Éxodo 6
6
1Ari icantanaqueri iriori:
—Aitaque pineaquero jaoca noncanteriri pincatsari. Eiro ishinetashitimpitsi pijajeitaje, icoatii nonijayeteri notasorenca. Ariorica irineayetavaquero, irosati incantajeitantajempi: ‘¡Pijajeitaje, pojocajeitanajero noipatsite!’
2Icantiri aisati:
—Narotaque Tasorentsisanori. 3Nonijaacari Abrahamani, Isaacani jeri Jacoboni aisati nocamantaqueri novajiro Tasorentsi, mayetirori maaroni. Iro cantaincha te noncamantasanoterini novajirosanori: Tasorentsi Timitachari. 4Nocantasanotaque noncarajeiteri, aisati nocashiacaaqueri nompeeri quipatsi Canaán. Tempa aitaque isavicajeivetapaacaniri iquempevetantacariri pashinisati atiri. 5Meeca noneaqueri pishanincapee icavintsaapinijeitaca, yoashinoncaapinijeitaqueri egiptosati, icantani yantaveetacaapinijeitaqueri; nonquenqueshiretanajero nocantasanotaqueriri noncanteani noncarajeiteri. 6Irotaque nocantantimpiri, pijate pincantajeitapeeri pishanincapee: ‘Narotaque, Tasorentsisanori, oipacaacoventajeitajempineri, eiro yantaveetacantanajimpitsi egiptosati. Nonijaajeiteri notasorenca aisati noavisaacojeitantajempiri, nontianqueneri covencatatsiri noashinoncaimentajeitajeri yantimotaquenari caari cameetsatatsi. 7Noquempetacantempi noshanincasanoripee aisati narotaque Pintasorentsiteteari oipacaacoventajeitajempine, eiro yoashinoncaajeitantanajimpitsi egiptosati. 8Irosati naajeitantanajempi anta quipatsiqui nocantasanotitacariri Abrahamani, Isaacani jeri Jacoboni, irotaque nompajeitempiri pashitasanojeitajeari. Narotaque Tasorentsisanori.’
9Ari yovaajeitajiniri Moiseshi ishanincapee. Iro cantaincha te inquemisantajeitavajeriji; tempa oshequi ocantimonentasanotanacari yoashinoncaapiniyeetaqueri. 10-11Impoiji icantajiri aisati Tasorentsi Moiseshi:
—Nocoi meeca pijatashitajeri aisati pincatsari, pincantapaajeri: ‘Nocoi pishinetajena naajeitanajeri noshanincapee, nojajeitaje.’
12Ari icantanaqueri iriori:
—Te inquemisantenaji noshanincapee; jaoca incanteari pincatsari inquemisantantenari iriori. Tempa oshequi opomerentsitimotana noneaveete cameetsa.
13Ari icantasanotiri Tasorentsi Moiseshi jeri Aarón:
—Pincanteri pishanincapee jeri yora faraón pincatsaritatsiri Egiptoqui: ‘Iriotaque Tasorentsi coacaasanotanari nomishitoajeitajeri noshanincapee.’
Jero ivajiro ishanincapeeni Aarón jeri Moiseshi
14Yora itomi Jacoboni pajitachaniri Rubén, jivatatsiri itimi. Itimayetanaque itomipee iriori. Ipajiyetanaqueri Hanoc, Falú, Hesrón jeri Carmí. Iriojeitaque ishanincasanori Rubén.
15Ari itimayetanaque itomipeeni iriori Simeón. Ipajiyetanaqueri: Jemuel, Jamín, Óhad, Jaquín, Sóhar jeri Saúl, (Iriotaque otomi canaasato). Yoca iriojeitaque ishanincasanoripeeni Simeón.
16Yora Leví ocaratapaaque 137 irosarentsite. Itimayetantanacari itomipee iriori. Ipajiyetanaqueri Guersón, Quehat jeri Merari. 17Ari itimayetanaque itomi iriori Guersón. Ipajitaqueri Libní jeri Simí. 18Yora Quehat ocaratanaque 133 irosarentsite iriori. Itimayetantanacari itomipee. Ipajiyetaqueri Amram, Ishar, Hebrón jeri Uziel. 19Ari itimayetanaque itomi iriori Merari. Ipajitaqueri Mahlí jeri Musí. Iriojeitaque ishanincasanoripeeni Leví.
20Yora Amram ijinantajaro irairo pajitachari Jocabed, iritsiro iriri. Ari ocaratanaque 137 irosarentsite itimacantacarori itomi. Ipajitaqueri Aarón jeri Moiseshi.
21Ari itimayetanaque itomipee iriori Ishar. Ipajiyetaqueri Coré, Néfeg jeri Zicrí.
22Ari itimayetanaque itomipee iriori Uziel. Ipajiyetaqueri Misael, Elsafán jeri Sitrí.
23Ari yaaque ijina Aarón, opajita Elisabet, ora irishinto Aminadab. Irotaque iritsiro Nahasón. Ari itimacaaquero itomipee. Ipajiyetaqueri Nadab, Abiú, Eleazar jeri Itamar.
24Ari itimayetanaque itomipee iriori Coré. Ipajiyetaqueri Asir, Elcaná jeri Abiasaf. Iriojeitaque ishanincasanoripeeni Coré.
25Yora Eleazar, itomi Aarón, yaaquero irishinto Futiel. Ari itimacaaquero itomi ipajitaqueri Finees. Iriojeitaque jivatacaayetiriri ishanincasanoripeeni iriori Leví.
26-27Yora Aarón jeri Moiseshi, iriojeitaque icantaqueri Tasorentsi: “Pomishitoajeitajanteri pishanincapee Egiptoqui.” Aisati iriotaque jatashitaqueriri pincatsaritatsiri Egiptoqui.
Iquenquetsatacotajiro icantaqueriri Tasorentsi Moiseshi jeri Aarón
28-29Chapinqui iquenquetsatacantacariri Tasorentsi Moiseshi anta Egiptoqui, icantasanotaqueri:
—Narotaque Tasorentsisanori. Pincamanteri yora ivincatsarite egiptosati maaroni nocantaquempiri.
30Icantanaqueri iriori:
—Notasorentsite, oshequi opomerentsitimotana noneaveetanteari. ¿Jaoca incantea inquemisantantenari pincatsari?
Currently Selected:
Éxodo 6: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
