Génesis 44

Yoaqueneri iyoshitaaritequi Benjamín iramento JosÉ

1Icaratantanacarori yoacaajeitacari JosÉ irirentipee. Irosati icantantacari amenacantirori yashiyetari:

—Pijaayeteneri tirico iyoshitaaritepeequi yocapee, iraajeitanajeri. Aisati pinteyetavajeneri iireequitepee. 2Pinteteneriyea niramento vetsicachari plata iyoshitaaritequi yora impoitatsiri itimi. Pintsipataajeneri iireequite ipinaventavetacarori tirico.

Ari imataquero icantaqueriri. 3Ari oquitaiteamanaji irosati ishinejeitantajari JosÉ ijajeitaji. 4Iro cantaincha tequeratsita irareejitajeji, icantiri JosÉ amenacantirori yashiyetari:

—Pijate poijajeitanaqueri yoranqui. Ariorica pineavajeri anta, pincantajeitavajeri: ‘¿Paitaquea pantajeitanaqueri, te pimpocaje cameetsa? ¿Paitaquea picoshitantanacariri nampitanari iramento vetsicachari plata? ¡Te oncameetsateji pantaqueri! 5Ora iramento irotaque irantari aisati iotashitantayetarori paitapeerica. ¡Te oncameetsateji oca pantajeitaqueri!’

6Yareejeitantavajariri, icantapaaqueri ora icantavaqueriri incaaranqui nampitariri. 7Ari yacajeitanaqueri:

—¡Paitaquea picantantanari! ¡Tecatsi noncantea nantajeitero oca picantaquenari! 8Tempa irotaque nopiantajari noipiajiniri quireequi noneajiri chapinqui itetaca noyoshitaaritepeequi. ¡Paitampa noncoshitantanaqueariri vetsicachari plata jero oro timayetatsiri ivancoqui! 9Meeca nocarajeitica, timatsirica coshitanaqueriri iramento, ocameetsati incame. Impoiji impeajeitajena iveranaro.

10Icantanajiri iriori:

—Jee, aitaque oncanteari. Iro cantaincha yora amitaqueriri iramento, iriotaque impeajeri iroveranaro. Irintiquea pashinipee tecatsi incanteeteri, ocameetsati irijajeitaje irinti.

11Intsipaite yoaniireajeitanaquero iyoshitaaritepee yashireajeitaquero. 12Ari icoayetajiro iramento nampitariri. Intanacaro irashi jivatatsiri itimi, irosati irashiqui Benjamín vecarantarori itimi. Aitaque ineajirori. 13Ineantajarori, irosati itsereajeitantanacaro iitsaare yoashirejeitanaca. Impoiji yoanquejeitajiro aisati iyoshitaaritepee iraashinotequi, ipiajeitanaja nampitsiqui. 14Yora JosÉ ainirotatsi isaviqui ivancoqui. Yareejeitantapaajariri Judá aisati irirentipee, yoivotashijeitapaajari irosati quipatsiqui. 15Icantiri:

—¡Paita pantajeitanaqueri; tempa piotacojeitenaji timatsi niotantari niotacotashitantarori avisayetatsineri paitapeerica!

16Icantanaqueri Judá:

—Te nioteji narori paitarica noncantempiri niotacantempiri te noncoshijeitanaquempiji. Tempa ineajeitaquena Tasorentsi peerani timatsi nantajeitaqueri caari cameetsatatsi. Ainirona meeca maaroni aca. Picoaquerica pimpeajeitajena piveranaro, aitaque oncanteari. Noncarateri yora aitavetanaquempirori piramento.

17Iro cantaincha icantanaqueri JosÉ:

—Eiro noperanajeitimpitsi avinti. Irintiquea apaniro nomperanateari aitavetanaquenarori. Ocameetsati pijajeitaje avinti anta pinampiqui. Tecatsi noncantajeitempi.

Icantacoventiri Judá Benjamín

18Ari iquempejitasanotacari Judá, icantiri:

—Novincatsarite, timatsi noncantasanotempiri. Eiroya piquisanatsi; tempa niotacotaquempi piquempetacari pincatsari. 19Jeroca noncantempiri. Chapinqui pisampitaquena: ‘¿Ainirotatsimpa piri, aisati timatsimpa pirenti pashini?’ 20Impoiji nocantanaquempi: ‘Jee, ainiro apa, anteashipatasanotanaque ini. Aisati ainiro iye evancari. Yanteashipatantacari apa, aitaque itimaqueri iriori.’ Aisati nocamantaquempi: ‘Ainiro apanivanitatsiri, oshequi inintasanotiri apa. Itimaveitani pashini irirentisanori iriori, iro cantaincha camaque.’ 21Impoiji picantaquena: ‘Pamaquenari pirenti, nocoaque noneeri.’ 22Aisati nocantanaquempi: ‘Yora apa eiro ishinetiritsi impoque. Ariorica irojocanaqueri, ari iroashiretacotanaqueari irosati incamantaquea.’ 23Iro cantaincha picantanaquena avirori: ‘Eirorica icaratimpitsi pimpocajanterica, eiroyea naacameetsajeitavajimpitsi.’

24“Nopiajeitantanajari apaqui, nocamantajeitapaaqueri ora picantavaquenari. 25Impoiji otsoncanaja tirico, irosati icantantajana apa: ‘Pijate pamanantajeitajante aisati tirico.’ 26Nocantanaqueri narori: ‘Eiro nomatirotsi nojajeite. Eirorica yoijatanatsi iye vecarantarori itimi, eiro nomajeitirotsi noneajeri yora pincatsari.’ 27Icantaquena aisati: ‘Tempa piojeitaque otimavetacari nojinani Raquel apite notomi. 28Aparoni peaincha, naamaaca queariorica yoacari covencari. Meeca te noneajeriji. 29Meeca ariorica paanajeri yoca notiomi intsipareanajena, paitarica avishimotaquerine iriori, avirojeitaque oamaacantenaneri noashiretacotanaquearirica.’

30-31“Aitaque icantari apa. Quiso yoasanotiri impoitatsiri itimi, inintasanotiri catsini. Meeca, eirorica naanajiritsi yoca, ari incamaque. Narotaque oamaacanterine, iroashiretacotasanotanaquearirica. 32Nocantasanotanaqueri: ‘Narotaque amenerine iyeca anta.’ Aisati nocantanaqueri: ‘Eirorica noipiajiritsi, narotaque cantacayearone irosati noncamantaquea.’ 33Irotaque nocantasanotantimpiri meeca, naro nainti pimperanatajeari pinaajerineri. Irintiquea yoca, pishinetajeri irijataje incarajeitanajeri itsipapee iye. 34Te noncoyeji nojajeitaje nainti, eirorica naanajiritsi iyeca. Aisati te noncoyeji noneeri apa irashinoncayempa.”

Currently Selected:

Génesis 44: cni

Highlight

Copy

Compare