ocameetsati iramenacayeri tampatica inquitasantetacotanteari.” 3Ari imataquero Aarón icantaqueriri Tasorentsi Moiseshi, yovetsicaqueri tsiorontsipee yoitampaticataqueri, ontsiotacotanteari inaqui. 4Ora inantari tsiorontsi yovetsiqueetiro martiyoqui ioshitaca maaroni oro, irosati ojempequipeequi. Yovetsicacantantacarori Moiseshi, imoncarataquero yonijaaqueriri Tasorentsi.
Inashitacaajeitantacariri ishanincapeeni Leví.
5-6Ari icantiri aisati Tasorentsi Moiseshi:
“Meeca pinashitacaajeiteari ishanincapeeni Leví, poameetsajeiteri eiro iquempejeitaritsi itsipapee pishaninca. 7Jero pincantaquerori pinashitacaajeitanteariri: Paye nija pintsiquirijantayeteari. Impoiji irameejeitero maaroni ishivatsempequi, aisati inquivajeitero iitsaare, incameetsajeitantanaqueari. 8Impoiji iramaque aparoni vacajaniqui aisati iramaque capichaji cameetsavanetatsiri tirico conoavatsatachari quejitsi intsipatayeriri. Aisati iramaque pashini vacajaniqui iroimenterori caari cameetsatatsi yantayetiri. 9Irosati pincantantaqueari ishanincapeeni Leví impocajeite Pancotsiqui papatotimentantanari aisati maaroni iriori pishanincapee irampatojeitapempa. 10Impoiji pincantajeiteri ishanincapeeni Leví incatiimojeitapeena. Irosati iroanquejeitantaqueanari iraco pishanincapee iitoqui. 11Aisati iriori Aarón ironijayenari ishanincapeeni Leví inashitacaajeitaquenari pishanincapee. Iriojeitaque antaveetenaneri Pancotsiqui Nonijantapinitantari. 12Irosati iroanquejeitantaqueanari iraco ishanincapeeni Leví vacajaniqui. Aparo iroimenterori caari cameetsatatsi yantayetiri, irio itsipa intaimenterori noameetsashirejeitanteariri. 13Impoiji poatiajeitajeri incatiimojeitanteariri Aarón aisati itomipee, irosati ponijaajeitantaquenari pashitacaasanotantenariri. 14Aitaque oncanteari pinashitacaasanotanteariri nashitasanotanteariri, eiro iquempejeitaritsi itsipapee pishaninca. 15Impoijiquea irijajeite Pancotsiqui papatotimentantanari irantaveetantenari. Ocameetsati poameetsajeiteri, aisati pinijaajeitenari. Iriojeitaque picashiacaaquenari, nashitasanoteari. 16Maaroni pishanincapee iriojeitaque nashitasanojeitacari. Meeca nocoacaajeitaqueri, iriotaque poyejeitajariri itomipee jivayetatsiri itimi. 17Tempa narotaque ashijeitariri itomipee pishaninca jivayetatsiri itimi, aisati iquempetaca irijanipee ivira jivayetatsiri itimi. Nonashitacaajeititacari noamaajeitantacariri itomipee egiptosati jivayetatsiri itimi. 18Meeca nashijeitacari ishanincapeeni Leví. Iriotaque poyejeitajariri itomipee pishaninca jivayetatsiri itimi. 19Nocoyeajeitaqueri, te inquempejeiteariji itsipapee pishaninca. Nopaqueri Aarón iramitacotanteariri aisati itomipee, irantaveeventanteariri maaroni pishanincapee Pancotsiqui papatotimentantanari, nompeacojeitanteanariri caari cameetsatatsi yantayetiri. Eiroquea avishimotantaritsi paitapeerica inquempejitaquearorica Nonantariqui.”
20Ari imoncarataquero Moiseshi jeri Aarón aisati maaroni ishanincapee icantaqueriri Tasorentsi, yoameetsajeitantacariri ishanincapeeni Leví. 21Aisati yoameetsajeitaca iriori, iquivajeitaquero iitsaarepee. Impoiji yonijantajeitaqueri Tasorentsiqui, icashiacaasanotaqueri. 22Ari imajeitaquero, irosati ijajeitantanaca ishanincapeeni Leví Pancotsiqui yapatotimentantariri Tasorentsi irimoncaratantearori irantaveete. Irio jivatacairiri Aarón jeri itomipee. Imoncarataquero icantaqueriri Tasorentsi Moiseshi.
Irovecaratantearori irantaveete ishanincapeeni Leví.
23Aisati icantiri Tasorentsi Moiseshi:
24-25“Yora ishanincapeeni Leví ocameetsati irintanaquearo irantaveete Pancotsiqui papatotimentantanari irimoncarataquerorica 25 irosarentsite. Ariorica omoncaratapaaquea 50 irosarentsite, eiro yantaveetajitsi. 26Irointiquea iramitacoyeteri itsipapee antaveetatsiri Pancotsiqui papatotimentantanari, eiroquea yantaveetasanotajitsi. Aitaque oncanteari pivetsicajeitero irantaveejeitanteari ishanincapeeni Leví.”
Currently Selected:
Números 8: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
