Levítico 13
13
Ocantacota patsaarontsi pajencantatsiri.
1Ari iquenquetsatacaajiri Tasorentsi Moiseshi jero Aarón, icantiri:
2“Intimerica eereyetatsine aisati sampoayetatsine, iroorica impiropiroitaque itsempequiqui, impatsayetaquerica quempetaca impiticayetaquea, ocameetsati irayeetanaqueri antaveetatsiriqui Aarón, iriorica pashini icaratiri irishanincatajeari. 3Ocameetsati iramenasanotiteri ipatsaayetaque ariorica oquitamarotaque ishiva ivatsaaroqui aisati oquiavintonataquerica, impoiji iraamaanaquea aaqueri patsaarontsi pajencantatsiri. Iriotaquerorica, irosati incantantanaquea: ‘Te incameetsatanaje yoca.’
4“Irompa onquitamarotaquerica imeshina, teerica onqueavintonateri, aisati te onquitamarote ishiva; irosati irashitacotantaqueari oncarate 7 quitaiteri. 5Ariorica omoncaratapaajea 7 quitaiteri irosati iramenitantajeari. Irosatirica otimapaaque ivatsaaro, teerica ojayetanaqueri maaroni, irosati irashitacotantajeari aisati oncarate 7 quitaiteri. 6Omoncaratapaajearica 7 quitaiteri, irosati iramenitantajeari aisati. Irineaquerorica irotaji ompeajea, teerica ojayetanajeri, irosati incantantajea: ‘Tecatsitanaji ini, irointi ijareashivetaca imeshinaqui.’ Impoiji inquivajero iitsaare, cameetsatanaji ini.
7“Iro cantaincha aiquerorica ojatanaitii ojareashaanaque; tempa aitaque yamenacantavetaca antaveetatsiriqui icantantacari: ‘Cameetsatanaji ini’, ocameetsati irijatashitajeri aisati, iramenantavajeariri. 8Irineitavajeririca ijareashei otsoncanaqueri maaroni, irosati incantantajea: ‘Te incameetsatanaje yoca, aaqueri patsaarontsi pajencantatsiri.’
9-11“Ariorica aayeteri atiri patsaarontsi pajencantatsiri, ocameetsati irayeetanaqueri antaveetatsiriqui iramenasanotanteariri. Irineaquerorica oquitamarotanaque ishiva aisati ivatsa quitioncatanaque, iriotanaque oncanteani ivatsaaro ontime. Irosati incantantaquea: ‘Te incameetsataje yoca.’ Aisati eiro yashitacotiritsi; tempa iotanaque te incameetsatanaje.
12-13“Irompa ontsoncanaqueririca intsipaite iitiqui irosati iitoqui, intaquireanajea, irineavaqueririca antaveetatsiri tsoncanaja itaquireayetanaji, irointi iquitamarotanaque itsempequiqui; irosati incantantajea: ‘Cameetsatanaji ini.’ 14-15Irompa onconijatanaquerica ivatsa quitioncari, irineavaqueririca antaveetatsiri, irosati incantantaquea: ‘Te incameetsatanajeji.’
16-17“Irompa onquitamaroyetanaje ivatsa quitioncatatsiniri, ocameetsati irijatashiteri antaveetatsiri iramenitantavajeariri, irineavajerorica quitamaroyetanaji, irosati incantantajea: ‘Tecatsitanaji ini.’
18-19“Intimerica patsaayetatsine ariorica intecatsitanaje, irosatirica oncantea onquitamarote aisati onquitioncate ivatsaaroqui; ocameetsati ironijayeri antaveetatsiri. 20Irineaquerorica ivatsaaro onqueavintonataque aisati onquitamarotanaque ishiva, irosati incantantajea: ‘Te incameetsatanaje yoca, aaqueri patsaarontsi pajencantatsiri.’ 21Irompa irineaquerorica jaocarica ipatsaavetacari, te onquitamarote ishiva aisati te onqueavintonatanaje, aiquero ojatatii ompeajea; irosati irashitacotantaqueari oncarate 7 quitaiteri. 22Irompa aiquerorica ojatatiye ontsoncanajeri, irosati incantantajea: ‘Te incameetsatanaje yoca, aaqueri patsaarontsi pajencantatsiri.’ 23Irompa irosatirica ontimapaaque irointi amashitanaqueri, irosati incantantajea antaveetatsiri: ‘Tecatsitanaji ini.’
24-25“Intimerica taachaneri, onquitioncatanaquerica ivatsa aisati onquitamarotanaque; ocameetsati irameniteri antaveetatsiri. Oquitamarotanaquerica ishiva itaaca aisati onqueavintonatanaqueririca, impoiji iriotanaque opeanacari patsaarontsi pajencantatsiri; irosati incantantaquea: ‘Te incameetsatanaje yoca, aaqueri patsaarontsi pajencantatsiri.’ 26Irompa ariorica irineavajero te onquitamaroteji ishiva aisati te onqueavintonateji, aiquero ojatajatii ompeajea; irosati irashitacotantaqueari oncarate 7 quitaiteri. 27Ariorica omoncaratapaajea 7 quitaiteri, irosati iramenantajeari, aiquerorica ojatanaitii; irosati incantantajea antaveetatsiri: ‘Te incameetsatanaje yoca, aaqueri patsaarontsi pajencantatsiri.’ 28Irompa irosatirica otimapaaque, aiquero ojatajatii ompeajea, irosati iriotantanajea irointi eeretacaanaqueri itaaca. Irosati incantantajea: ‘Tecatsitanaji ini irointi amashitanaqueri.’
