Éxodo 34

Ipacotajiri Tasorentsi Moiseshi Icantacantiri

(Deut. 10.1-5)

1Ari iquemajiri Moiseshi Tasorentsi icantajiri:

—Pincotaaje meeca apicotate mapi onquempetajearo ora nopavetavaquempiri piporocaqueri, nosanquenatantajearori aisati Nocantacantiri. 2Meeca pivetsicajea, pintoncaantapaajeari osaitequerani capichaji quitaite. Pimpocantajeari aca ochoviinaquitapaaque toncaari. 3Tecatsiyea pintsipataquea aisati tecatsi pocatsine toncaariquica. Aisati eiro catsini iquempejitacaaritsi oacaariri paashito ovisha jeri vaca.

4Ari imataquero Moiseshi icantaqueririri Tasorentsi, irosati icotantaja apicotate mapi, iquempetacantajiro intacarori. Oquitaiteantamanajari capichaji quitaite ari yaaquero, irosati itoncaantanaja. 5Irosati yaniireashitantapaajari Tasorentsi mencoriqui, itsipatacari Moiseshi icamantasanotaqueri ivajiro. 6Yavisantanacariri, antearojenca icantiri:

—Narotaque Tasorentsi Timitachaniri Aneashitachari, cavintsantatsiri, caari shemantacha. Oshequi catsini nonintanti; noqueariotasanoti. 7Nocantaitatiani nonintanti, te nompashiniteji. Nocantani aisati nopeacotapinitanari antayevetarori caari cameetsatatsi jeri piatsajeitachari. Iro cantaincha eiro noneashitaritsi antayetirori caari cameetsatatsi, aitaque noasanquetaimentaqueri antajeitaquerori aisati iriori itomipee, icharinepee jeri intomintajeitajeari iriori coajicani.

8-9Intsipaite itiyeroanaca Moiseshi yoivotanaca quipatsiqui, ipincatsatanaqueri Tasorentsi. Icantiri:

—Notasorentsite, aviro Tasorentsisanori; queariorica picavintsaaquena, nocoaque meeca quiso poajeitena. Queariotaque iquisoshirejeitaque noshaninca, te inquemisantempiji. Iro cantaincha nocoaque meeca pimpeacojeitajenaro nantajeitaqueri, irointiquea paacameetsajeitajena; tempa narojeitaque pishanincapee.

Yovetsicaji aisati Tasorentsi ishanincatavacaajeitantacari.

(Deut. 7.1-5)

10Icantanaqueri iriori:

“Pinquemena noncantasanotempi. Meeca nocoi noncarateri maaroni ishanincajeitaniri Israel. Nomatasanotero caari ineapinijeiti pashinisatipee atiri savicajeitatsiri quipatsipeequi. Maaroni atiripee irineajeitero ora nomajeitempiri, aisati iroajeitanaquero cavaco.

11“Meeca pimoncarajeitero avirori nocantasanojeitaquempiri. Ariorica pimoncarajeitaquero, irosati nomatacaajeitantempiri pintsoncajeitanteariri amorreopee, canaaneopee, hititapee ferezeopee, heveopee jeri jebuseopee.

12“Queariompia picarajeitapairicari, aisati eiro paacameetsajeitiritsi, yantacaajeitimpirocari caari cameetsatatsiri. 13Irointiquea pojoquitajeiteri itaantayetanariri ijitasorentsinirotashiyetari, pimporoquitasanojeiteri imapinepee aisati pinchaquititajeiteri irinchatorepee inashitacaari ipincatsatashijeitari.

14“Eiro catsini pipincatsatashitaritsi ijitasorentsitashiyeetari. Tempa narotaque Tasorentsi tsaneacotimpirori, apaniro pimpincatsajeitena. Irotaque novajiro Tasorentsi Tsaneacotantachari.

15“Eiro catsini paacameetsajeiteri savicajeitatsiri anta quipatsiqui. Icajemimpicari ariorica ipincatsatiro ijitasorentsitashiyetari, picarajeitiricari poajeitea itainirori ivira, 16aisati paacairicari pitomipee irishintopee aisati yaitimpirocari pishintopee itomipee iriori. Ariorica irantajeitero caari cameetsatatsi impincatsatanteariri ijitasorentsitashiyetari, aitaque irantacaajeitaqueri pitomipee inquempejeitantanaqueariri impincatsayetanaqueri iriori.

17“Eiro catsini pivetsicashiyetatsi oro jeri plata pijitasorentsiyeteri.”

