Levítico 27
27
Inashitacaayetanariri Tasorentsi.
1Ari icantiri Tasorentsi Moiseshi:
2“Jero oca pincamanteriri pishanincapee: Itimirica pishaninca incashiacaaquenari irinashitacayenari ishaninca, jeroca oncarate impinacoventeriri.
3“Iriorica shirampari moncarataquerori 20 irosarentsite irosati 60, ocameetsati impinacoventeri 50 imentaqui quireequi, moncaratachari Nonantariqui.
4“Iroorica antearo tsinane, impinacoventero 30 imentaqui.
5“Iriorica timatsiri 5 irosarentsite irosati 20, ocameetsati impinacoventeri 20 imentaqui. Irooquea tsinane, incarate 10 imentaqui.
6“Irioquea jananequi carataintsiri aparo iyashirite irosati 5 irosarentsite, oncarate impinacoventeri 5 imentaqui quireequi. Irooquea iroori tsinanejaniqui, incarate 3 imentaqui.
7“Irioquea avisanaquerori 60 irosarentsite, oncarate impinaventacoteri 15 imentaqui. Irooquea tsinane, incarate 10 imentaqui.
8“Irompa iriorica caari otimimotasanoti impinacoventeriri, ocameetsati iraanaqueri antaveetatsiriqui, incantanteariri paitarica impinacoventeriri.
9“Iriorica virantsiyetatsiri incashiacayenari, ari nonashitacayeari maaroni. 10Eiro catsini ipinayetajiniritsi itsipapee virantsi, omavetaquea icameetsatirica, terica incameetsate. Irompa ariorica impinaavetaqueari, iro cantaincha irosati incantea apiiteroqueti nonashicaasanoteari.
11“Irompa iriorica virantsi caari cameetsayetatsi, caari nocoi intayeetenari, ocameetsati iraanaqueri antaveetatsiriqui, 12iramenantavaqueariri jaoca icantari aisati jaoca incanteriri. Irineavaqueririca, irio cantatsine jaoca oncarate ipinata. 13Icoaquerica iraajeri aisati, ocameetsati impinaventajeri quireequi, iroanaavajeneri capichaji ocarati icantaqueri antaveetatsiri.
14“Jaanicarica cashiacayenarone ivanco, irio antaveetatsiri cantatsine jaoca ocarati opinata, ocameetsatirica, irompa teerica oncameetsate. 15Icoaquerica iraajero aisati, ocameetsati impinaventajero quireequi, iroanaavajeneri capichaji ocarati icantaqueri antaveetatsiri. Irosati irashitantajearo.
16“Jaanicarica nashitacayenarone iipatsite impaarantena, ocameetsati irimoncaratero jaocarica ocarati yaapiniti oitsoqui. Ariorica yaapinti 220 kilo cebada, aitaque ocaratiri opinata 50 imentaqui quireequi, 17Ariorica inashitacaaquenaro Osarentsiqui Yoipacanteetarori, irosati oncantea ovinaro. 18Irompa inashitacaaquenarorica avisanaque oni Yoipacanteetarori, ocameetsati irimoncarateri antaveetatsiri jaoca incarate quireequi ompinatea. Irosatirica oshequite osarentsipee, incoacotajeri oshequi; irompa teerica oshequitanaje, incoacotajeri capichaji.
19“Yora cashiacaaquenarori icoaquerica iraajero aisati, ocameetsati impinaventajero quireequi, iroanaavajeneri capichaji ocarati icantaqueri antaveetatsiri. Irosati irashitantajearo. 20Irompa eirorica yaajirotsi, impimantajerorica iraajero pashini, eiro imatajirotsi iraajero. 21Omoncaratapaajearica Osarentsi Yoipacanteetarori, ariorica otimashitanaja quipatsi, ocameetsati irashitacaasanotenaro. Irosati iraasanotantajearo antaveetatsiri.
22“Jaanicarica cashiacayenarone quipatsi yamanantiri iriori, caari yashitacaari ishanincasanori, 23ocameetsati irimoncaratacayeri antaveetatsiri jaoca oncarate ompinatea irosati Osarentsiqui Yoipacanteetarori. Intsipaite impinatitaquearo ocarati ovinaro, irosati incashiacantaquenaro. 24Ariorica omocaratapaajea Osarentsi Yoipacanteetarori, irosati iraantajearo ashitasanotarori.
25“Maaroni piotacotantayeteariri quireequi, ocameetsati pimoncaratanteari timatsiri Nonantariqui icanteetiri siclo tenatatsiri 20 gera. (Omoncaratiro 11 gramos.)
26“Yora irijani pivira, jivatatsiri itimi, iriorica vaca aisati iriorica ovishajaniqui, eiro papiitajiritsi pashitacaajenari. Tempa aitaque nashitasanotacari. 27Iriorica virantsi caari yoyeeta, ocameetsati pimpinacoventajeri jaocarica icarati ivinaro aisati poanaavajeneri capichaji, paantajeariri. Irompa eirorica paajiritsi, ocameetsati impimantajeri ocarati ipinataca.
28“Intimerica nashitacayetenarone paitapeerica yashiyetari: iriorica atiripee, ivirapee, iroorica iipatsite yashitacaariri ishanincasanori, eiro ipimantajirotsi aisati eiro yaajirotsi; tempa aitaque yashitacaaquenaro, ocameetsatasanotaque. 29Aisati eiro imatirotsi impinacoventajeri ishaninca irantajeariri, icantacoventeetiririca iroyeeteri. Aitaque iroyeetaqueri.
30“Otimirica pivanquirepee oitsoquiyetatsiri aisati chochoquipee, pijaayetaquerica 10, pinashitacayena aparoni; irotaque nashitasanoteari. 31Picoaquerica paajero, ocameetsati pimpinacoventajero aisati poanaavajeneri capichaji ovinaro.
32“Itimirica 10 pivacate iriorica povishate, ocameetsati pinashitacayena aparo. 33Eiro picoyeayetavaqueritsi vatsayetachari aisati matsayetatsiri. Aisati eiro pipinaayetiritsi. Irompa ariorica pimpinaavetajeari pijivataqueri pinashitacaaquenari, irosati incantea apiiteroqueti nonashitacaasanoteari. Eiro pimatajirotsi paajeri.”
34Irotaque oca icantacantayetiri Tasorentsi, icantaqueriri Moiseshi toncaariqui Sinaí. Impoiji yovaaqueneri ishanincapee.
Currently Selected:
Levítico 27: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
