Éxodo 5

Ijatashitaqueri Moiseshi jeri Aarón, pincatsari

1Irosati ijatashitantacari Moiseshi jeri Aarón pincatsari, icantapaaqueri:

—Aitaque icantiri Tasorentsisanori, yora iquemisantajeitiri ishanincapeeni Israel: ‘Pishinejeitajeri noshanincatacari irijajeitajeta anta caaraiteriqui irampatotimentajeitena, inquimoshireventajeitena impincatsajeitantapaajenari.’

2Iro cantaincha icantanaqueri pincatsari:

—¡Jaoca ijitari Tasorentsi nonquemisantanteariri noshinejeitantajeariri pishanincapee! Te nioteriji yora picantaqueri, eiro meeca noshinejeitiritsi.

3Aiquero icantanaqueriri Moiseshi jero Aarón:

—Yora Tasorentsi iquemisantajeitiri noshanincapee, queario yonijaaquena. Icoacaaquena nojajeitaje anta caaraiteriqui naniijeitanaque mava quitaiteri. Nareetantearori, nontaantapempanariri Novincatsarite Tasorentsi virantsi. Eirorica noquemisantajeitiritsi, aitaque intiancajeitaquenaro caamanentsi, teerica, oayeritantsi.

4Iro cantaincha yora pincatsari ishintsitsatanaqueri, icantiri:

—¡Jaoca pijijeitacari avirori! ¡Paitaquea pojocacaajeitanteariri atiripee irantaveere! ¡Pimpiajeitanajatiyeri, meeca pantaveerequi avirori! 5Pamene, oshequi catsini inajeitaque, ¡iro cantaincha meeca avirori picoaque pojocacaajeiteri yantaveeti!

6Ari icantiri iriori pincatsari ishanincapee antaveetacantajeitatsiri jeri jivatacaajeitiriri ishanincapeeni Israel:

7—Aitapaaji meeca pamacantayetaqueneri ishanincapeeni Israel casaveshipee. Eiro piquempetacantajirotsi pipacantapinijeitirini yovetsicantayetarori adobepee. ¡Irisati aanontajantachane! 8Irointiquea pishintsinajeiteri irimoncaratapinijeitantearori ocarati yovetsicapinijeitiri, eiroquea ocoiteantapaatsi aparoni. Tempa iriojeitaque peranti, irotaque icantajeitantacariri: ‘¡Tsame ajajeite anta caaraiteriqui antaajeitantapempanariri Atasorentsite virantsi!’ 9Meeca pantaveetacaasanojeiteri catsini. Eiro pishinejeitiritsi irimaoreajeite, eiroquea iquemisantantaritsi Moiseshi jeri Aarón; tempa itseeyashita.

Opomerentsitimotasanotanacari ishanincajeitaniri Israel

10Irosati ijajeitantanaca antaveetacaajeitiriri incamantajeitanteariri. Ari icantapaaqueri:

—Icantaquena pincatsari: ‘Eiroyea meeca nopacantapinijeitajimpitsi casaveshipee. 11Meeca avisati aanontajantachane povetsicajeitantajearori adobepee, aisati pinquempetajero pimoncaratajero ocarati povetsicapinijeitiri.’

12Iquemantavacariri ishanincapeeni Israel, irosati iquenantayetanaca iramenajeite casaveshipee, ipesaarantayetiri aapiniveitanariniri. 13Yora egiptosati antaveetacantatsiri, icantani maaroni quitaiteripeequi ishintsinatapinijeitaqueri jivatacaajeitiriri ishanincapeeni Israel. Icoacaasanovetacari irimoncaratacayerime iquempetapinitironi ainiroquerani ipacantapinijeitirini casaveshipee. 14Iro cantaincha te irimatacaajeitajeri irimoncaratajero, irosati ipasanatapinijeitantanacari. Icantajeitiri:

—¡Paitaquea caari pimoncaratacantajeitajari pishanincapee povetsicacaajeitajeri piquempetacaapiniveitarini oshequi povetsicacairini! ¡Te meeca pimoncaratacaajeitajeriji pintacaro oshaiteji, irosati meeca!

15Ineantacari ipasanatapinijeitaqueri, irosati yora jivatacaajeitiriri ijatashitantajeitanacari pincatsari yora icanteetiri faraón, incamantacotanteariri antaveetacaapinijeitiriri. Icantajeitapaaqueri:

—Novincatsarite, ¡Paita poashinoncacantajeitantaquenari! 16Te impacantapinijeitajenaji casaveshipee. Irointi ishintsinatapinitashijeitaquena. Icantapinijeitana: ‘¡Pishintsite, povetsicajeitero adobepee!’ Aisati ipasanatapinitashijeitaquena. ¡Irio cantacaashitacarori yora pishanincapee antaveetacaapinijeitanari!

17Ari iquisatsajeitavaqueri, icantajeitavaqueri:

—¡Avinti peranti! Irotaque piquenayetantacari picantashinirojeitaca: ‘Tsame ajajeite caaraiteriqui antaantapempanariri Tasorentsi virantsi.’ 18¡Pimpiajeitanaje, pantaveejeitapaaje! Omaveteata eirorica ipacantajeitajimpitsi casaveshipee. Iro cantaincha ontimatiye pimoncarajeitero ocarati povetsicapinijeitiri.

19Iquemantajeitacarori oca icantaqueriri, oshequi ocantimonentasanotanacari catsini. 20Isoquijajeitantanajari ineajeitapaajiri Moiseshi jeri Aarón, yoyeajeitiri. 21Ari icantajeitapairi:

—Avirotaque cantacantajeitaquenari, irotaque iquisasanojeitantanaquenari pincatsari aisati antaveetacantajeitatsiri. Avirojei coatsiri iroajeitena. Irio Tasorentsi oasanquetaajeitempine.

Iquenquetsatacaaqueri Moiseshi Tasorentsi

22-23Irosati iquenquetsatacantacari Moiseshi Tasorentsi, icantiri:

—Notasorentsite, ¿paitaquea pishinecoventantacariri yoashinoncaapinijeiyeetaqueri pishanincapee? ¿Irompa meeca pitiancantamempeaquenari aca? Nocamantavetapaacari pincatsari ora picantaquenari. Iro cantaincha aiquero yoashinoncaasanotanaqueriri, te poipacaacoventimateriji.

Currently Selected:

Éxodo 5: cni

Highlight

Copy

Compare