Levítico 14
14
Incameetsatantajeari patsaayetatsiri.
1Ari iquenquetsatacaajiri Tasorentsi Moiseshi, icantiri:
2-3“Jero oca incanteari incameetsatantajeari aayetiri patsaarontsi pajencantatsiri: Ocameetsati irayeetanaqueri otsapitapaaca isavicajeitantari. Irosati irijatashitantaqueari antaveetatsiri iramenanteariri. 4Irineaqueririca caratanaji, irosati intiancantaquea ayenerine apite aneatsiri tsimeeri cameetsari, aisati santari, tijachari quitioncamaori jero inchashijaniqui icanteetiri hisopo. 5-6Impoiji iroacanteri aparo tsimeeri chomoqui, ojaajatantari nija saancajari. Irosati iraantaqueari itsipa aneatsiri, iroajantaqueri irirajaqui yoaqueri conoajatainchari saancajariqui, aisati iroori santari, tijachari quitioncamaori jero inchashijaniqui hisopo. 7Impoiji intsiquirijanteari iriori patsaaveitachaniri oncarate 7 irampiipinitaqueri incameetsatantajeari. Ari incante: ‘Cameetsatanaji yoca.’ Irosati iroaraantajeari iriori tsimeeri.
8“Yora tecatsitacotanajantsiri, ocameetsati inquivajero iitsaare, inquivajea iriori, aisati irameetajea maaroni incameetsatantanajeari. Impoijiquea irijataje isavicajeitinta ishaninca, iro cantaincha oncarate 7 quitaiteri irisavicashiveetavaqueatsita ivancoqui saiteriqui. 9Omoncaratapaajearica 7 quitaiteri, irosati irameetasanotantajea aisati, maaroni ishipatonaqui, itamacoqui jero ishivapee. Aisati inquivayetajero iitsaarepee aisati incaate, irosati incameetsatantanajea. 10Ariorica oncaratapaaje 8 quitaiteri, irosati iraantajea apite ovisha aisati aparo tsinane caari amashiyetacha, moncarataquerori aparo osarentsite. Aisati iramaque 6 kilo cameetsavaneri tirico ari nianqui, conoavatsatachari quejitsi. Iramacotaque aisati aparo voteyajaniquiqui quejitsi. 11Yora antaveetatsiri antacanterone incameetsatantajeari, iroatiaqueri patsaaveitachaniri aisati iroayetaquero yamayetiri piqueapinitiroca Pancotsi papatotimentantanari. 12Irosati irantaqueari aparo ovishajaniqui, intsipataaqueri quejitsi boteyajaniquiquiniri iroanquenari altariqui. Iriotaque iroimentajeneriri yantayetiri. 13Irosati iroantaqueari yoapiniyeetiri virantsi yoimenteetirori caari cameetsatatsi, aisati itaasanoyeetiri. Yora yoimenteetirori yantashiyetari aisati yoimenteetirori caari cameetsatatsi, iriotaque irashiteari antaveetatsiri. Irotaque cameetsatasanotatsiri; tempa iriotaque nonashitacaasanotacari.
14“Impoiji iraye antaveetatsiri capichaji iriraja yoimentaquerori irantane, impantantayeteari overaapaaca iyempita iracosanoriquiniri, aisati jivatatsiri iracotsapaqui jero jivatatsiri iititsapaqui. 15-16Impoiji iraacotaquero quejitsi, irisaque capichaji iracoqui irampatequiniri; irosati iriviincantaquearo iracotsapaqui iracosanoriquiniri. Oncarate 7 irampiipinitero intsiquirijimotenaro. 17-18Yora timaarantapaatsiri iracoquiniri, impoiji impantantayetajeari aisati, iquempetaqueri ipantantayetacariri iriraja ovisha. Irosati impantantaqueari aisati iitoqui. Aitaque incantaqueriri antaveetatsiri, irosati nompeacotantajeanari yantayetiri. 19-20Irosati iramantaqueari iroimenterori caari cameetsatatsi patsaaveitachaniri, iroameetsatantajeari. Impoiji iroyeri iriori pashini, intaasanotaqueri altariqui, intsipataaqueri vetsicachari cameetsavanetatsiri ivanquire. Intayeri maaroni. Aitaque incanterori antaveetatsiri, nompeacotantajeanariri yantayetiri. Impoiji cameetsatanaji ini.
21-22“Iriorica mantsiataintsine caari otimimotasanoti paitapeerica, tecatsi irayeri apitetatsine ovisha. Ocameetsati iraye aparoni iroimentajerori irantane nompeacotantajeanariri. Aisati iraye 2 kilo vetsicachari cameetsavanetasanotatsiri ivanquire conoachari quejitsi, aisati aparo voteyajaniquiqui quejitsi, jeri apite tooquiti, iriorica apite irijani paloma. Irotaque iramayeteri iriori ocarati timimotiriri. Aparo iroimenterori yantayetiri, irioquea itsipa intaasanoteri. 23-24Oncaratapaaquerica 8 quitaiteri, irosati iramantaqueanari antaveetatsiri piqueapinitiroca Pancotsi yapatotimentantanari. Irosati irantavaquero maaroni oca icashiacaanari, iroanquenaro. 25Impoiji iroyeri ovisha aisati iraavaque capichaji iriraja impantanteari patsaaveitachaniri, overaapaaca iyempita iracosanoriquiniri, aisati jivatatsiri iracotsapaqui jero jivatatsiri iititsapaqui. 26-28Aisati iraaque quejitsi, irisaque capichaji iracoqui irampatequiniri, irosati iroviincantaquearo iracotsapaqui iracosanoriquiniri. Oncarate 7 irampiipinitero irintsiquirijimotantenaro. Impoiji impantantayeteari aisati, inquempetaqueri ipantantayetacariri iriraja ovisha. 29Yora timaarantatsine impantayeteari iitoqui patsaaveitachaniri, nompeacotantajeanariri yantayetiri caari cameetsatatsi. 30-31Irosati iroantaqueari iriori aparo tooquiti, iriorica irijani paloma icarati yamaqueri. Aparo iroimentero caari cameetsatatsi, irioquea itsipa intaasanoteri aisati iroori ivanquire. Aitaque incanterori antaveetatsiri nompeacotantajeanariri patsaaveitachaniri, irosati incameetsatantanajea.”
