Génesis 48

Ijataque JosÉ irameneri iriri imantsiataque

1Ari te osamaniteji quitaiteripee, icamanteetaqueri JosÉ: “Mantsiataque ini piri.” Irosati ijatashitantacari irameneri, yaanaqueri apitetatsiri itomi: ManasÉs jeri Efraín. 2Yareejeitantapaacari, icamanteetaqueri Israel:

—Areetapaaca pitomi JosÉ iramenempi.

Ipanacaro itinaanaca isavicaque imaamentoqui. 3Impoiji icantiri itomi JosÉ:

—Peerani yonijaaquena Tasorentsi, yora mayetirori paitapeerica, anta nampitsiqui pajiveitachaniri Luz, ora quipatsiquiniri Canaán, itasoncaventantaquenari. 4Icantasanotaquena: ‘Noshequiacaasanojeiteri pitomipee aisati irishequiasanojeitanaque pishanincajeitajeari coajicani. Nompajeiteri oca quipatsi irisavicajeitanteari, iriotaque ashijeitearoneri incantaitatiyempani.’ Irotaque icantaquenari. 5Meecaquea yora pitomipee ManasÉs jeri Efraín timajeitaintsiri aca Egiptoqui tequeratsitani nompoque noneantapaajempiri. Iriojeitaque nashisanori, noquempetacantaqueri RubÉn aisati Simeón. 6Impoijiquea ariorica intimayetanaje pashini pitomipee, iriojeitaque pashijeitajeari avirori. Iriotaque ashijeitajearoneri timimoyetimpiri. 7Peerani noponeantajari quipatsiqui Padan-aram, nareevetapaajaro quipatsi Canaán. Ari nianqui ocamapaaque pinironi Raquel, irovetaincha nareetajearome nampitsi Efrata. (Opajita meeca BelÉn.) Aitaque notijanaquerori avotsinampiqui.

Icantacoventiri Israel Efraín aisati ManasÉs Tasorentsiqui

8Ari ineajeitantacariri Israel itomipee JosÉ, isampitiri:

—¿Jaanicampa yocapee?

9Yacanaqueri JosÉ:

—Iriotaque notomipee timaintsiri aca Egiptoqui, itasoncaventaquenari Tasorentsi.

Impoiji icantiri:

—Pamaquenari aca quempeji, noncantacoventanteariri Tasorentsiqui.

10Anteashipatasanotanaque ini Israel, te irineantasanotanajeji. Ari yamajeitaqueneri quempeji, yaavaqueri yavitsanojeitavaqueri, inintavorotaqueri. 11Impoiji icantiri JosÉ:

—Notomi, nojivetaca eiro noneajimpitsi. Iro cantaincha itasoncaventaquena Tasorentsi ishinetaquena noneantajimpiri aisati noneajeitantacariri pitomipee.

12Ari yaajiri JosÉ itomipee, icatiimovetacari iyeritoqui iriri. Ari yoivotashitantanacari iriri 13Impoiji iquempejitaqueneri iriri apiiteroqueti itomi. Yoaqueri Efraín iracosanoriqui, irioquea ManasÉs irampatequi. Aitaque yoatiaqueriri Efraín irampatequi Jacobo, irioquea ManasÉs iraco sanoriqui. 14Iro cantaincha yacotashitantanacariri, icononcavacotanaca yajiricainataqueri Efraín, yora impoitatsiri itimi iracosanoriqui. Irioquea ManasÉs, jivavetachari itimi, yajiricainatantacari irampatequi. 15Ari icantacoventaqueri Israel JosÉ Tasorentsiqui, icanti:

“Yora Tasorentsi, iquemisantiri Abrahamani aisati apani Isaac,

iriotaque quempoyeacoventaquenari peerani notimantacari.

16Aisati jocaacoventaquena Inampire opomerentsitimotantaquenaniri peerani,

iriotaque tasoncaventerine yoca pitomipee.

Iriojeitaque inquenqueshireacotapiniyeetantenari

aisati inquenqueshireacotantapiniyeeteariri Abrahamani jeri apani Isaac.

Irishequiasanojeitanaque catsini itomipee,

intsoteayetanaquero quipatsipee intimantajeitanaquearo.”

17Iro cantaincha yora JosÉ te onimoteriji, ijivetacari iriri icomitaca yajiricainatashitantacariri Efraín iracosanoriqui. Irotaque incononcavacoreantajearirime iriri iracosanoriqui, irajiricainatacaajerime ManasÉs. 18Icantavetari:

—¡Apa, teeve! ¡Te ari oncantea! Jeri yoca jivatatsiri itimi. Iriotaque pajiricainatanteari pacosanori.

19Iro cantaincha yora iriri te incoye irantero. Icantanaqueri:

—¡Jee notomi, niotaquero! Aisati irishequiasanojeitanaque catsini irishanincajeitajeari iriori coajicani. Iro cantaincha yoca impoitatsiri itimi, iranaacotasanotanaqueri irinti. Irishequiasanojeitanaque catsini irishanincajeitajeari coajicani, antearoite onayetanaque inampipee.

20Aisati icantiri:

—Yora pishanincajeitajeari coajicani inquenqueshireacotapinijeitempi. Incantacojeitempi incantajeiteri itsipapee:

‘Irio Tasorentsi tasoncaventempine,

inquempetacantempi Efraín aisati ManasÉs itasoncaventirini.’

Ari imataquero icantacoventaqueri Efraín. Iquempetacantaqueri irio jivatatsiri itimi. Irioquea ManasÉs iquempetacantaqueri impoitatsiri itimi.

21Impoiji icantiri Israel JosÉ:

—Meeca irotaintsi noncame. Iro cantaincha quiso iroajeitempi Tasorentsi, iroimpiajeitanajempi iipatsitequi intacantajeitaqueerini. 22Meeca aviro nopaquempiro antearoite quipatsi panaacojeitaqueri pirentipee: Nopaquempiro Siquem naapitsajeitaqueriri amorreopee nomanajeitantacariri.

Currently Selected:

Génesis 48: cni

Highlight

Copy

Compare