Éxodo 35
35
Quitaiteri irimaoreapinijeitanteari
(Éxo. 31.12-17)
1Ari yapatotaqueri Moiseshi maaroni ishanincapee, icantiri:
“Jeroca icantaquenari Tasorentsi pantajeiteri: 2‘Ocameetsati pantaveetapinijeite quitaiteripeequi irosati omoncaratantea 6 quitaiteripee. Iro sietetatsiri quitaiteri pimacoreajeitanteari irotaque inashitacaacari Tasorentsi pimpincatsajeitanteariri. Jaanicarica antaveetantaquearone, ocameetsati iroyeeteri. 3Jaocarica pisavicajeiteri, eiro catsini poishirotsi paamari quitaiteriqui pimaoreajeitantari.’ ”
Iramayeteri irovetsicantearori Pancotsi Irinanteari Tasorentsi.
(Éxo. 25.1-9; 39.32-43)
4Ari yovaajiniri Moiseshi ishanincapee, icantiri:
“Jero icantaqueri Tasorentsi pantajeiteri: 5-6Pamayete pimpashiteariri Tasorentsi. Maaroni coasanotatsiri imperi, ocameetsati iramayete: Oro, plata, bronce, tocoyapee quitioncamaonirori, quisaamaonirori, quitioncamaori, lino jentamaotatsiri jeri iviti chiivo. 7Jero imeshina ovisha ajacachari quitioncajari, meshinantsi jentameshinari, inchato acacia, 8quejitsi tsiotachaneri, quejitsi casancajencatatsiri irinashitacayeari aisati quejitsi intaapiniyeeteri casancajencatatsiri, 9mapiquipee cameetsatasanotatsiri, cornalina iroyeri efod jero pectoral irinejitacoteari yora jivatacairiri antaveetatsiri.
10“Maaroni iotasanoyetatsiri yovetsicayetiro paitapeerica, ocameetsati impocajeite irovetsicajeitero icoacaaqueeri Tasorentsi: 11Ora Irinanteari Tasorentsi jero ompashicanaqueari Pancotsi ampatotimentanteariri aisati oticaashiro, oyempitayetanaqueari, otaaveratepee, antancotashiyetanaqueari, oatiashiyetanaqueari jero oncatiantayetanaqueari. 12Jero Cajón onanteari Icantacantiri aisati inchaquiire jero otatacoro, impoiji ompashicanteari manacoteroneri 13Jero meesa aisati inchaquiire aisati maaroni timayetatsineri jero tanta anashitacayeanariri Tasorentsi. 14Jero intimantanaqueari tsiorontsi aisati timayetatsineri jeri inaqui intimanteari quejitsi intsiotanteari. 15Jero altar intaapiniyeetantearori casancajencatatsiri aisati inchaquiire jeri quejitsi nashitachaneri isainayeeteari jero casancajencatatsiri taapinitachaneri, jero oticaashiro inqueapiniyeetantearori Irinanteari Tasorentsi. 16Jero antearo altar intaapiniyeetanteariri virantsi irovetsicashitaquero bronce, irampitataquero aisati inchaquiire atancotashiro jero maaroni timayetatsineri, aisati antearo chomo jero osavicanteari. 17Jero tocoyapee onticaashiyetanaqueari saiteriqui aisati oaticashiyetanaqueari jero ovicantayeetanaqueari impoiji oticaashiro inqueantapiniyetearori oyaaraiteritequi. 18Jero oaticashiyetanaqueari Irinanteari aisati oyaaraiteritequiniri jero iviritsatepee. 19Aisati intijayetaque quitsaarentsi irinashitacayeanariri Aarón, inqueacaapiniteri Nonanteariqui irantaveeterica tsompoina jero inquitsaateari aisati itomipee irantaveejeiterica.”
Yamajeitaque ishanincapee timimoyetiriri
20Ari maaroni ishanincajeitaniri Israel ijajeitaji. 21Icoasanojeitanaque maaroni impashijeiteari Tasorentsi timimojeitiriri. Ijajeitanaque ivancopeequi yaayetapaaquero maaroni coachari irovetsicantearori Pancotsi irampatotimentanteariri Tasorentsi aisati yaayetaque quitsaarentsipee cameetsamaotasanoyetatsiri. 22Maaroni shiramparipee aisati tsinanepee coasanotatsiri omperi Tasorentsi timimoyetirori, yamayetaque aparopeeni intsitacantearori paamari vetsicayetachari oro, aniiyo, arete, nenquetsiquipee jero pashinipee ioshitachari oro ocashiacaaqueriri. 23Aisati ashiyetachari tocoyapee quitioncamaonirori, quisaamaonirori, quitioncamaori, lino jentamaotatsiri, iviti chiivo, imeshina ovisha ajacachari quitioncajari jeri meshinantsi jentameshinari yamayetaque. 24Irio itsipapee yamayetaque plata jero bronce, pashini amayetaintsi inchato acacia. 25Aisati tsinanepee iotasanotatsiri oquiricayeti, amayetaque otijayetiri quitioncamaonirori, quisaamaonirori, quitioncamaori jero lino jentamaotatsiri. 26Jero aisati iotasanoyetatsiri oquiricayetiri iviti chiivo, otijacoyetaqueri. 27Aisati jivatacantayetatsiri yamayetaque mapiquipee cameetsatasanotatsiri cornalina aisati pashinipee irinejitacoteari jivatacairiri antaveeyetatsine Ivancoqui Tasorentsi. 28Yamajeitaque aisati casancajencayetatsiri, quejitsi tsiotachaneri, isainayeetari jeri intapiniyeeteri casancajencatatsiri.
29Aitaque icantacari maaroni shiramparipee jero tsinanepee yamajeitaque ipashitacariri Tasorentsi irovetsicantearori icantaqueriri Moiseshi.
Icoyeaqueri Tasorentsi Besalel vetsicayeteroneri Irinanteari
(Éxo. 31.1-11)
30Ari icantiri Moiseshi ishanincapee: “Pinquemajeite, yora Tasorentsi icoyeaqueri Besalel itomi Urí, icharine Hur ishanincapeeni Judá, vetsicayeterone paitapeerica ashi Pancotsi Irinanteari. 31-32Iriotaque otimantashireacari Ishire iotacaasanotaqueri irovetsicantayetearori paitapeerica oro, plata jero cobre. 33Aisati irovetsicantayetearori mapipee cameetsatasanoyetatsiri iroanqueyeteri aisati irovetsicantayetearori inchato. Aisati iroameetsatantayetearori paitapeerica irantayeteri. 34Iotacaasanotaqueri Tasorentsi Besalel jeri Aholiab, itomini Ahisamac, ishanincapeeni Dan, iroametanteariri itsipapee. 35Iriotaque iotacaasanotaqueri Tasorentsi irovetsicantayetearori paitapeerica: irisheroncantayetearori inchato, irimoncaratantayetearori aisati irishiacantayeteri paitapeerica, aisati irantsitantayetearo quitioncatsanirori, quisaatsanirori jero quitioncatsari aisati intijantayetearori lino jentamaotasanotatsiri. Paitapeerica irantayeteri.
Currently Selected:
Éxodo 35: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
