Números 1
1
Isanquenatacojeitantacariri ishanincapee anta toncaariqui Sinaí.
1Ari intanajaro quitaiteri, apitetanajantsiri cashiri aisati apitetatsineri osarentsi iponeajeitantanajari ishanincajeitaniri Israel Egiptoqui. Ainiroquera isavicajeitaque caaraiteriqui Sinaí, ari iquenquetsatacaaqueri Tasorentsi Moiseshi Pancotsiqui yapatotimentantariri, icantiri:
2-4“Pisanquenatacoteri maaroni pishanincapee, pinashijeiteari ishanincasanoripee, ayotantearori ivajiropee aisati jaoca icaratasanojeiti maaroni shiramparipee moncarataquerori 20 irosarentsite irosati anteariyetanaintsiri, manajeitachaneri. Irio amitacotempine Aarón jeri jivatacaayetiriri aparopee ishanincasanori. 5Jero ivajiropee jivatacantayetatsiri amitacotempineri:
Ishanincapeeni Rubén: Elisur, itomi Sedeúr.
6Jeri ishanincapeeni Simeón: Selumiel, itomi Surisadai.
7Jeri ishanincapeeni Judá: Nahasón, itomi Aminadab.
8Jeri ishanincapeeni Isacar: Natanael, itomi Suar.
9Jeri ishanincapeeni Zabulón: Eliab, itomi Helón.
10Jeri ishanincapeeni Efraín itomini José: Elisamá, itomi Amihud.
Jeri ishanincapeeni Manasés, itomini José: Gamaliel, itomi Pedasur.
11Jeri ishanincapeeni Benjamín: Abidán, itomi Guidoní.
12Jeri ishanincapeeni Dan: Ahiézer, itomi Amisadai.
13Jeri ishanincapeeni Aser: Paguiel, itomi Ocrán.
14Jeri ishanincapeeni Gad: Eliasaf, itomi Reuel.
15Jeri ishanincapeeni Neftalí: Ahirá, itomi Enán.”
16Iriojeitaque yocapee icoyeaqueri jivatacaajeiterineri ishanincasanoripee. 17-19Ora intanajarori quitaiteri, apitetanajantsiri cashiri osarentsitapaajatsiri, yora Moiseshi jeri Aarón yapatojeitaqueri shiramparipee icoyeaqueri Tasorentsi, aisati iriori maaroni ishanincapee. Irosati isanquenatacojeitantacari maaroni aparopeeni ivajiro. Inashitacaajeitacari ishanincasanoripee aisati itomisanoripee moncarayetaquerori 20 irosarentsite, aisati anteariyetanaintsiri. Imoncarataquero icantaqueriri Tasorentsi Moiseshi. Aitaque isanquenatacojeitaqueriri caaraiteriqui Sinaí.
20-21Ari itsoncaquero isanquenatacojeitaqueri aparopeeni ivajiro ishanincasanoripee, maaroni moncarataquerori 20 irosarentsite anteariyetanaintsiri. Jero oca icarajeitiri yapatoayetanaca:
Yora ishanincapeeni Rubén, itomini Israel jivatatsiri itimi, icarajeiti 46,500 shiramparipee manajeitachaneri.
22-23Yora ishanincapeeni Simeón, icarajeiti 59,300.
24-25Yora ishanincapeeni Gad, icarajeiti 45,650.
26-27Yora ishanincapeeni Judá, icarajeiti 74,600.
28-29Yora ishanincapeeni Isacar, icarajeiti 54,400.
30-31Yora ishanincapeeni Zabulón, icarajeiti 57,400.
32-33Yora ishanincapeeni Efraín, itomini José, icarajeiti 40,500.
34-35Yora ishanincapeeni Manasés, itomini José, icarajeiti 32,200.
36-37Yora ishanincapeeni Benjamín, icarajeiti 35,400.
38-39Yora ishanincapeeni Dan, icarajeiti 62,700.
40-41Yora ishanincapeeni Aser, icarajeiti 41,500.
42-43Yora ishanincapeeni Neftalí, icarajeiti 53,400.
44Jero oca icarajeitaqueri isanquenatacotaqueri Moiseshi jeri Aarón aisati caratatsiri 12 jivatacaajeitiriri ishanincasanoripee. 45-46Maaroni shiramparipee moncarayetaquerori 20 irosarentsite, iriojeitaque manajeitachaneri icarajeitaque 603,550 yapatoajeitanaca.
Icoyeaqueri Tasorentsi ishanincapeeni Leví.
47-49Yora ishanincapeeni Leví te irisanquenatacoteriji; tempa icantaqueri Tasorentsi Moiseshi: “Ariorica pisanquenatacojeitaqueri pishanincapee, eiroyea pisanquenatacotiritsi ishanincapeeni Leví. 50Irointiquea pincanteri irantaveetapinite anta Nonantariqui otimantari Nocantacantiri aisati iramenapinitero maaroni timayetatsiri. Iriojeitaque aapiniterone Nonantari aisati timayetatsiri yantaveetapinitantari. Aisati iriojeitaque shonquearoneri irisaviquimojeitero. 51Iriojeitaque tireayetanajerone Nonantari, ariorica povaapinijeitea. Aisati jaocarica pisavicajeitapaaje, iriojeitaque vetsicapaajerone. Irintiquea pashini antashitearoneri, ocameetsati poacanteri. 52Irioquea pashinipee pishaninca, irinashiyetaquea aparopeeni irisavicajeitaque iriveshintsaquiayetaquea, irisatecaquero ivanteeratepee iroatiaquero. 53Irintiquea ishanincapeeni Leví, irishoncaquearo Nonantari otimacotinta Nocantacantiri, irisavicajeitaque iramenantearori, eiroquea noasanquetantaritsi pishanincapee.”
54Ari imajeitaquero maaroni ishanincajeitaniri Israel icantaqueriri Tasorentsi Moiseshi.
Currently Selected:
Números 1: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