32Irotaque oca icantacantiri, jaoca incanteari aayetiri patsaarontsi pajencantatsiri caari otimimotasanoyeti irameri, incameetsatantajeari.
Ompoayeterica pancotsi.
33Ari iquenquetsatacaajiri Tasorentsi Moiseshi jeri Aarón. Icantiri:
34-35“Ariorica pareejeitapaaquearo quipatsiqui Canaán nopaquempiri pisavicajeitanteari, nontianquerorica ompoayete pancotsipee pinampiyetapemparonta, yora ashitarori ivanco ocameetsati irijatashiteri antaveetatsiri, incantapeeri: ‘Quempetaca iro patsaarontsijenca timaintsiri novancoqui.’
36“Irijataquerica antaveetatsiri, eirotsita iqueitapaatsi. Iroimisoquijacantavaquerotsita maaroni timayetatsiri tsompoina, tecatsiquea oncantea oncaariperoyetanaque. Impoijiquea inqueanaque iramenantearori irotaquerica.
37-38“Irineaquerorica otantopeequi opantayetacaro quenashipatancari, iroorica quitioncapatancari, oqueantanacaro tsompoina; irosati irisoquijantanajea. Impoiji irashitacantero oncarataque 7 quitaiteri. 39-40Omoncaratapaaquearica 7 quitaiteri, irosati iramenantajearo. Otsoncayetanaquerorica otantopeequi, irosati irojocacaatantayetaquearo mapipee opantayetacari. Irojocacantero otsapitapaaca isavicajeitantari, teenta oncameetsaitete. 41Impoiji inquimetacantayetero aisati tsompoinaqui pancotsi, irojocacantero ovanequi otsapitapaaca nampitsi teenta oncameetsaitete. 42Irosati iraacantantajea pashini mapi impinaajero, yojocacantayetaqueri aisati impachacacantajero quipatsi.
43“Irompa ampiitajearica aisati, aitaque yojocacantayevetacaro mapipee, iquimetacantayevetacaro quipatsi aisati ipachacacantajiro otantoqui. 44Yora antaveetatsiri ocameetsati inqueanaje aisati, iramenantajearori. Otsoncayetanajirorica, iriotanaque irotaque patsaarontsijenca pajencantatsiri. Ora pancotsi te oncameetsatanaje. 45Ocameetsati intireacantajero maaroni otantorepeeni, aisati irojocacantero otsapitapaaca nampitsi teenta oncameetsaitete. 46Jaanicarica queaquerone pancotsi ainiroquera yashitacantiro antaveetatsiri, eiro icameetsatanajitsi irosati ontsitenijencaiteanaje. 47Aisati oainchaneri pancotsiqui, iroorica irimantaquearo, ocameetsati inquivajero iitsaare oncameetsamaotantanajeari.
48“Irompa iramenavetajearorica, teerica aneajeroji, irosati ipachacacantantajarori, irosati incantantajea: ‘Cameetsatanaji pancotsi;’ peanaja oni patsaarontsijenca. 49Iroameetsatantajearori, ocameetsati iraye apite tsimeri, santari, quitsaarentsi tijachari quitioncamaori jero inchashi hisopo. 50Impoiji iroamayeri aparo tsimeri chomoqui otimantari nija saancajari. 51Irosati irantayetaquearo santari, quitsaarentsi quitioncamaori, hisopo aisati iriori tsimeri caari yoi, iroajantayetaquero irirajaqui tsimeri yoaqueri, conoaajatainchari nijaqui saancajari. Aisati irintsiquirijayetaquero pancotsi oncarate 7 irampiipinitero. 52-53Aitaque incanterori iroameetsatantajearo pancotsi: irirajaqui tsimeri, nija sancajari, aneatsiri tsimeri, santari, hisopo jero tijachari quitioncamaori. Impoiji iraanajeri tsimeri otsapiitapaaca nampitsi, iroimpacaajeri. Aitaque oncanteari oncameetsatantajeari pancotsi.”
54-56Irotaque oca icamantiriri iriotantearori oashinoncantsi patsaarontsijenca, quitsaarentsiqui, pancotsipeequi, jero avatsaaropeequi, asaampoayetaquerica aisati ampiroyetaquerica. 57Irotaque iriotantayetearori irotaquerica patsaarontsi pajencantatsiri, irompa caaririca oni. Aitaque ovecaratapaacari cantacotirori patsaarontsijenca.
Currently Selected:
Levítico 14: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
