Génesis 47
47
1Ari ijataque JosÉ incamanteri pincatsari. Icantapaaqueri:
—Yareejeitapaaca noshanincapee quipatsiqui Gosen, iponeajeitaca quipatsiqui Canaán. Yamajeitaqueri maaroni irovishatepee, ivacatepee jero maaroni timimoyetiriri. 2Ari icoyeanaque icarati 5 irirentipee, yaanaqueri irineajeitanteariri pincatsari.
3Ineantavacariri pincatsari, isampitavaqueri:
—¿Paita pantaveejeitiri?
Ari yacajeitanaqueri:
—Novincatsarite, irio nantaveejeitiri novirajeitari ovishapee, noquempetajari intacantananiri peerani. 4Nopocajeiti nosavicajeitapee aca piipatsitequi. Oshequi tashentsi anta quipatsiqui Canaán, aisati tecatsi aneajero paashito iroajeitanajeari novishitepee. Meeca nocoaque pishinejeitena nosavicajeitapee anta quipatsiqui Gosen.
5Impoiji icantiri pincatsari JosÉ:
—Yora piri aisati maaroni pirentipee ipocajeitaque iriori irisaviquimojeitapaajempi. 6Ainiro aca noiipatsite pisavicantacari. Ocameetsati pimperi quipatsi Gosen irisavicantajeiteari, irotaque cameetsatasanotatsiri. Timatsirica pishanincapee iotasanojeitatsiri yameniri virantsipee, pincanteri iramenenari narori novacatepee.
7Ari yaanaqueri JosÉ iriri irineanteariri pincatsari. Yora Jacobo yoivotashitapaacari ipincatsataqueri. 8Ari isampitavaqueri:
—¿Jaoca ocaratiri pisarentsite?
9Yacanaqueri:
—Ocarati 130 nosarentsite. Noquenaquenayetantacari jaocapeerica, oshequi opomerentsitimotaquena. Te nonquempeteariji intacantananiri oshequi irosarentsiteni irinti.
10Ari yovetsatanajari, irosati ipiantanaja. 11Ari ipaqueri JosÉ iriri anta quipatsiqui Egiptoquiniri cameetsatasanotatsiri, irisavicajeitantapempari. Imoncarataquero icantaqueriri pincatsari. Aitaque ocantacari isavicapaaque iriri jeri irirentipee quipatsiqui RamsÉs, (Opajita aisati Gosen.) 12Aisati ipapinijeitaqueri oanarontsi yoajeitacari, ocarati coiteimojeitacariri ishanincapee.
Icantacantiri JosÉ otashentsiiteantacari
13Aiquero ojatatii otashentsiiteasanotaque catsini maaroni nampitsipeequi. Oshequi yashinoncaajeitanaca egiptosati aisati savicajeitatsiri quipatsiqui Canaán, tecatsi iroajeitanajeari. 14Yora JosÉ icantani yaapinijeitaqueri iireequitepee egiptosatipee aisati poneainchari quipatsiqui Canaán, ipinaventapinijeitirori tirico yamanantapinijeitiri. Iquempoyeaqueri anta ivincatsarimentoqui pincatsari. 15Ari itsoncanaca iireequitepee egiptosati aisati poneainchari quipatsiqui Canaán. Yora egiptosati ijatashitaqueri JosÉ, icantapairi:
—Teeve aneajeitajeriji noireequite, tecatsi namanantantapinitajeari tirico. Nocoajeitaque meeca pimpashijeitena noyeari, eiro nocamajeitantatsi.
16Icantavaqueri JosÉ:
—Teerica aneajeitajeriji piireequitepee, pamajeitenari irinti pivirapee. Iriotaque nompinajeitempirori tirico.