29-30“Itimirica shirampari iroorica tsinane patsaayetatsine iitoqui, teerica inomaqui, ocameetsati irameneri antaveetatsiri. Irineaquerorica oqueavintonatanaqueri aisati quiteriyetanaque iishi, te aneaperoyetajero; irosati incantantaquea: ‘Te incameetsatanaje yoca, aaqueri patsaarontsi aantatsiri aitoqui aisati anomaqui.’ 31Irompa irineaquerorica te onqueavintonateri, irosati ocanta oquisaati iishi. Irosati irashitacotantaqueari oncarate 7 quitaiteri. 32-33Omoncaratapaajearica 7 quitaiteri, irosati iramenitantajeari. Irosatirica otimapaaque, te onqueavintonateri aisati te onquiterite iishi, irosati irameetacantantaqueari. Eiro yameetacotirotsi ivatsaaro. Impoiji irashitacotajeri aisati oncarataje 7 quitaiteri. 34Avisanajerica 7 quitaiteri, irosati iramenantajeari. Irosatirica otimapaaque aisati teerica onqueavintonatajeri; irosati incantantajea: ‘Tecatsitanaji ini.’ Ocameetsati inquivajero iitsaare. 35-36Irompa aiquerorica ojayetanajatiiri, aitaque icantavetajari antaveetatsiri: ‘Tecatsitanajimpi’; ocameetsati iramenajeri aisati. Eiroquea yamenitajiritsi iishi quiteriri; tempa te incameetsatanaje. 37Irompa irineaquerorica, irosati otimapaaque aisati soquijanaji quisaari iishi, iriotanaque tecatsitanaji ini. Irosati incantantajea: ‘Cameetsatanaji yoca.’
38-39“Iriorica shirampari, iroorica tsinane piropiroitatsine imeshinaqui, ocameetsati irameniteri antaveetatsiri. Irineitaqueririca ipiropiroitaque aisati iquisaaporoquiyetaque, iriotanaque irointi isaampoatashiyetaca; irosati incantea incameetsate.
40“Ariorica omaraanaca iishi atiri, incaarapancainavetanaquearica, irosati incantea incameetsate. 41Aisati omaraanaquearica ivancainaquiniri, irosati incantea incameetsate. 42Irointiquea onconijatanaquerica ivatsaaro quiteshimaatatsiri aisati quitioncatatsiri ivancainaqui, iriotanaque irotaque aaqueriri pajencantatsiri. 43-44Irosati iramenitantajeari antaveetatsiri ivatsaaro ivancainaquiniri. Ariorica oquiteshimaataque aisati oquitioncataque, irosati incantantaquea: ‘Te incameetsatanaje.’
45“Jaanicarica aayete patsaarontsi pajencantatsiri, ocameetsati inquitsaatearo tsereayetatsiri iitsaare. Eiro ipashicainatatsi, irointiquea impashicavantetaquea. Irosati incajemantayetea: ‘¡Te noncameetsate! ¡Te noncameetsate!’ 46Irosatirica oncantea ivatsaaro, irosati incanteetantaqueari te incameetsate. Ocameetsati irisavique apaniro anta otsapitapaaca nampitsi.
Ompoaquerica iroori paitapeerica.
47-48“Ariorica pineero ompoaque quitsaarentsi cameetsamaotatsiri, iroorica itijeetiri iviti, iriorica meshinantsi aisati paitapeerica yovetsiqueeyetiri, 49iroorica conijatanaintsine quenashitatsiri aisati iroorica quitioncatatsiri; irointi pajencantatsiri. Ocameetsati ironijayeeteri antaveetatsiri. 50Iramenavaquerorica iriori, irosati irashitacotantaquearo oncarate 7 quitaiteri. 51Omoncaratapaaquearica 7 quitaiteri, irosati iramenantajearo. Otsoncayetanaquerorica poayetanaque, irotaque opajencantatsiri oamantatsiri, aisati te oncameetsayetanajeji ocapee. 52Paitapeerica poayetatsine ocameetsati intaasanoyeetero; tempa irotaque pajencantatsiri. 53-54Irompa iramenavetavaquearorica antaveetatsiri, eirorica otsoncanacarotsi ompoayetanaque; irosati inquivacantantajearo. Impoiji irashitacotajero oncarate 7 quitaiteri.
55“Ariorica iramenajero, irineajerorica te ompempaji opoaque; te oncameetsataje oca. Ocameetsati intayeetero, omavetaquea teerica ontsoncavetea ompoayete tsompoina aisati acaqueroca. 56Irompa irineaquerorica peavetaja capichaji opoaque, iquivantavetajarori; ocameetsati irintsereacotero. 57-58Iro cantaincha ampiitajearica ompoayetaje aisati, ocameetsati intaacoyeetero. Irompa ompeanajearica iquivantajarori, ocameetsati irampiitajero inquivasanoyetajero. Irosati oncameetsayetantanajea.”
59Irotaque oca icantacantiri jaoca incanterori patsaarontsi pajencantatsiri aayeteririca atiri, aisati ompoayeterica quitsaarentsi cameetsamaotatsiri, vetsicachari vititsi jeri meshinantsi. Irotaque incantanteeteari: “cameetsatanaji,” aisati “te incameetsateji.”
Currently Selected:
Levítico 13: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
