Génesis 45
45
Icamantajiri JosÉ irirentipee
1Yora JosÉ te iramavetanaqueroji iraimotanacari maaroni iveranaro. Icajemanaque icantiri: “¡Pisoquijajeitanaque maaroni!” Tecatsi aparoni amitacotiriri savicanajantsine tsompoina, apaniro irinti JosÉ icarajeitaqueri irirentipee, yonijantajariri.
2Irosati iraasanotantanaca catsini antearojenca. Ari iotacotasanojeitaqueri maaroni egiptosati aisati yovayeetaqueneri ivincatsarimentoqui pincatsari. 3Impoiji icantiri irirentipee:
—Narotaque JosÉ. ¿Aneatsiquerampa ini apa?
Iquemantavacariri, itsaroimojeitanaqueri. Te irimajeitanajea irancanajeri.
4Iro cantaincha icantajiri:
—Caate, pimpocajeite quempeji.
Iquempejijeitantapaacariri, icantasanotiri:
—Narotaque pirenti pajitachari JosÉ, pipimantajeivetacari peerani. Yameetaquena aca Egiptoqui. 5Meeca eiro piquenqueshireajeitatsi aisati eiro piquisavacaimentajeitanatsi pipimantaquena peerani. Itiancaquena Tasorentsi tequeratani pimpocajeite avirori, avisacojeitantajeari. 6Meeca apitetaque osarentsi otashentsiiteaque nampitsipeequi. Aisati caratatsiquera 5 osarentsi eirotsita oshioquitajatsi panquirentsipee ariorica pimpaquijeivetajea. 7Iro cantaincha itiancaquena Tasorentsi tequeratani pimpocajeite avirori, intimajeitantajeari ashanincajeitajeari aca quipatsiqui. Aisati iroavisaacojeitantempiri yonijaajeitempiro itasorenca. 8Aitaque ocantari. Iriotaque Tasorentsi tiancacantaquenari aca. Te avirojei tiancacantenane. Iriotaque peaquenari amitacotiriri pincatsari aisati amenacantirori maaroni ivancoquiniri aisati jivatacaajeitantatsiri maaroni Egiptoqui.
Icajemacantajiri JosÉ iriri
9—Meeca pijajeitanaque intsipaite anta apaqui, pincantapeeri: ‘Aitaque icantiri pitomi JosÉ: Yora Tasorentsi ipeaquena pincatsariventirori maaroni Egipto. Nocoaque intsipaite pimpoque aca pineapaajena. Eiro pisamanitirotsi. 10Timatsi aca nampitsi pajitachari Gosen pisavicajeitantapaajeari. Pamajeitajeri pishanincapee aisati maaroni timimojeitimpiri jeri iriori pivirapee. Pisaviquimotapaajena quempeji aneavacaapinijeitanteari. 11Timatsi aca oshequi oanarontsi nompajeitavaquempiri poajeitapempari, eiro ocoiteimojeitimpitsi. Tempa caratatsiquera 5 osarentsipee ontashentsiitee.’ 12Iquemaquena iye Benjamín aisati aviroripee narotaque cantasanotaintsiri. 13Pincamantapeeri aisati jaoca nocantari nojivatacantanti aca Egiptoqui aisati pincamantapeeri maaroni oca pineajeitaqueri. Meeca pijajeite intsipaite paajanteri apa.
14Ari yavitsanotaqueri Benjamín, iraanaja. Aisati iraanaca Benjamín iriori yavitsanotaqueri JosÉ. 15Impoiji inintavorotaqueri maaroni irirentipee, aisati yavitsanojeitaqueri irosati iraantanaja. Ari te intsaroacaajeitajeariji iquenquetsatacaajeitaqueri.
16Ari anta ivincatsarimentoqui pincatsari iquemaque areejeitapaaca irirentipee JosÉ. Ari iquimoshiretanaque icarajeitaqueri amitacojeitiriri. 17Icantiri pincatsari JosÉ:
—Pincantajeiteri pirentipee inquijacaajeiterita tirico ivirapee, irijajeitajanteta anta inampiqui. 18Iramajenarita piri aisati maaroni pishanincapee. Timatsi aca quipatsi cameetsaiteri nompajeitavaqueriri irisavicajeitantapempari. Aisati timatsi panquirentsipee iroajeitapempari. 19Pincanteri iraajeitanaqueta shiacomentotsipee iramantajeariri piri aisati ijinapee pishaninca jeri itomipee. 20Eiro iquenqueshireacotirotsi iipatsite irojocanaquero aisati maaroni timimoyevetariri; timatsi oshequi aca paitapeerica cameetsayetatsiri irashiyetapaajeari.
21Ari imataquero itomipee Israel icantaqueriri pincatsari. Yora JosÉ ipajeitavaqueri shiacomentotsipee icantaqueriri pincatsari aisati ipajeitavaqueri tirico iroajeitanajeari nianqui. 22Aisati ipajeitavaqueri iroaquerari iitsaarepee. Irioquea Benjamín, ipasanotavaqueri irinti quireequi icarati 300 imentaqui plata aisati ocarati iitsaare 5. 23Aisati ipacantavaqueri iriri 10 aashinopee quijacotanaquerori cameetsatasanotatsiri, aisati ocarati 10 tsinanepee quijacotanaquerori tirico jero tanta iroajeitanaqueari nianqui avotsiqui, impocajeitaquerica. 24Ari irotaintsi irijajeitaje irirentipee JosÉ, icantavaqueri:
—Cameetsayea pijajeitaje, eiro pantavacanacatsi nianqui. Irosati ijajeitanaja.
Yareetantajari irirentipee JosÉ quipatsiqui Canaán
25Isoquiajeitanaji Egiptoqui, irosati yareejeitantajaro quipatsi Canaán, isaviquinta iriri. 26Yareejeitantapaajari, icamantajeitapaaqueri iriri:
—¡Ainiroquera yanei JosÉ! Iriotaque jivatacantirori maaroni Egiptoni.
Iquemantavajariri Jacobo, te irioteji paita incantajeiteriri. Te irishiretavaquearoji icamantajeivetapaacariri. 27Iro cantaincha icamantasanotantacariri maaroni icantavaqueriri JosÉ, aisati ineantavacarori shiacomentotsipee itiancacantaqueneriri aajeitanaquerineri, iquimoshiretasanotanaque catsini. 28Irosati icantantanaca:
—¡Queariotasanotaqueteemi, aneatsi ini notomi JosÉ! Ocameetsati nojate intsipaite noneapaajeri, tequeratsita meeca noncameji.
Currently Selected:
Génesis 45: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