17Ari imataquero icantaqueriri. Yaajeitanaqueneri maaroni ivirapee: cavaayopee, ovishapee, vacapee jeri aashinopee. Ipajeitapaaqueri. Ari ipinaajeitavaqueneri tirico irotaque yoajeitacari osarentsiqui. 18Ari avisanaque osarentsi. Impoiji ijatashijeitajiri egiptosati JosÉ, icantapaajiri:
—Te aneajeitajeriji noireequite, aisati novirapeeni notsoncaqueri nopajeitaquempiri. Queario nocantaquempi. Te namatavitempiji, tecatsi meeca nompajeitajempiri, irointi timanaintsi noipatsitepee aisati narorijei. 19Meeca nocoajeitaque pamanantajeitero noipatsitepee aisati narori, ompinaajeitanaqueari tirico noajeiteari. Pimperanajeitena nantaveejeiteneri pincatsari, eiroquea nocamajeitantatsi. Aisati pimpajeitena oitsoquipee nompanquijeiteri, eiroquea otimashitantanacatsi quipatsi.
20Ari imataquero JosÉ. Yamanantajeitaquero maaroni iipatsitepee egiptosati, yashitacaacari pincatsari. Iro ipimantantajeitacarori; tempa oshequi itasheasanojeitaque. Aitaque ocantacari yashitajaro pincatsari iipatsitepee. 21Aitaque ocantacari iperanajeitacari pincatsari maaroni savicajeitatsiri Egiptoqui. 22Apatiro irointi iipatsite antaveeyetiniriri ijitasorentsiyetiri, te iramananteroji JosÉ. Yora pincatsari ipashijeitacari tirico yoajeitari. Irotaque caari ipimantantajeitaro irinti.
23Impoiji icantiri JosÉ egiptosati:
—Meeca avirojei iveranaro pincatsari, yashitajaro piipatsitepee, iriotaque namanantaqueneri. Jeroca meeca oitsoquipee pimpaquijeitajeri. 24Ariorica paviijeitaquero, ocameetsati pimoncarayetero 5, aparoni pimpaqueri pincatsari. Iro pashinipee 4 irotaque pimpanquijeitajeri avirori aisati poajeitajeari.
25Ari yacajeitanaqueri:
—Jee, cameetsataque oca picantaquenari; tempa oshequi picavintsaaquena, pipaquena noacari caari nocamajeitanta. Meeca onimojeitaquena nantaveejeiteneri pincatsari.
26Ari icantanaqueri JosÉ savicajeitatsiri Egiptoqui:
—Ocameetsati pimoncaratero 5, aparoni pimpaqueri pincatsari paviijeitaqueri. Irintiquea yora antaveeyetiniriri ijitasorentsiyetiri, tecatsi coacoterine; tempa ora iipatsite te iramananteroji pincatsari. Aitaque ocantari icantacantaqueri JosÉ, irosati ocanta otimi.
Yovecarantancarori Israel icoacairiri itomi yora JosÉ
27Ari isavicajeitapaaque Israel aisati ishanincapee quipatsiqui Gosen, ora Egiptoquiniri. Aitaque yoshequiasanojeitanaqueri catsini ishanincapee. 28Ari ocarataque 17 osarentsipee isavicaque Egiptoqui, aisati ocaratapaaque 147 irosarentsite iriori.
29Aparo quitaiteri iotacotaca irotaintsi incame, icajemacantaqueri itomi JosÉ. Yareetantapaacari, icantavaqueri:
—Queariorica picoi pantenaro nocoacaaquempiri, meeca poanquetero paco nochaovoriqui. Noncantasanotempi: Ariorica noncamaque, eiroyea pitijanatsi aca Egiptoqui, 30Ainti pintijajantena anta quipatsiqui Canaán, noncaratajeri yora noshanincapeeni camayetaintsiri.
Irosati yoanquetantacaro iraco JosÉ. Ari icantanaqueri:
—Jee, aitaque nomataquero picoacaaquenari.
31Ari yovaajiniri aisati icantasanotiri:
—Pincantasanotena pimatasanotenarorica nocantaquempiri.
Ari icantasanotaqueri JosÉ:
—Jee. Iotaque Tasorentsi aitaque nomatasanotaquero picantaquenari.
Irosati yoivotantanaca imaamentoqui.
Currently Selected:
Génesis 47: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
