Números 13
13
Itiancaque Moiseshi amenanonterone quipatsi Canaán.
(Deut. 1.19-25)
1Ari iquenquetsatacaajiri Tasorentsi Moiseshi, icantiri:
2“Pintianque amenanonterone quipatsi Canaán, nompajeiteriri maaroni pishanincapee. Pintiancayetaque aparopee jivatacaayetiriri ishanincasanoripee.”
3Ari imataquero Moiseshi icantaqueriri Tasorentsi, itiancaque iponeanaca caaraiteriqui Parán. Ioshijeitanaca jivatacantajeitatsiri.
4Jero oca ivajiropee:
Samúa, itomi Zacur, ishanincapeeni Rubén;
5Safat, itomi Horí, ishanincapeeni Simeón;
6Caleb, itomi Jefuné, ishanincapeeni Judá;
7Igal, itomi José, ishanincapeeni Isacar;
8Oseas, itomi Nun, ishanincapeeni Efraín;
9Paltí, itomi Rafú, ishanincapeeni Benjamín;
10Gadiel, itomi Sodí, ishanincapeeni Zabulón;
11Gadí, itomi Susí, ishanincapeeni José (Yora ishanincajeitanacari iriori Manasés);
12Amiel, itomi Guemalí, ishanincapeeni Dan;
13Setur, itomi Micael, ishanincapeeni Aser;
14Nahbí, itomi Vapsí, ishanincapeeni Neftalí;
15Gueuel, itomi Maquí, ishanincapeeni Gad.
16Irotaque ivajiropee itiancaqueri amenanonterone quipatsi. Yora Oseas, itomi Nun, ipashiniajiniri Moiseshi ivajiro, ipajitajiri Josué.
17Itiancantacariri Moiseshi amenanontajeiterone quipatsiqui Canaán, icantiri:
—Ari pinquenanaqueri quipatsiqui Négueb irosati pintoncaantanaquea otoncaariyetapai. 18Aitaque pamenacoyetapeerori jaoca ocantayetari maaroni quipatsi, aisati jaoca icantajeitari savicayetatsiri, ineaperojeitarica, irompa teerica; aisati oshequirica inajeiti, irompa teerica irishequijeiteji. 19Pamenasanoyetero inampipee, ivancojaniquitashiyetarica, irompa ovetsicasanoyetarica cameetsa. Aisati pamenanontero quipatsi, ocameetsatirica, irompa teerica oncameetsate. 20Oshiocasanoyetirica panquirentsipee, irompa teerica, aisati otimayetirica inchatopee, irompa teerica. Eiro pitsaroajeititsi; pamayetaque chochoquipee pineayetaquerica timayetapaatsiri.
Aitaque ocantacari imoncaratacaro yaviitanteetarori ovapee. 21Irosati ijajeitantanaca yamenanontiro quipatsi, iponeanaca caaraiteriqui Sin quirincaniri, irosati nampitsi Rehob catonconiri, otsipanampitari Hamat. 22Aisati iquenajeitanaquero quipatsi Négueb irosati yareejeitantacaro nampitsi Hebrón. Aitaque isavicajeitiri Ahimán, Sesaí jeri Talmai ishanincapeeni Anac. Ora nampitsi Hebrón yovetsiqueetaquero ocarati 7 osarentsi tequeratani irovetsiqueetero Soan Egiptoquiniri. 23Impoiji yovaanaca yareetacaro osanteni Escol, aitaque itsecacoyetanaqueri apacavironi ova. Icompitacotanaquero aisati yaayetanaque chochoqui icanteetiri granada jero higo. 24Irosati ipajitantanacaro osanteni Escol; tempa aitaque itsecacotapaaquerori apacavironi ova ishanincajeitaniri Israel.
25-26Ocarataque 40 quitaiteri yamenanontantacarori quipatsi, irosati ipiajeitantanajari inampiqui Cadés caaraiteriquiniri Parán, isavicajeitapaaquenta Moiseshi, Aarón jeri maaroni ishanincapee. Ari icamantayetapaaqueri ineayetaitiri aisati yonijayetapaaqueri chochoquipee yamayetaqueri. 27Icantapaaqueri Moiseshi:
—Nojajeitaiti, nareetaitaro quipatsi picantaquenari; noneaitiro ocameetsatasanotaque. Oshiocasanoyetapai panquirentsiyetatsiri, te oncoiteayetapempaji. Irotaque oca namayetaqueri shiocayetapaatsiri. 28Iro cantaincha yora savicajeitatsiri ineaperotasanota aisati antearoite inampipee ovetsicasanoyetaca cameetsa. Aisati noneajeitaitiri ishanincapeeni Anac antearitasanoyetatsiri. 29Ora quipatsiquiniri Négueb irio savicajeitatsiri ishanincapeeni Amalec aisati otoncaariyetapai isavicajeiti hititapee, jebuseopee jeri amorreopee. Impoiji otsapijaqui incajare irosati nijaqui Jordán isavicajeiti iriori canaaneopee.
30Ari yoimajerentaqueri Caleb ishanincapee catiimojeitacariri Moiseshi, icantiri:
—¡Aitaque amajeitaqueri amanajeiteri aajeitantearori quipatsi!
31Iro cantaincha yacajeitanaque icarajeitaitiri icanti:
—¡Eiro amatiritsi amanajeiteri atiri! Ineaperotasanojeita irinti, yanaacojeitaque ainti.
32Aisati icantimojeitaqueri maaroni ishanincapee, te oncameetsate quipatsi yamenanontaveitari; icanti:
—Te oncameetsateji quipatsi namenanontaveitari aisati savicantajeitarori oshequi yoiri atiri savicantajeitarori. 33Aisati noneajeitaitiri antearitasanoyetatsiri ishanincapeeni Anac, yanaajeitaquee ainti, te antearijeiteji, aquempetacari tsinaropee. Ari intseencajeitavaquee.
Currently Selected:
Números 13: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