Inquimoshiretapinijeitanteari osarentsipeequi

(Éxo. 23.14-19; Deut. 16.1-17)

18Aisati icantajiri: “Pinquimoshireventajeitero ora poapinijeitantearori tanta caari iconoyeeti tapiacaarori. Pimoncarajeitero nocantaquempiri. Oncarate 7 quitaiteri poapinijeitearo. Tempa iriotaque yoca cashiri pajitachari Abib, pishitoantajeitanajari peerani anta Egiptoqui.

19“Maaroni jivayetatsine intime itomipee pishaninca iriojeitaque nashi aisati inquempejeitea iriori irijanipee ivacate, irovishate jeri chiivo. 20Iriorica jivatatsine irijani aashino, ocameetsati impinaajeri ovishajaniqui, teerica chiivojaniqui. Eirorica ipinairitsi, ocameetsati inquentsireeri. Yora jivatatsineri intime itomipee pishanincapee, ocameetsati impinayeri ovishajaniqui. Tecatsi pocashitachane pishanincapee ariorica pinquimoshireventajeitena, ontimatiye iramajeitaquena paitapeerica.

21“Oncarate 6 quitaiteri pantaveejeitanteari, iro caratapaatsine 7 quitaiteri, irotaque pimaoreajeitanteari; omavetaquea omoncaratearica pantaveetanteari aisati paviijeitantearori oitsoquipee, ontimatiye pimaoreajeite.

22“Pinquimoshireventapinitero avisayetatsiri 7 tomincopee, aisati paviijeitantarori pivanquirepee tirico intayetarori osampayeti; jero aisati paviitantarori vecarantarori osarentsi.

23“Nocoacaaqueri maaroni shiramparipee oncarate mava irampatotimentajeitena osarentsipeequi impincatsatapinijeitenanta. Tempa narotaque Tasorentsisanori, Itasorentsite Israel. 24Aisati narotaque matacayerine intsoncantajeiteariri savicayetatsiri nampitsipeequi, irosati antearoitetantanaquea iipatsite. Ariorica irijatapinijeite inquimoshireventajeitero ocapee, noncanteani nojocaacoventajeiteri, tecatsi aapitsatajerine.

25“Poapiniteririca virantsi, eiro pitsipatairotsi iriraja tanta conoachari tapiacaarori. Aisati ariorica pinquimoshireventero quitaiteri Navisantaniri, eiroyea poanontavajatsi ivatsa poamanajeari.

26“Ocameetsati iraapinijeitenaro Pancotsiqui pampatotimentantenari intayetarori oanayeta ivanquirepee, impincatsatapinijeitenanta, tempa narotaque Tasorentsisanori Pitasorentsite.

“Eiro icotacotiritsi chiivojaniqui otsomija iriniro.”

Isanquenatacotajiro Moiseshi icantacantiri Tasorentsi aisati ishipaquireavorotaque

27Icantajiri aisati Tasorentsi Moiseshi:

“Pisanquenatero oca neantsipee; tempa irotaque otincami maaroni cantacotirori noncarajeitempi aisati iriori ishaninajeitaniri Israel.”

28Ari ocarataji 40 quitaiteri aisati 40 tsiteniri itsipatacari Moiseshi Tasorentsi toncaariqui. Te iroyeaji aisati te irireji. Aitaque isanquenatajirori icantacantayetiri Tasorentsi caratatsiri 10. 29Irosati yoirincantapaaja Moiseshi, yamacotajiro Icantacantiri Tasorentsi apicotatequeti mapi. Iro cantaincha te iriotacoteaji ishipaquireavorotaque. Tempa osamani ipeajanta iquenquetsatacantajariri Tasorentsi. 30Ineantavajariri Aarón jeri ishanincapee ishipaquireavorotaque, itsaroacaasanojeitavacari, te inquempejijeitavajeariji. 31Iro cantaincha icajemapaaqueri Aarón jeri jivatacaayetiriri ishanincapee. Ari ipocashijeitapaaqueri, irosati iquenquetsatacantacari. 32Impoiji iquempejijeitapaajari iriori ishanincapee, yovaapaaqueneri maaroni icantaqueriri Tasorentsi anta toncaariqui. 33Itsoncantanacarori iquenquetsatacaajeitiri, irosati ipashicavorotantanaca.

34Ariorica iqueapiniti pancotsiqui iquenquetsatacantariri Tasorentsi, ipashireavorotanaja irosati irisoquijantanajea. Impoiji yovaapinitiniri ishanincapee icantiriri Tasorentsi. 35Yora ishanincapee ineapinijeitiro ivoro Moiseshi ishipaquireavoroti, irotaque ipashivorotantari, irosati inqueantanajea inquenquetsatacaajeri Tasorentsi.

Currently Selected:

Éxodo 34: cni

Highlight

Copy

Compare